ಸಿಡ್ನಿ ಇಂಟರ್‌ನ್ಯಾಶನಲ್‌ ಟೆನಿಸ್‌ ಫೈನಲ್‌ನಲ್ಲಿ ಎಡವಿದ ಸಾನಿಯಾ ಜೋಡಿ

ಸಿಡ್ನಿ: ಸಾನಿಯಾ ಮಿರ್ಜಾ ಅವರಿಗೆ ವರ್ಷದ 2ನೇ ವನಿತಾ ಡಬಲ್ಸ್‌ ಟೆನಿಸ್‌ ಪ್ರಶಸ್ತಿ ಕೈಜಾರಿದೆ. ಶುಕ್ರವಾರದ “ಸಿಡ್ನಿ ಇಂಟರ್‌ನ್ಯಾಶನಲ್‌’ ಟೆನಿಸ್‌ ಕೂಟದ ಫೈನಲ್‌ನಲ್ಲಿ ಸಾನಿಯಾ ಮಿರ್ಜಾ -ಜೆಕ್‌ ಜತೆಗಾರ್ತಿ ಬಾಬೊìರಾ ಸ್ಟ್ರೈಕೋವಾ ಜೋಡಿಗೆ ನೇರ ಸೆಟ್‌ಗಳ ಸೋಲು ಎದುರಾಗಿದೆ.

ಯಾವುದೇ ಶ್ರೇಯಾಂಕ ಹೊಂದಿಲ್ಲದ ಹಂಗೇರಿಯ ಟೈಮಿಯಾ ಬಬೋಸ್‌-ರಶ್ಯದ ಅನಸ್ತಾಸಿಯಾ ಪಾವುÉಚೆಂಕೋವಾ 6-4, 6-4 ಅಂತರದಿಂದ ಅಗ್ರ ಶ್ರೇಯಾಂಕಿತ ಇಂಡೋ-ಜೆಕ್‌ ಜೋಡಿಗೆ ಸೋಲುಣಿಸಿತು. ಕಳೆದ ವಾರವಷ್ಟೇ ಸಾನಿಯಾ ಮಿರ್ಜಾ ಅಮೆರಿಕನ್‌ ಜತೆಗಾರ್ತಿ ಬೆಥನಿ ಮಾಟೆಕ್‌ ಸ್ಯಾಂಡ್ಸ್‌ ಅವರೊಡಗೂಡಿ ಬ್ರಿಸ್ಬೇನ್‌ ಪ್ರಶಸ್ತಿ ಜಯಿಸಿದ್ದರು. ಸಿಡ್ನಿಯಲ್ಲೂ ಇದೇ ಸಾಧನೆ ಮರುಕಳಿಸುತ್ತದೆಂಬ ನಿರೀಕ್ಷೆ ಭಾರತೀಯರದ್ದಾಗಿತ್ತು. ಆದರೆ ಇದು ಹುಸಿಯಾಯಿತು. ಒಂದು ಗಂಟೆ, 12 ನಿಮಿಷಗಳಲ್ಲಿ ಇವರು ಶರಣಾಗತಿ ಸಾರಿದರು.

ಸಾನಿಯಾ-ಸ್ಟ್ರೈಕೋವಾ ಈ ವರ್ಷ ಜತೆಗೂಡಿ ಆಡಿದ ಮೊದಲ ಪಂದ್ಯಾವಳಿ ಇದಾಗಿದೆ. ಆಸ್ಟ್ರೇಲಿಯನ್‌ ಓಪನ್‌ನಲ್ಲೂ ಇವರು ಜತೆಯಾಗಿ ಕಣಕ್ಕಿಳಿಯಲಿದ್ದಾರೆ. ಈ ಜೋಡಿಗೆ 4ನೇ ಶ್ರೇಯಾಂಕ ಲಭಿಸಿದೆ. 2016ರಲ್ಲಿ ಸಾನಿಯಾ-ಸ್ಟ್ರೈಕೋವಾ ಒಟ್ಟು 5 ಪಂದ್ಯಗಳಲ್ಲಿ ಜತೆಯಾಗಿ ಸ್ಪರ್ಧಿಸಿದ್ದರು. ಸಿನ್ಸಿನಾಟಿ ಮತ್ತು ಟೋಕಿಯೋ ಪಂದ್ಯಾವಳಿಗಳಲ್ಲಿ ಪ್ರಶಸ್ತಿಗೆ ಭಾಜನರಾಗಿದ್ದರು.

ಕಳೆದ ವರ್ಷ ಸ್ವಿಸ್‌ ತಾರೆ ಮಾರ್ಟಿನಾ ಹಿಂಗಿಸ್‌ ಜತೆಗೂಡಿ ಆಡಿದ್ದ ಸಾನಿಯಾ ಮಿರ್ಜಾ ಬ್ರಿಸ್ಬೇನ್‌, ಸಿಡ್ನಿ ಜತೆಗೆ ಆಸ್ಟ್ರೇಲಿಯನ್‌ ಓಪನ್‌ನಲ್ಲೂ ವನಿತಾ ಡಬಲ್ಸ್‌ ಪ್ರಶಸ್ತಿ ಎತ್ತಿದ್ದರು. ಈ ಬಾರಿ ಆಸ್ಟ್ರೇಲಿಯನ್‌ ಓಪನ್‌ನಲ್ಲಿ ಮಾರ್ಟಿನಾ ಹಿಂಗಿಸ್‌ ಅವರ ಜೋಡಿಯಾಗಿ ಕಾಣಿಸಿಕೊಳ್ಳುವವರು ಅಮೆರಿಕದ ಕೊಕೊ ವಾಂದೆವೇಗ್‌.