ಹೋಬರ್ಟ್: ಎರಡು ವರ್ಷಗಳ ಬ್ರೇಕ್ ನ ನಂತರ ಮತ್ತೆ ಟೆನ್ನಿಸ್ ಗೆ ಮರಳಿದ ಭಾರತದ ತಾರೆ ಸಾನಿಯಾ ಮಿರ್ಜಾ ಮೊದಲ ಕೂಟದಲ್ಲೇ ಪ್ರಶಸ್ತಿ ಗೆದ್ದು ಬೀಗಿದ್ದಾರೆ.
ಹೋಬಾರ್ಟ್ ಡಬ್ಲ್ಯೂ ಟಿಎ ಅಂತಾರಾಷ್ಟ್ರೀಯ ಕೂಟದ ಡಬಲ್ಸ್ ನಲ್ಲಿ ಸಾನಿಯಾ ಮಿರ್ಜಾ ಮತ್ತು ನಾದಿಯಾ ಕಿಚೆನಾಕ್ ಜೋಡಿ ಪ್ರಶಸ್ತಿಗೆ ಮುತ್ತಿಕ್ಕಿತು.
ಶನಿವಾರ ನಡೆದ ಫೈನಲ್ ಪಂದ್ಯದಲ್ಲಿ ಚೈನಾದ ಶಾಯ್ ಪೆಂಗ್ –ಶಾಯ್ ಜುಂಗ್ ಜೋಡಿಯನ್ನು ಎದುರಿಸಿದ ಇಂಡೋ- ಉಕ್ರೇನಿಯನ್ ಜೋಡಿ 6-4, 6-4 ಅಂತರದಿಂದ ಗೆಲುವು ಸಾಧಿಸಿತು.
ಸುಮಾರು ಒಂದು ಗಂಟೆ 21 ನಿಮಿಷ ನಡೆದ ಈ ಪ್ರಶಸ್ತಿ ಕಾಳಗದಲ್ಲಿ ಸಾನಿಯಾ- ನಾಡಿಯಾ ಜೋಡಿ ನೇರ ಸೆಟ್ ಗಳ ಜಯ ಸಾಧಿಸಿತು.
2007ರಲ್ಲಿ ಬ್ರಿಸ್ಬೇನ್ ಅಂತಾರಾಷ್ಟ್ರೀಯ ಟ್ರೋಫಿಯೊಂದಿಗೆ ಆರಂಭವಾದ ಸಾನಿಯಾ ಡಬಲ್ಸ್ ಆಟದಲ್ಲಿ ಇದುವರೆಗೆ 42 ಪ್ರಶಸ್ತಿ ಗೆದ್ದಿದ್ದಾರೆ.
ಎರಡು ವರ್ಷಗಳ ಕಾಲ ಆಟದಿಂದ ಬ್ರೇಕ್ ಪಡೆದಿದ್ದ ಸಾನಿಯಾ ಮಿರ್ಜಾ 2018 ಮತ್ತು 2019ರ ಋತುವಿನಲ್ಲಿ ಕಣಕ್ಕಿಳಿದಿರಲಿಲ್ಲ.
