ತನ್ನ ಪೋಸ್ಟರ್‌, ಟೀಸರ್‌ ಮತ್ತು ಶೀರ್ಷಿಕೆ ಮೂಲಕ ಗಮನ ಸೆಳೆಯುತ್ತಿರುವ “ಅನುಕ್ತ’ ಚಿತ್ರ ಇನ್ನೇನು ಫೆಬ್ರವರಿ ಮೊದಲ ವಾರದಲ್ಲಿ ತೆರೆಗೆ ಬರುತ್ತಿದೆ. ಸದ್ಯ ಚಿತ್ರದ ಪ್ರಮೋಷನ್‌ ಕಾರ್ಯಗಳಿಗೆ ಚಾಲನೆ ನೀಡಿರುವ ಚಿತ್ರತಂಡ, “ಅನುಕ್ತ’ ಚಿತ್ರವನ್ನು ಸಿನಿಪ್ರಿಯರಿಗೆ ತಲುಪಿಸುವ ಅಂತಿಮ ಹಂತದ ಕಸರತ್ತು ನಡೆಸುತ್ತಿದೆ. ಇನ್ನು ಚಿತ್ರದ ಬಹುತೇಕ ಕಲಾವಿದರು, ತಂತ್ರಜ್ಞರು, ನಿರ್ದೇಶಕರು, ನಿರ್ಮಾಪಕರು ಚಿತ್ರದ ಪ್ರಚಾರದಲ್ಲಿ ಬ್ಯುಸಿಯಾಗಿದ್ದಾರೆ.
ಆದರೆ ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿರುವ ನಟಿ ಸಂಗೀತಾ ಭಟ್ ಮಾತ್ರ “ಅನುಕ್ತ’ ಚಿತ್ರಕ್ಕೂ ತನಗೂ ಯಾವುದೇ ಸಂಬಂಧವಿಲ್ಲ ಎಂಬಂತೆ ವರ್ತಿಸುತ್ತಿದ್ದಾರೆ ಎಂಬುದು ಸದ್ಯಕ್ಕೆ ಹರಿದಾಡುತ್ತಿರುವ ಸುದ್ದಿ. ಈ ಬಗ್ಗೆ ಮಾತನಾಡುವ “ಅನುಕ್ತ’ ಚಿತ್ರದ ನಿರ್ದೇಶಕ ಅಶ್ವಥ್‌ ಸ್ಯಾಮುಯೆಲ್‌, “ಸಂಗೀತಾಭಟ್‌ ಅವರೊಂದಿಗೆ ಆಗಿರುವ ಅಗ್ರಿಮೆಂಟ್‌ ಪ್ರಕಾರ, ಅವರು ಚಿತ್ರದ ಪ್ರಮೋಷನ್‌ ಕೆಲಸಗಳಲ್ಲಿ ಭಾಗಿಯಾಗಬೇಕಿತ್ತು.
ಇದು ಚಿತ್ರದ ಪ್ರಾರಂಭಕ್ಕೂ ಮುನ್ನವೇ ಅವರೊಂದಿಗೆ ಆಗಿರುವ ಅಗ್ರಿಮೆಂಟ್‌. ಆದರೆ ನಮ್ಮ ಚಿತ್ರ ರಿಲೀಸ್‌ ಆಗುವ ಮೊದಲೇ ಅವರು ಚಿತ್ರರಂಗದಿಂದ ಹೊರಹೋಗುವ ನಿರ್ಧಾರ ಪ್ರಕಟಿಸಿದ್ದಾರೆ. ಅದಾದ ಬಳಿಕ ಅವರು ನಮ್ಮ ಚಿತ್ರದ ಯಾವುದೇ ಪ್ರಮೋಶನ್‌ನಲ್ಲಿ ಕಾಣಿಸಿಕೊಂಡಿಲ್ಲ. ನಾವು ಕೂಡ ಅವರನ್ನು ಕರೆತರುವ ಪ್ರಯತ್ನ ಮಾಡಿದ್ದರೂ, ಅದು ಪ್ರಯೋಜನವಾಗಿಲ್ಲ.
ಇನ್ನು ಆನ್‌ಲೈನ್‌ನಲ್ಲಿ ಚಿತ್ರದ ಬಗ್ಗೆ ಒಂದಷ್ಟು ಪ್ರಮೋಶನ್‌ ಮಾಡುತ್ತಿರುವುದಾಗಿ ಹೇಳಿದ್ದಾರೆ. ಚಿತ್ರದ ಬಿಡುಗಡೆಯ ಅಂತಿಮ ಹಂತಕ್ಕೆ ಬಂದಿದ್ದೇವೆ. ಇಂತಹ ಸಮಯದಲ್ಲಿ ಚಿತ್ರದ ಪ್ರತಿಯೊಬ್ಬ ಕಲಾವಿದರು, ತಂತ್ರಜ್ಞರ ಸಹಕಾರ ತುಂಬಾ ಮುಖ್ಯ. ಚಿತ್ರ ಸರಿಯಾಗಿ ಪ್ರೇಕ್ಷಕರಿಗೆ ತಲುಪಿದರೆ, ಎಲ್ಲರ ಶ್ರಮಕ್ಕೂ ಫ‌ಲ ಸಿಗುತ್ತದೆ. ಇದನ್ನು ಎಲ್ಲರೂ ಅರ್ಥ ಮಾಡಿಕೊಳ್ಳಬೇಕು’ ಎಂದು ಸಂಗೀತಾ ಭಟ್ ಬಗ್ಗೆ ತಮ್ಮ ಅಸಮಾಧಾನವನ್ನು ಹೊರಹಾಕಿದ್ದಾರೆ.
