ಮರಳು ಅಕ್ರಮ ಸಾಗಾಟ: ಲಾರಿ ವಶಕ್ಕೆ

ಚಿಂಚೋಳಿ: ಮುಲ್ಲಾಮಾರಿ-ಕಾಗಿಣಾ ನದಿಯಿಂದ ಮರಳನ್ನು ಅಕ್ರಮವಾಗಿ ಸಾಗಿಸುತ್ತಿದ್ದ ಎರಡು ಲಾರಿಗಳನ್ನು ಹಲಕೋಡ ಗ್ರಾಮಸ್ಥರು ತಡೆದು ಸುಲೇಪೇಟ ಪೊಲೀಸ್‌ ಠಾಣೆಗೆ ಒಪ್ಪಿಸಿದ್ದಾರೆ ಎಂದು ಗ್ರಾಮದ ಮುಖಂಡ ಅಮೃತರಾವ ಗುತ್ತೇದಾರ ತಿಳಿಸಿದ್ದಾರೆ. ಕಂದಾಯ ಇಲಾಖೆ ಅಧಿಕಾರಿಗಳ ಆದೇಶ ಮೇರೆಗೆ ಲಾರಿ ಜಪ್ತಿ ಮಾಡಲಾಗಿದೆ ಎಂದು ಸುಲೇಪೇಟ ಠಾಣೆ ಪಿಎಸ್‌ಐ ಎ.ಎಸ್‌. ಪಟೇಲ್‌ ತಿಳಿಸಿದ್ದಾರೆ. 

ಹಲಕೋಡ ಗ್ರಾಮದ ಬಳಿ ಹರಿಯುವ ಮುಲ್ಲಾಮಾರಿ-ಕಾಗಿಣಾ ನದಿಯಲ್ಲಿ ದೊರೆಯುವ ಉಸುಕು ಮಾರಾಟಕ್ಕಾಗಿ ಸೇಡಂ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯಿಂದ ಗುತ್ತಿಗೆದಾರ ಮನೋಜ ಜಾಧವ ಎಂಬುವವರ ಹೆಸರಿಗೆ ಟೆಂಡರ್‌ ನೀಡಲಾಗಿದೆ. ಆದರೆ ಸರಕಾರದ ಆದೇಶ ಉಲ್ಲಂಘಿಸಿ ಒಂದೇ ರಾಯಲ್ಟಿ ಮೇಲೆ ದಿನವಿಡೀ ಲಾರಿಗಳಲ್ಲಿ ಅಧಿಕ ಮರಳು ತುಂಬಿ ಮಾರಾಟ ಮಾಡಲಾಗುತ್ತಿದೆ. ಅಕ್ರಮ ಉಸುಕು ಮಾರಾಟ ಮಾಡುವ ಲಾರಿಗಳ ಓಡಾಟದಿಂದಾಗಿ ನಮ್ಮ ಗ್ರಾಮದ ಸಂಪರ್ಕ ರಸ್ತೆ ಸಂಪೂರ್ಣ ಹಾಳಾಗಿದೆ ಎಂದು ದೂರಿದ್ದಾರೆ. ಹಲಕೋಡ, ಪೋತಂಗಲ, ಜಟ್ಟೂರ ಗ್ರಾಮದಲ್ಲಿ ಅಪಾರವಾಗಿ ಕೆಂಪು ಉಸುಕು ದೊರೆಯುತ್ತಿದೆ.

ಇದರಿಂದ ಕೆಲವು ಪ್ರಭಾವಿ ರಾಜಕಾರಣಿಗಳು ಇದರಲ್ಲಿ ಶಾಮೀಲಾಗಿದ್ದರಿಂದ ಮರಳು ವ್ಯಾಪಾರ ರಾಜಾರೋಷವಾಗಿ ನಡೆಯುತ್ತಿದೆ. ಜೆಸಿಬಿಯಿಂದ ಮರಳು ತೆಗೆದು ಲಾರಿಗಳ ಮೂಲಕ ಹುಮನಾಬಾದ, ಸೇಡಂ, ಚಿಟಗುಪ್ಪ, ಬಸವಕಲ್ಯಾಣ, ಮನ್ನಾಎಕ್ಕೆಳ್ಳಿ, ಚಿಂಚೋಳಿ, ಸುಲೇಪೇಟ, ನಿಡಗುಂದಾ, ರಟಕಲ್‌, ಕೋಡ್ಲಿ ಗ್ರಾಮಗಳಿಗೆ ಸಾಗಿಸಲಾಗುತ್ತಿದೆ ಎಂದು ದೂರಿದ್ದಾರೆ.