ಬಿಗ್ ‌ಬಾಸ್‌: ಸಲ್ಮಾನ್‌ ಸಂಭಾವನೆ 16 ಕೋಟಿ?

ಮುಂಬಯಿ: ಹಿಂದಿ ಭಾಷೆಯಲ್ಲಿ ಪ್ರಸಾರವಾಗಲಿರುವ ‘ಬಿಗ್‌ಬಾಸ್‌’ 14ನೇ ಆವೃತ್ತಿ ನಡೆಸಿಕೊಡಲಿರುವ ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌ ಸಂಭಾವನೆ ಎಷ್ಟು?

ಈ ಬಗ್ಗೆ ಹಲವು ಚರ್ಚೆಗಳು, ಗಾಸಿಪ್‌ಗಳು ಹರಿದಾಡುತ್ತಿವೆ.

ಅಕ್ಟೋಬರ್‌ನಲ್ಲಿ ಪ್ರಸಾರವಾಗಲಿದೆ ಎಂದು ನಿರೀಕ್ಷಿಸಲಾಗಿರುವ ಕಾರ್ಯ­ಕ್ರಮ ನಡೆಸಿಕೊಡುವ ನಿಟ್ಟಿನಲ್ಲಿ ಸಲ್ಮಾನ್‌ ಖಾನ್‌ ಪ್ರತಿ ಎಪಿಸೋಡಿಗೆ 16 ಕೋಟಿ ರೂ. ಸಂಭಾವನೆ ನಿರೀಕ್ಷೆ ಮಾಡುತ್ತಿ­ದ್ದಾರೆಂದು ಹೇಳಲಾಗಿದೆ.

2010­ರಿಂದ ಅವರು ಸತತವಾಗಿ ಕಾರ್ಯಕ್ರಮ ನಡೆಸಿಕೊಡುತ್ತಿದ್ದಾರೆ.

ಬಾಲಿವುಡ್‌ ನಟ ನಾಲ್ಕರಿಂದ ಐದನೇ ಆವೃತ್ತಿವರೆಗೆ ಪ್ರತಿ ಎಪಿಸೋಡ್‌ಗೆ 2.5 ಕೋಟಿ ರೂ. ಸಂಭಾವನೆ ಪಡೆದುಕೊಂಡಿದ್ದರು.

ಏಳನೇ ಆವೃತ್ತಿ ಅವಧಿಗೆ 5 ಕೋಟಿ ರೂ.ಗೆ ಹೆಚ್ಚಿಸಿಕೊಂಡಿದ್ದರು. 9ನೇ ಆವೃತ್ತಿಯ ಕಾರ್ಯಕ್ರಮ ನಿರೂಪಣೆಗೆ ಪ್ರತಿ ಎಪಿಸೋಡ್‌ಗೆ 7-8 ಕೋಟಿ ರೂ., 12ನೇ ಆವೃತ್ತಿಗೆ 12-14 ಕೋಟಿ ರೂ., 13ನೇ ಆವೃತ್ತಿಗೆ ಎಲ್ಲ ಎಪಿಸೋಡುಗಳಿಗೆ ಸೇರಿ ಅವರಿಗೆ ಸರಿಸುಮಾರು 403 ಕೋಟಿ ರೂ. ಸಂದಾಯವಾಗಿತ್ತು.

ಕೋವಿಡ್ 19 ಸೋಂಕಿನ ಹಿನ್ನೆಲೆಯಲ್ಲಿ ಆರಂಭಿಕ ಹಂತದ ಚಿತ್ರೀಕರಣ ಇನ್ನಷ್ಟೇ ಶುರುವಾಗಬೇಕಾಗಿದೆ.