ಜೂನಿಯರ್‌ ಸಚಿನ್‌ಗೆ ಕೋವಿಡ್

ಮುಂಬೈ: ಕ್ರಿಕೆಟ್‌ ದೇವರು, ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡುಲ್ಕರ್‌ ಪ್ರತಿರೂಪವಾಗಿರುವ “ಜೂನಿಯರ್‌ ಸಚಿನ್‌’ ಎಂದೇ ಖ್ಯಾತಿ ಪಡೆದಿರುವ ಬಲ್ವಿರ್‌ ಚಂದ್‌ ಜೀವನ ಇದೀಗ ಸಂಕಷ್ಟದಲ್ಲಿದೆ. ಕೋವಿಡ್ ವೈರಸ್‌ ಸಾಂಕ್ರಾಮಿಕ ರೋಗದಿಂದಾಗಿ ವಿವಿಧ ಸಂಸ್ಥೆಗಳು ನಷ್ಟ ಅನುಭವಿಸುತ್ತಿವೆ, ಹೆಚ್ಚಿನವರು ಉದ್ಯೋಗ ಕಳೆದುಕೊಂಡು ಬೀದಿಗೆ ಬಿದ್ದಿದ್ದಾರೆ. ಅಂತೆಯೇ ಬಲ್ವಿರ್‌ ಚಂದ್‌ ಕೂಡ ಈಗ ಉದ್ಯೋಗ ಕಳೆದುಕೊಂಡಿದ್ದಾರೆ. ಬೇರೆ ದಾರಿ ಕಾಣದೆ ತಮ್ಮೂರು ಪಂಜಾಬ್‌ಗ ತೆರಳಿದ್ದಾರೆ. ಈ ನಡುವೆ ಇವರಿಗೆ ಕೋವಿಡ್ ಪಾಸಿಟಿವ್‌ ಬಂದಿದೆ.

“ಮುಂಬೈನ “ಗೋಲಿ ವಡಾ ಪಾವ್‌ ನಂ1′ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದೆ. ಲಾಕ್‌ಡೌನ್‌ನಿಂದಾಗಿ ಸಂಸ್ಥೆ ಸಾಕಷ್ಟು ನಷ್ಟಕ್ಕೆ ಸಿಲುಕಿಕೊಂಡಿತು. ತಕ್ಷಣ ಸಂಸ್ಥೆ ನೌಕರರನ್ನು ಕಿತ್ತು ಹಾಕಿತು, ನನಗೂ ಕಂಪನಿ ಬಿಡುವಂತೆ ಸೂಚಿಸಲಾಯಿತು’ ಎಂದು 50 ವರ್ಷದ ಬಲ್ವಿರ್‌ ಚಂದ್‌ ತಿಳಿಸಿದ್ದಾರೆ. ನೋಡಲು ಕ್ರಿಕೆಟ್‌ ದಿಗ್ಗಜ ಸಚಿನ್‌ ತೆಂಡುಲ್ಕರ್‌ರನ್ನೇ ಹೋಲುವ ಚಂದ್‌ ಹಲವಾರು ಜಾಹೀರಾತು, ಸಿನಿಮಾಗಳಲ್ಲಿ ಸಚಿನ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದನ್ನು ಸ್ಮರಿಸಬಹುದು.