ಆಸ್ಟ್ರೇಲಿಯ ಪ್ರವಾಸಕ್ಕೆ ಭಾರತ ಹಾಕಿ ತಂಡ ಪ್ರಕಟ

ಹೊಸದಿಲ್ಲಿ: ಮೇ 10ರಂದು ಆಸ್ಟ್ರೇಲಿಯ ಪ್ರವಾಸಕ್ಕೆ ಹಾಕಿ ಇಂಡಿಯಾ 18 ಆಟಗಾರರುಳ್ಳ ಭಾರತ ತಂಡವನ್ನು ಪ್ರಕಟಿಸಿದೆ. ಭಾರತದ ಅನುಭವಿ ಆಟಗಾರ ರೂಪಿಂದರ್‌ ಪಾಲ್‌ಸಿಂಗ್‌ ತಂಡಕ್ಕೆ ಮರಳುವಲ್ಲಿ ಯಶಸ್ವಿಯಾಗಿದ್ದಾರೆ.

ಕಳೆದ ವರ್ಷ 18ನೇ ಏಶ್ಯನ್‌ ಗೇಮ್ಸ್‌ನಲ್ಲಿ ಭಾರತ ತಂಡದಲ್ಲಿದ್ದ ರೂಪಿಂದರ್‌ ಹಲವು ಸಮಯಗಳ ಆರೋಗ್ಯ ಸಮಸ್ಯೆಯಿಂದ ಚೇತರಿಸಿಕೊಂಡು ತಂಡಕ್ಕೆ ಮರಳಿದ್ದಾರೆ. ಉಳಿದಂತೆ ಜಸ್‌ಕರಣ್‌ ಸಿಂಗ್‌ ಇದೇ ಮೊದಲ ಬಾರಿಗೆ ತಂಡದಲ್ಲಿ ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ತಂಡವನ್ನು ಮಿಡ್‌ ಫೀಲ್ಡರ್‌ ಮನ್‌ಪ್ರೀತ್‌ ಸಿಂಗ್‌ ಮುನ್ನಡೆಸಲಿದ್ದು, ಉಪನಾಯಕರಾಗಿ ಸುರೇಂದರ್‌ ಕುಮಾರ್‌ ಅವರನ್ನು ಆಯ್ಕೆ ಮಾಡಲಾಗಿದೆ.

ಹಾಕಿ ಸಿರೀಸ್‌ ಫೈನಲ್‌ಗೆ ತಯಾರಿ
ಈ ಪ್ರವಾಸ ಮುಂದಿನ ತಿಂಗಳು ಭುವನೇಶ್ವರದಲ್ಲಿ ನಡೆಯಲಿರುವ ಹಾಕಿ ಸಿರೀಸ್‌ ಫೈನಲ್‌ಗೆ ಒಂದು ತರಬೇತಿಯಾಗಿದೆ. ಇದರೊಂದಿಗೆ ನೂತನ ಕೋಚ್‌ ಆಗಿ ಆಯ್ಕೆಯಾಗಿರುವ ಗ್ರಾಹಂ ರೀಡ್‌ ಅವರಿಗೆ ಭಾರತ ತಂಡದೊಂದಿಗೆ ಮೊದಲ ಪರೀಕ್ಷೆಯಾಗಿದೆ. ಹಾಕಿ ಸಿರೀಸ್‌ ಕೂಟಕ್ಕೆ ಉತ್ತಮ ತಂಡವನ್ನು ಆಯ್ಕೆ ಮಾಡಿಕೊಳ್ಳುವ ದೃಷ್ಟಿಯಿಂದ ಈ ಆಸ್ಟ್ರೇಲಿಯ ಪ್ರವಾಸದಲ್ಲಿ ಭಾರತ ಅನುಭವಿ ಆಟಗಾರರ ಸಾಮರ್ಥ್ಯ ಪರೀಕ್ಷೆಯ ಬದಲಾಗಿ ಯುವ ಆಟಗಾರರನ್ನು ಬಳಸಿಕೊಳ್ಳಲಿದೆ.

ಆಸ್ಟ್ರೇಲಿಯ ಪ್ರವಾಸದಲ್ಲಿ ಭಾರತ 4 ಪಂದ್ಯಗಳನ್ನಾಡಲಿದ್ದು, 2 ಪಂದ್ಯ ಆಸ್ಟ್ರೇಲಿಯ ರಾಷ್ಟ್ರೀಯ ತಂಡದ ವಿರುದ್ಧವಾಗಿದೆ. ಉಳಿದೆರಡು ಪಂದ್ಯಗಳು ಆಸ್ಟ್ರೇಲಿಯ “ಎ’ ಮತ್ತು ವೆಸ್ಟರ್ನ್ ಆಸ್ಟ್ರೇಲಿಯ ತಂಡಗಳ ವಿರುದ್ಧ ನಡೆಯಲಿದೆ.