Advertisement
ಈ ಪಂದ್ಯದಲ್ಲೂ ಭಾರತಕ್ಕೆ ಟೀಮ್‌ ಕಾಂಬಿನೇಶನ್‌ ತುಸು ಜಟಿಲವಾಗಿ ಗೋಚರಿಸಿದೆ. ಇಲ್ಲಿ 2 ಬದಲಾವಣೆಯಂತೂ ಅನಿವಾರ್ಯ. ಒಂದು, ರೋಹಿತ್ ಒಳಬರುವುದು; ಇನ್ನೊಂದು, ಉಮೇಶ್‌ ಯಾದವ್‌ ಸ್ಥಾನಕ್ಕೆ ಯಾರನ್ನು ಸೇರ್ಪಡೆಗೊಳಿಸುವುದು ಎಂಬುದು.
Related Articles
Advertisement
ಆದರೆ ಅನುಭವದ ದೃಷ್ಟಿಯಲ್ಲಿ ರೋಹಿತ್ ಆಗಮನ ತಂಡದ ಆತ್ಮಸ್ಥೈರ್ಯ ಹೆಚ್ಚಿಸುವುದಂತೂ ನಿಜ. ಒಮ್ಮೆ ಕ್ರೀಸ್‌ ಆಕ್ರಮಿಸಿಕೊಂಡರೆಂದರೆ ಮತ್ತೆ ರೋಹಿತ್ ಅವರನ್ನು ತಡೆಯುವುದು ಕಷ್ಟ. ಆಕಸ್ಮಾತ್‌ ರೋಹಿತ್ ಶರ್ಮ ಅವರನ್ನು ಮಧ್ಯಮ ಕ್ರಮಾಂಕದಲ್ಲಿ ಆಡಿಸುವುದಾದರೆ ಹನುಮ ವಿಹಾರಿ ಹೊರಗುಳಿಯಬೇಕಾಗುತ್ತದೆ. ಆದರೆ ಈ ಸಾಧ್ಯತೆ ಕಡಿಮೆ.
ಸಿಡ್ನಿಯಲ್ಲಿ ಭಾರತ ಗೆಲ್ಲದೆ 4 ದಶಕಗಳೇ ಉರುಳಿವೆ!
ಭಾರತ ಸಿಡ್ನಿ ಕ್ರಿಕೆಟ್‌ ಗ್ರೌಂಡ್‌ನ‌ಲ್ಲಿ 1947ರಿಂದ ಮೊದಲ್ಗೊಂಡು ಈವರೆಗೆ 12 ಟೆಸ್ಟ್‌ ಪಂದ್ಯಗಳನ್ನಾಡಿದೆ. ಜಯಿಸಿದ್ದು ಒಂದರಲ್ಲಿ ಮಾತ್ರ. ಉಳಿದಂತೆ ಐದರಲ್ಲಿ ಸೋಲನುಭವಿಸಿದರೆ, 6 ಪಂದ್ಯಗಳನ್ನು ಡ್ರಾ ಮಾಡಿಕೊಂಡಿದೆ. ಏಕೈಕ ಗೆಲುವು ಒಲಿದದ್ದು 1978ರಷ್ಟು ಹಿಂದೆ. ಅದು ಭಾರತದ ಸ್ಪಿನ್‌ ಮಾಂತ್ರಿಕರ ಮೆರೆದಾಟದ ಸಂಧ್ಯಾಕಾಲವಾಗಿತ್ತು. ಬಿಷನ್‌ ಸಿಂಗ್‌ ಬೇಡಿ ನಾಯಕರಾಗಿದ್ದರು. ಬಿ.ಎಸ್‌. ಚಂದ್ರಶೇಖರ್‌, ಇ.ಎ.ಎಸ್‌. ಪ್ರಸನ್ನ ಕೂಡ ತಂಡದಲ್ಲಿದ್ದರು. ಅಂದು ಸಿಡ್ನಿಯಲ್ಲಿ ನಡೆದ 4ನೇ ಟೆಸ್ಟ್‌ ಪಂದ್ಯವನ್ನು ಭಾರತ ಇನ್ನಿಂಗ್ಸ್‌ ಹಾಗೂ 2 ರನ್‌ ಅಂತರದಿಂದ ಗೆದ್ದಿತ್ತು. ಸರಣಿ 2-2 ಸಮಬಲಕ್ಕೆ ಬಂದಿತ್ತು.
ಬಾಬ್‌ ಸಿಂಪ್ಟನ್‌ ನಾಯಕತ್ವದ ಆಸ್ಟ್ರೇಲಿಯ, ಚಂದ್ರು (30ಕ್ಕೆ 4), ಬೇಡಿ (49ಕ್ಕೆ 3) ದಾಳಿಗೆ ಸಿಲುಕಿ ಮೊದಲ ಸರದಿಯಲ್ಲಿ 131ಕ್ಕೆ ಕುಸಿಯಿತು. ಜವಾಬಿತ್ತ ಭಾರತ 8ಕ್ಕೆ 396 ರನ್‌ ಬಾರಿಸಿ ಡಿಕ್ಲೇರ್‌ ಮಾಡಿತು. ವಿಶ್ವನಾಥ್‌ 79, ಕರ್ಸನ್‌ ಘಾವ್ರಿ 64, ಗಾವಸ್ಕರ್‌ 49, ವೆಂಗ್‌ಸರ್ಕಾರ್‌ 49, ಚೇತನ್‌ ಚೌಹಾಣ್‌ 42, ಸಯ್ಯದ್‌ ಕಿರ್ಮಾನಿ 42 ರನ್‌ ಹೊಡೆದು ಇನ್ನಿಂಗ್ಸ್‌ ಬೆಳೆಸಿದ್ದರು. 265 ರನ್ನುಗಳ ಭಾರೀ ಹಿನ್ನಡೆಗೆ ಸಿಲುಕಿದ ಆಸ್ಟ್ರೇಲಿಯಕ್ಕೆ ಸ್ಪಿನ್‌ ತ್ರಿವಳಿಗಳು ಸಿಂಹಸ್ವಪ್ನರಾದರು. ಬೇಡಿ, ಚಂದ್ರು, ಪ್ರಸನ್ನ ಸೇರಿ 8 ವಿಕೆಟ್‌ ಉಡಾಯಿಸಿದರು. ಆಸೀಸ್‌ 263ರ ತನಕ ಬಂದು ಇನ್ನಿಂಗ್ಸ್‌ ಸೋಲಿಗೆ ಸಿಲುಕಿತು.
ಇದನ್ನೂ ಓದಿ: ದೆಹಲಿ ಟ್ರ್ಯಾಕ್ಟರ್ ಜಾಥಕ್ಕೆ ಕುಟುಂಬದ ಸದಸ್ಯರೊಬ್ಬರನ್ನು ಕಳುಹಿಸಿ: ರೈತ ಮುಖಂಡರ ಒತ್ತಾಯ