ಸಿಡ್ನಿ: ಭಾರತ-ಆಸ್ಟ್ರೇಲಿಯ ನಡುವಿನ “ಬೋರ್ಡರ್‌-ಗಾವಸ್ಕರ್‌ ಟ್ರೋಫಿ’ ಸರಣಿಯ ಪಿಚ್‌ಗಳ ಐಸಿಸಿ ರೇಟಿಂಗ್‌ ಪ್ರಕಟ ಗೊಂಡಿದೆ. ಸಿಡ್ನಿ ಪಿಚ್‌ಗೆ ಮಾತ್ರ “ತೃಪ್ತಿ ದಾಯಕ’ ಮುದ್ರೆ ನೀಡಲಾಗಿದ್ದು, ಉಳಿ ದಂತೆ ಮೊದಲ 4 ಅಂಗಳಗಳಿಗೆ “ಅತ್ಯುತ್ತಮ’ ರೇಟಿಂಗ್‌ ಲಭಿಸಿದೆ.
ಮೊದಲ 4 ಟೆಸ್ಟ್‌ ಪಂದ್ಯಗಳನ್ನು ಆಯೋಜಿಸಿದ ಪರ್ತ್‌, ಅಡಿಲೇಡ್‌ ಓವಲ್‌, ಗಾಬಾ ಮತ್ತು ಎಂಸಿಜಿಯ ಪಿಚ್‌ಗಳು ವೆರಿ ಗುಡ್‌ ರೇಟಿಂಗ್‌ ಪಡೆದಿವೆ. ಆದರೆ ಅಂತಿಮ ಟೆಸ್ಟ್‌ನ ಸಿಡ್ನಿ ಪಿಚ್‌ಗೆ ತೃಪ್ತಿಕರ ರೇಟಿಂಗ್‌ ನೀಡಲಾಗಿದೆ ಎಂದು ಐಸಿಸಿ ತನ್ನ ಪ್ರಕಟನೆಯಲ್ಲಿ ತಿಳಿಸಿದೆ.
ಸಾಂಪ್ರದಾಯಿಕವಾಗಿ ಸಿಡ್ನಿ ಟ್ರ್ಯಾಕ್‌ ಸ್ಪಿನ್‌ ಸ್ನೇಹಿ ಹಾಗೂ ಬ್ಯಾಟಿಂಗ್‌ ಫ್ರೆಂಡ್ಲಿ ಆಗಿರುತ್ತದೆ. ಆದರೆ ಈ ಬಾರಿ ಅನಿರೀಕ್ಷಿತವಾಗಿ ವರ್ತಿಸಿ ವೇಗಿಗಳಿಗೆ ಹೆಚ್ಚಿನ ಸಹಕಾರ ನೀಡಿತು. ಪಂದ್ಯ ಎರಡೂವರೆ ದಿನದಲ್ಲಿ ಮುಗಿಯಿತು. ಇದಕ್ಕೆ ಮಾಜಿಗಳಾದ ಸುನೀಲ್‌ ಗಾವಸ್ಕರ್‌, ಜಸ್ಟಿನ್‌ ಲ್ಯಾಂಗರ್‌ ಮೊದಲಾವದರು ಅಚ್ಚರಿ ವ್ಯಕ್ತಪಡಿಸಿದ್ದರು.
ಆಸ್ಟ್ರೇಲಿಯದ ಬ್ಯಾಟರ್‌ ಸ್ಟೀವನ್‌ ಸ್ಮಿತ್‌ ಕೂಡ ಸಿಡ್ನಿ ಪಿಚ್‌ ವರ್ತನೆಗೆ ಆಶ್ಚರ್ಯ ವ್ಯಕ್ತಪಡಿಸಿದ್ದರು. “ಸಿಡ್ನಿ ಪಿಚ್‌ನಲ್ಲಿ ನನ್ನನ್ನು ಸರಪಣಿಯಿಂದ ಕಟ್ಟಿಹಾಕಿದಂತಾಯಿತು. ಚೆಂಡು ಅನಿರೀಕ್ಷಿತ ಬೌನ್ಸ್‌ ಆಗುತ್ತಿತ್ತು. ನಾನು ಅಪಾಯಕಾರಿ ಎಸೆತವೊಂದರಲ್ಲಿ ಔಟ್‌ ಆದೆ’ ಎಂದಿದ್ದರು.
ಸಿಡ್ನಿ ಪಂದ್ಯದ ಮೊದಲೆರಡು ದಿನ 26 ವಿಕೆಟ್‌ಗಳು ಉದುರಿದ್ದವು. 1,141 ಎಸೆತಗಳಲ್ಲಿ ಪಂದ್ಯ ಮುಗಿದು ಹೋಯಿತು. ಆದರೆ ಇದೇನೂ ಸಿಡ್ನಿ ಅಂಗಳದ ಕಳಪೆ ದಾಖಲೆಯಲ್ಲ. 1985ರ ಆ್ಯಶಸ್‌ ಪಂದ್ಯ ಕೇವಲ 911 ಎಸೆತಗಳಲ್ಲಿ ಮುಗಿದ ದಾಖಲೆ ಇದೆ. 1888ರ ಆಸ್ಟ್ರೇಲಿಯ-ಇಂಗ್ಲೆಂಡ್‌ ಟೆಸ್ಟ್‌ 1,129 ಎಸೆತಗಳಲ್ಲಿ, 1931ರ ಆಸ್ಟ್ರೇಲಿಯ-ವೆಸ್ಟ್‌ ಇಂಡೀಸ್‌ ಟೆಸ್ಟ್‌ 1,184 ಎಸೆತಗಳಲ್ಲಿ ಕೊನೆಗೊಂಡಿತ್ತು.
ವಿಶಿಷ್ಟ ಗುಣಲಕ್ಷಣ
“ಈ ಸ್ಥಳದ ವಿಶಿಷ್ಟ ಗುಣಲಕ್ಷಣಗಳನ್ನು ಹೊಂದಿರುವ ಪಿಚ್‌ ನಿರ್ಮಾಣಕ್ಕೆ ನಾವು ಆದ್ಯತೆ ನೀಡುತ್ತೇವೆ. ಇದು ಆಸ್ಟ್ರೇಲಿಯನ್‌ ಕ್ರಿಕೆಟ್‌ನ ವೈಶಿಷ್ಟéವಾಗಿದೆ’ ಎಂಬುದಾಗಿ ಕ್ರಿಕೆಟ್‌ ಆಸ್ಟ್ರೇಲಿಯ ಪ್ರತಿಕ್ರಿಯಿಸಿದೆ.
