Kaatera; ಬರಹಗಾರರಿಗೆ ರಾಕ್‌ಲೈನ್‌ ಕಾರು ಗಿಫ್ಟ್

ಸಿನಿಮಾ ಸೂಪರ್‌ ಹಿಟ್‌ ಆದಾಗ ಆ ಚಿತ್ರತಂಡದ ಕೆಲವರಿಗೆ ಕಾರು ಗಿಫ್ಟ್ ನೀಡಿರುವ ಸುದ್ದಿಗಳು ಪರಭಾಷಾ ಚಿತ್ರರಂಗದಿಂದ ಆಗಾಗ ಕೇಳಿಬರುತ್ತಿರುತ್ತವೆ. ಈಗ ಕನ್ನಡದ ನಿರ್ಮಾಪಕರೊಬ್ಬರು ಸಿನಿಮಾ ದೊಡ್ಡ ಹಿಟ್‌ ಆದ ಖುಷಿಯಲ್ಲಿ ಚಿತ್ರದ ಬರಹಗಾರರಿಗೆ ಹಾಗೂ ನಟರೊಬ್ಬರಿಗೆ ಕಾರು ಗಿಫ್ಟ್ ಮಾಡಿದ್ದಾರೆ. ಅವರೇ ರಾಕ್‌ಲೈನ್‌ ವೆಂಕಟೇಶ್‌.

ಹೌದು, ರಾಕ್‌ಲೈನ್‌ ಅವರು ಕಾರು ಗಿಫ್ಟ್ ಮಾಡಲು ಕಾರಣವಾಗಿದ್ದು “ಕಾಟೇರ’ ಚಿತ್ರ. ಕಳೆದ ವರ್ಷದ ಕೊನೆಯಲ್ಲಿ ಬಿಡುಗಡೆಯಾದ ದರ್ಶನ್‌ ನಟನೆಯ “ಕಾಟೇರ’ ಚಿತ್ರ ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿತ್ತು. ಈ ಮೂಲಕ ಇಡೀ ಚಿತ್ರರಂಗದ ಜೋಶ್‌ ಹೆಚ್ಚಿಸಿತ್ತು. ಈಗ ರಾಕ್‌ಲೈನ್‌ ವೆಂಕಟೇಶ್‌ ಚಿತ್ರದ ಕಥೆ ಬರೆದ ಜಡೇಶ್‌ ಕುಮಾರ್‌, ಸಂಭಾಷಣೆ ಬರೆದ ಮಾಸ್ತಿ ಹಾಗೂ ಚಿತ್ರದಲ್ಲಿ ನಟಿಸಿರುವ ಸೂರಜ್‌ ಅವರಿಗೆ ಹೊಸ ಸ್ವಿಫ್ಟ್ ಕಾರನ್ನು ಉಡುಗೊರೆ ಯಾಗಿ ನೀಡಿದ್ದಾರೆ.

ಗುರುವಾರ ಸಂಜೆ ನಟ ದರ್ಶನ್‌ ಹಾಗೂ ಚಿತ್ರ ತಂಡದ ಸಮ್ಮುಖದಲ್ಲಿ ಕಾರು ಗಿಫ್ಟ್ ಮಾಡಿದ್ದಾರೆ. ದರ್ಶನ್‌ ಹೊಸ ಕಾರನ್ನು ಸ್ಟಾರ್ಟ್‌ ಮಾಡಿ, ಶುಭ ಹಾರೈಸಿದರು. ಅಂದಹಾಗೆ, “ಕಾಟೇರ’ ಚಿತ್ರವನ್ನು ತರುಣ್‌ ಸುಧೀರ್‌ ನಿರ್ದೇಶನ ಮಾಡಿದ್ದಾರೆ.