ನಿವೃತ್ತ HC ನ್ಯಾಯಾಧೀಶ ಆಸೀಮ್‌ ಕುಮಾರ್‌ ರಾಯ್‌ ಪ.ಬಂಗಾಲ ಲೋಕಾಯುಕ್ತ

ಕೋಲ್ಕತ : ಕಲ್ಕತ್ತ ಹೈಕೋರ್ಟಿನ ನಿವೃತ್ತ ನ್ಯಾಯಾಧೀಶ ಆಸೀಮ್‌ ಕುಮಾರ್‌ ರಾಯ್‌ ಅವರನ್ನು ಇಂದು ಶುಕ್ರವಾರ ಪಶ್ಚಿಮ ಬಂಗಾಲದ ಲೋಕಾಯುಕ್ತರನ್ನಾಗಿ ನೇಮಿಸಲಾಗಿದೆ.

ರಾಯ್‌ ಅವರು ಮೂರು ವರ್ಷಗಳ ಅವಧಿಗೆ ಲೋಕಾಯುಕ್ತ ಹುದ್ದೆಯನ್ನು ನಿರ್ವಹಿಸಲಿದ್ದಾರೆ. ಇವರು ರಾಜ್ಯದ ಎರಡನೇ ಲೋಕಾಯುಕ್ತರಾಗಿದ್ದಾರೆ. ಮೊದಲ ಲೋಕಾಯುಕ್ತ ಸಮರೀಶ್‌ ಬ್ಯಾನರ್ಜಿ 2006ರಿಂದ 2009ರ ವರೆಗಿನ ಅವಧಿಯಲ್ಲಿ ಕಾರ್ಯಭಾರ ನಿರ್ವಹಿಸಿದ್ದರು. ಅಲ್ಲಿಂದ ಈ ವರೆಗೂ ಲೋಕಾಯುಕ್ತ ಹುದ್ದೆ ಖಾಲಿ ಬಿದ್ದಿತ್ತು. 

ಸ್ಪೀಕರ್‌ ಬಿಮಾನ್‌ ಬ್ಯಾನರ್ಜಿ ಮತ್ತು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರ ಉಪಸ್ಥಿತಿಯಲ್ಲಿ ಇಂದು ನಡೆದಿದ್ದ ಅಸೆಂಬ್ಲಿ ಸಭೆಯಲ್ಲಿ ರಾಯ್‌ ಅವರನ್ನು ಮುಂದಿನ ಲೋಕಾಯುಕ್ತರನ್ನಾಗಿ ನೇಮಿಸುವ ನಿರ್ಧಾರವನ್ನು ಕೈಗೊಳ್ಳಲಾಯಿತು. 

ಪಶ್ಚಿಮ ಬಂಗಾಲ ವಿಧಾನಸಭೆಯು ಈ ವರ್ಷ ಜುಲೈಯಲ್ಲಿ 2018ರ ಲೋಕಾಯುಕ್ತ ತಿದ್ದುಪಡಿ ಮಸೂದೆಯನ್ನು ಅಂಗೀಕರಿಸಿದ್ದು ಸಾರ್ವಜನಿಕ ಶಿಸ್ತಿಗೆ ಸಂಬಂಧಿಸಿದ ವಿಷಯಗಳಲ್ಲಿ ಮುಖ್ಯಮಂತ್ರಿಯನ್ನು ಲೋಕಾಯುಕ್ತ ವ್ಯಾಪ್ತಿಯಿಂದ ಹೊರಗಿಡಲಾಗಿದೆ.