ರೈತ ಅನುವುಗಾರರ ನೇಮಕಕ್ಕೆ ಮನವಿ

ಜೇವರ್ಗಿ: ರೈತ ಅನುವುಗಾರರನ್ನು ಕೃಷಿ ಇಲಾಖೆಯಲ್ಲಿ ನೇಮಕ ಮಾಡಿಕೊಳ್ಳಲು ಆಗ್ರಹಿಸಿ ಮಂಗಳವಾರ ಕರ್ನಾಟಕ ರಾಜ್ಯ ರೈತ ಅನುವುಗಾರರ ಸಂಘ ತಾಲೂಕು ಘಟಕದ ವತಿಯಿಂದ ತಹಶೀಲ್ದಾರ್‌ ಸಿದರಾಯ ಭೋಸಗಿ ಹಾಗೂ ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಸುನೀಲಕುಮಾರ ಜವಳಗಿ ಮೂಲಕ ಮುಖ್ಯಮಂತ್ರಿ ಹಾಗೂ ಕೃಷಿ ಸಚಿವರಿಗೆ ಮನವಿ ಪತ್ರ ಸಲ್ಲಿಸಲಾಯಿತು.

ಕೃಷಿ ಇಲಾಖೆಯಲ್ಲಿ ಕಳೆದ 10-12 ವರ್ಷಗಳಿಂದ ರೈತ ಅನುವುಗಾರರು ಭೂ ಚೇತನ ಯೋಜನೆ, ರೈತ ಕ್ಷೇತ್ರ ಪಾಠ ಶಾಲೆ, ಮಣ್ಣು ಪರೀಕ್ಷೆ, ಬೆಳೆ ಸಮೀಕ್ಷೆ, ಬೆಳೆ ಕಟಾವು ಸಮೀಕ್ಷೆ, ರೈತ ಸಂಪರ್ಕ ಕೇಂದ್ರದಲ್ಲಿ ಬೀಜ ವಿತರಣೆ ಹಾಗೂ ಇಲಾಖೆಯಲ್ಲಿನ ವಿವಿಧ ಪರಿಕರಗಳ ಮಾಹಿತಿಗಳನ್ನು ರೈತರ ಮನೆ ಬಾಗಿಲಿಗೆ ಹೋಗಿ ನೀಡಲಾಗುತ್ತಿದೆ. ಕಾರಣ ಈಗ ಕೃಷಿ ಇಲಾಖೆಯಲ್ಲಿ ಹೊಸದಾಗಿ ರೈತ ಮಿತ್ರ ಎಂದು ನಾಮಕರಣ ಮಾಡಿ ಇಲಾಖೆಯು ಹೊಸ ಪ್ರಕ್ರಿಯೆ ನಡೆಸುತ್ತಿದ್ದು, ರೈತ ಮಿತ್ರ ನೇಮಕಾತಿಗೆ ಕೃಷಿ ಡಿಪ್ಲೋಮಾ ವಿದ್ಯಾರ್ಥಿಗಳನ್ನು ನೇಮಕ ಮಾಡಿಕೊಳ್ಳಲು ಸರ್ಕಾರ ಚಿಂತನೆ ನಡೆಸಿದೆ.  ಇದರಿಂದ ರೈತ ಅನುವುಗಾರರ ಕುಟುಂಬ ಬೀದಿಗೆ ಬರಬೇಕಾಗುತ್ತದೆ ಎಂದು ಮನವಿಯಲ್ಲಿ ತಿಳಿಸಲಾಗಿದೆ. ಈ ಪದ್ಧತಿ ಕೈಬಿಟ್ಟು ಕಳೆದ 10-12 ವರ್ಷಗಳಿಂದ ಅನುಭವ ಹೊಂದಿರುವ ಹಾಗೂ ಪ್ರತಿ ವರ್ಷ ಕೃಷಿಗೆ ಸಂಬಂಧಿ ಸಿದ ತರಬೇತಿ ಪಡೆದ ಅನುವುಗಾರರನ್ನು ನೇಮಕ ಮಾಡಬೇಕೆಂದು ಮನವಿ ಮಾಡಲಾಗಿದೆ.

ರೈತ ಅನುವುಗಾರರಾದ ದೇವಿಂದ್ರ ಬನ್ನೆಟ್ಟಿ, ಸೈದಪ್ಪ ಗುತ್ತೇದಾರ, ಸಿದ್ರಾಮಪ್ಪ ಪೂಜಾರಿ ಹಾಲಗಡ್ಲಾ, ಮಲ್ಲಣ್ಣ ಮ್ಯಾಗೇರಿ ನರಿಬೋಳ, ದೇವಿಂದ್ರ ಗಜಾಕೋಶ, ಸಂತೋಷ ಹಾಲಕಾಯಿ, ಹುಸೇನಿಬಾಷಾ ಕಣ್ಣಿ, ಸಾಯಬಣ್ಣ ಹೊನ್ನಾಳಿ ಮತ್ತಿತರರು ಇದ್ದರು.