ಪುನರ್ವಸು ಮಳೆ ಅವಾಂತರ: 18 ಲಕ್ಷ ರೂ. ಸೊತ್ತು ಹಾನಿ

ಕಾಪು : ಪುನರ್ವಸು ಮಳೆ, ನೆರೆಯಿಂದಾಗಿ ಕಾಪು ತಾಲೂಕಿನಲ್ಲಿ ಎರಡು ದಿನಗಳಲ್ಲಿ 18 ಲಕ್ಷ ರೂ. ಸೊತ್ತು ಹಾನಿ ಉಂಟಾಗಿದೆ. ನೂರಾರು ಎಕರೆ ಕೃಷಿ ಭೂಮಿ ನಾಲ್ಕನೇ ದಿನವೂ ಮುಳುಗಿಯೇ ಇದ್ದು, ಕಾಪು ತಾಲೂಕಿನಾದ್ಯಂತ ಅಪಾರ ಕೃಷಿ ಹಾನಿಯ ಭೀತಿ ಸೃಷ್ಟಿಸಿದೆ.
ಕಾಪು ಪುರಸಭೆ ವ್ಯಾಪ್ತಿಯ ಕಾಪು, ಉಳಿಯಾರಗೋಳಿ, ಮಲ್ಲಾರು, ಮಜೂರು, ಬೆಳಪು, ಎಲ್ಲೂರು, ಬಡಾ, ತೆಂಕ, ಇನ್ನಂಜೆ, ಕುತ್ಯಾರು, ಕಟಪಾಡಿ, ಕೋಟೆ, ಮಣಿಪುರ, ಉದ್ಯಾವರ, ಕುರ್ಕಾಲು, ಶಿರ್ವ, ಬೆಳ್ಳೆ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಪ್ರದೇಶವೆಲ್ಲ ಜಲಾವೃತಗೊಂಡು ಕೃಷಿ ಭೂಮಿಗೆ ಅಪಾರ ಹಾನಿಯುಂಟಾಗಿದೆ.

2 ದಿನ;18 ಲಕ್ಷ ರೂ. ಹಾನಿ
ಎರಡು ದಿನಗಳ ಕಾಲ ಸುರಿದ ಮಳೆಯಿಂದಾಗಿ ಕಾಪು ತಾಲೂಕಿನ ನೂರಾರು ಮನೆಗಳು ಜಲಾವೃತ ಗೊಂಡು, 400ಕ್ಕೂ ಅಧಿಕ ಮಂದಿ ಯನ್ನು ರಕ್ಷಿಸಲಾಗಿತ್ತು. ರಸ್ತೆ, ಸೇತುವೆ, ಮನೆಗೆ ಹಾನಿ, ಕಟ್ಟಡ, ಕಾಂಪೌಂಡು ಕುಸಿತ ಸಹಿತ ಸುಮಾರು 18 ಲಕ್ಷ ರೂ. ಮೊತ್ತದ ಸೊತ್ತು ನಷ್ಟ ಉಂಟಾಗಿದೆ. ಇದಕ್ಕಿಂತಲೂ ಹೆಚ್ಚಿನ ಹಾನಿ ಸಂಭವಿಸಿರುವ ಸಾಧ್ಯತೆಗಳಿವೆ.

ನೀರು ಇಳಿದಿಲ್ಲ
ಪಡು, ಕೈಪುಂಜಾಲು, ಮಟ್ಟು ಹಾಗೂ ಹೊಳೆ ತೀರದ ಪ್ರದೇಶ ಗಳಾದ ಪಾಂಗಾಳ, ಮಡುಂಬು, ಇನ್ನಂಜೆ, ಬಂಟಕಲ್ಲು, ಮಣಿಪುರ, ದೆಂದೂರು ಕಟ್ಟೆ, ಮಲ್ಲಾರು, ಮಜೂರು, ಕರಂದಾಡಿ, ಜಲಂಚಾರು, ಕಳತ್ತೂರು, ಕುತ್ಯಾರು, ಬೆಳಪು, ಪಣಿಯೂರು, ಕುಂಜೂರು, ಅದಮಾರು, ಉಚ್ಚಿಲ, ಎರ್ಮಾಳು ಸಹಿತ ಹಲವೆಡೆ ನೆರೆ ಇಳಿದಿದೆ. ಆದರೆ ಈ ಪ್ರದೇಶಗಳಲ್ಲಿ ನಾಟಿ ಮಾಡಲಾದ ನೇಜಿ ಮಾತ್ರ ಮುಳುಗಿದ ಸ್ಥಿತಿಯಲ್ಲಿಯೇ ಇದೆ.