ಒಟಿಟಿ 250 ಕೋಟಿ ರೂ.ಆಫರ್ ಬದಿಗಿರಿಸಿದ ಕೆಜಿಎಫ್ : ಚಿತ್ರತಂಡದ ಪ್ಲ್ಯಾನ್ ಏನು ?

ಬೆಂಗಳೂರು: ಕೆಜಿಎಫ್ 2 ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. ಬಹುಶಃ ಈ ವರ್ಷದ ಕೊನೆಯಲ್ಲಿ ಬೆಳ್ಳಿ ಪರದೆಗಳ ಮೇಲೆ ರಾಕಿ ಭಾಯ್ ನ ಅಬ್ಬರ ಶುರುವಾಗುವುದು ಪಕ್ಕಾ ಆಗಿದೆ. ಅಭಿಮಾನಿಗಳ ವರ್ಗದಲ್ಲಿ ಸಿಕ್ಕಾಪಟ್ಟೆ ನಿರೀಕ್ಷೆ ಮೂಡಿಸಿರುವ ಈ ಚಿತ್ರದ ಕುರಿತು ಒಂದು ಮಹತ್ವದ ಸುದ್ದಿ ಕೇಳಿ ಬಂದಿದೆ.

ಕೆಜಿಎಫ್-2 ಸಿನಿಮಾ ಬಿಡುಗಡೆಯ ಮುನ್ನವೆ ನಿರ್ಮಾಪಕರ ಜೇಬು ಭರ್ತಿ ಮಾಡುವ ಮುನ್ಸೂಚನೆ ನೀಡಿದೆ. ಯಾಕಂದರೆ ಈ ಚಿತ್ರಕ್ಕೆ ಓಟಿಟಿ ದೊಡ್ಡ ಮೊತ್ತಕ್ಕೆ ಆಫರ್ ಮಾಡಿದೆ. ಮೂಲಗಳ ಪ್ರಕಾರ 250 ಕೋಟಿ ರೂ.ಗಳಿಗೆ ಕೆಜಿಎಫ್ 2 ಸಿನಿಮಾ ಖರೀದಿಸಲು ಒಟಿಟಿ ಮುಂದಾಗಿದೆಯಂತೆ. 100 ಕೋಟಿ ರೂಪಾಯಿ ಬಂಡವಾಳದಲ್ಲಿ ಸಿದ್ಧವಾಗಿರುವ ಈ ಚಿತ್ರಕ್ಕೆ 250 ಕೋಟಿ ರೂ. ಬೇಡಿಕೆ ಬಂದಿರುವುದು ಚಿತ್ರತಂಡಕ್ಕೆ ಖುಷಿ ತಂದಿದೆ. ಆದರೆ, ಚಿತ್ರತಂಡ ಮಾತ್ರ ಈ ಆಫರ್ ನ್ನು ನಯವಾಗಿಯೇ ಪಕ್ಕಕ್ಕೆ ತಳ್ಳಿದೆ.

250 ಕೋಟಿ ರೂ. ಆಫರ್ ಬಂದಿದ್ದರು ಕೂಡ ಚಿತ್ರವನ್ನು ಒಟಿಟಿಗೆ ನೀಡಲು ಚಿತ್ರತಂಡ ಮನಸ್ಸು ಮಾಡಿಲ್ಲವಂತೆ. ಕಷ್ಟಪಟ್ಟು ಮಾಡಿರುವ ಚಿತ್ರವನ್ನು ಚಿತ್ರಮಂದಿರಗಳಲ್ಲಿಯೇ ಬಿಡುಗಡೆ ಮಾಡಬೇಕೆನ್ನುವುದು ನಟ ಯಶ್ ಹಾಗೂ ಚಿತ್ರತಂಡದ ಉದ್ದೇಶವಾಗಿದೆ. ಆದ್ದರಿಂದ ಈ ಬಿಗ್ ಆಪರ್ ನ್ನು ತಿರಸ್ಕರಿಸಲಾಗಿದೆಯಂತೆ.

ರಾಕಿಂಗ್ ಸ್ಟಾರ್ ಯಶ್ ನಟಿಸಿರುವ ಈ ಚಿತ್ರಕ್ಕೆ ಪ್ರಶಾಂತ್ ನೀಲ್ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ನಿರ್ಮಾಪಕ ವಿಜಯ್ ಕಿರಗಂದೂರು ಅವರು ಬಂಡವಾಳ ಹಾಕಿದ್ದಾರೆ. ಬಾಲಿವುಡ್ ನಟ ಸಂಜಯ್ ದತ್ ಸೇರಿದಂತೆ ದೊಡ್ಡ ತಾರಾಬಳಗ ಈ ಚಿತ್ರದಲ್ಲಿದೆ.