ಬೆಳೆ ರಕ್ಷಣೆಗೆ ಹನುಮಾನ್‌ ಚಾಳೀಸಾ: ಬಿಜೆಪಿ ನಾಯಕನ ಸಲಹೆ

ಭೋಪಾಲ್‌ : ಪ್ರಾಕೃತಿಕ ವಿಕೋಪಗಳಿಂದ ಬೆಳೆ ರಕ್ಷಿಸಲು ನಿತ್ಯ ಹನುಮಾನ್‌ ಚಾಳೀಸಾ ಪಠಿಸಿ ಎಂದು ಮಧ್ಯಪ್ರದೇಶ ರೈತರಿಗೆ ಬಿಜೆಪಿ ನಾಯಕ ಹಾಗೂ ಮಾಜಿ ಶಾಸಕ ರಮೇಶ್‌ ಸಕ್ಸೇನಾ ಅವರು ಪುಕ್ಕಟೆ ಸಲಹೆ ನೀಡಿದ್ದಾರೆ.

ಮಧ್ಯಪ್ರದೇಶದ ಸೇಹೋರ್‌ನಲ್ಲಿ ರೈತರನ್ನು ಉದ್ದೇಶಿಸಿ ಭಾಷಣ ಮಾಡಿದ ಸಕ್ಸೇನಾ, ಬೆಳೆ ರಕ್ಷಣೆಗೆ ಮುಂದಿನ ಐದು ದಿನಗಳ ಕಾಲ ಪ್ರತಿ ನಿತ್ಯ ಒಂದು ತಾಸು ಹನುಮಾನ್‌ ಚಾಳೀಸಾ ಪಠಿಸಿ ಎಂದು ರೈತರಿಗೆ ಸಲಹೆ ನೀಡಿದರು. ರೈತರು ಹೀಗೆ ಮಾಡಿದಲ್ಲಿ ಅವರಿಗೆ ನೈಸರ್ಗಿಕ ಪ್ರಕೋಪಗಳ ಬಾಧೆ ಉಂಟಾಗದು ಎಂದು ಹೇಳಿದರು. 

ಸಕ್ಸೇನ ಆವರ ಈ ಮಾತುಗಳನ್ನು ವಿಡಿಯೋದರಲ್ಲಿ ರೆಕಾರ್ಡ್‌ ಮಾಡಲಾಗಿದ್ದು ಅದನ್ನು ಸಾಮಾಜಿಕ ಜಾಲ ತಾಣಕ್ಕೆ ಅಪ್‌ಲೋಡ್‌ ಮಾಡಲಾಗಿದೆ. ಅನೇಕ ಟ್ವಿಟರ್‌ ಬಳಕೆದಾರರು ಸಕ್ಸೇನಾ ಅವರ ಈ ಸಲಹೆ ಹಾಸ್ಯಾಸ್ಪದ ಎಂದು ಟೀಕಿಸಿದ್ದಾರೆ.