ರುಚಿಯಾದ ಕರಿಬೇವು ಚಟ್ನಿ ತಯಾರಿಸುವುದು ಹೇಗೆ    

ಸ್ವಾದಿಷ್ಟ ಆಹಾರ ತಯಾರಿಕೆಯಲ್ಲಿ ಕರಿಬೇವು ಬಹುಮುಖ್ಯ ಪಾತ್ರ ವಹಿಸುತ್ತದೆ. ಒಗ್ಗರಣೆಯಲ್ಲಿ ಕರಿಬೇವು ಎಸಳು ಹಾಕದಿದ್ದರೆ ರುಚಿ ತಪ್ಪುತ್ತದೆ. ಸಾರು, ಪಲ್ಯೆ, ಉಪ್ಪಿಟ್ಟು, ಅವಲಕ್ಕಿ ಹೀಗೆ ಸಸ್ಯಾಹಾರಿ ಹಾಗೂ ಮಾಂಸಾಹಾರಿ ಅಡುಗೆಗೆ ಕರಿಬೇವು ಬೇಕೇ ಬೇಕು. ನಾವು ಹೆಚ್ಚಾಗಿ ಒಗ್ಗರಣೆಯಲ್ಲಿ ಕರಿಬೇವು ಬಳಸುತ್ತೇವೆ. ಆದರೆ, ಕರಿಬೇವು ಸೊಪ್ಪಿನಿಂದ ರುಚಿಕರ, ಸ್ವಾದಿಷ್ಟವಾದ ಚಟ್ನಿಯನ್ನು ತಯಾರಿಸಬಹುದು.

ಬೇಕಾಗುವ ಪದಾರ್ಥ :

ಒಣ ಅಥವಾ ಹುರಿದ ಕರಿಬೇವು ಸೊಪ್ಪು

ಒಂದು ಚಮಚ ಕೆಂಪು ಮೆಣಸಿನ ಪೌಡರ್ ಅಥವಾ ಒಂದೆರಡು ಹಸೆ ಮೆಣಸಿನ ಕಾಯಿ

ಶುಂಠಿ ಚೂರು

ಒಂದೆರಡು ಚಮಚ ಕಡಲೆ ಬೇಳೆ

ಅರ್ಧ ಚಮಚ ಜೀರಿಗೆ

ರುಚಿಗೆ ತಕ್ಕಷ್ಟು ಉಪ್ಪು

ಒಂದು ಚಮಚ ಅಡುಗೆ ಎಣ್ಣೆ

ಹುಣಸೆ ಹಣ್ಣಿನ ಹುಳಿ ಅಥವಾ ಲಿಂಬೆ ರಸ

ಮಾಡುವ ವಿಧಾನ

ಎಣ್ಣೆಯಲ್ಲಿ ಹುರಿದ ಅಥವಾ ಒಣ ಕರಿಬೇವು ಸೊಪ್ಪನ್ನು ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಬೇಕು. ಪಾತ್ರೆಯಲ್ಲಿ ಎಣ್ಣೆ ಹಾಕಿ ಜೀರಿಗೆ ಹಾಕಬೇಕು. ಒಂದು ವೇಳೆ ಹಸೆ ಮೆಣಸಿನ ಕಾಯಿ ಹಾಗೂ ತುರಿದ ಕೊಬ್ಬರೆ ಬಳಸುತ್ತಿದ್ದರೆ ಮೊದಲಿಗೆ ಎಣ್ಣೆಯಲ್ಲಿ ಮೆಣಸಿನ ಕಾಯಿ ಹಾಗೂ ಕಡಲೆ ಬೇಳೆಯನ್ನು ಹುರಿದುಕೊಳ್ಳಬೇಕು. ನಂತರ ಕರಿಬೇವು ಪೇಸ್ಟ್, ಜೀರಿಗೆ, ಶುಂಠಿ, ಹುಣಸೆ ಹುಳಿ, ಸ್ವಲ್ಪ ನೀರು , ರುಚಿಗೆ ತಕ್ಕಷ್ಟು ಉಪ್ಪು ಹಾಕಬೇಕು.

ಹೀಗೆ ತಯಾರಿಸಿದ ಕರಿಬೇವು ಚಟ್ನಿಯನ್ನು ಇಡ್ಲಿ, ದೋಸೆ, ಪೊಂಗಲ್ ಜತೆ ಸೇವಿಸಬಹುದು.