18 ವರ್ಷದ ಉದ್ಯಮಿಯ ನೆರವಿಗೆ ನಿಂತ ರತನ್‌ ಟಾಟಾ

ಮುಂಬೈ: ಯುವ ಉದ್ಯಮಿಗಳನ್ನು ಪ್ರೋತ್ಸಾಹಿಸಬೇಕು ಎಂದು ಎಲ್ಲರೂ ಹೇಳುತ್ತಾರೆ, ಆದರೆ ಮಾಡುವುದಿಲ್ಲ. ಟಾಟಾ ಸಮೂಹದ ಮುಖ್ಯಸ್ಥ ರತನ್‌ ಟಾಟಾ ಇಂತಹ ಕೆಲಸ ಮಾಡುತ್ತ ಯುವಕರನ್ನು ಪ್ರೋತ್ಸಾಹಿಸುತ್ತಲೇ ಇದ್ದಾರೆ. ಇದಕ್ಕೆ ಇನ್ನೊಂದು ಉದಾಹರಣೆ ಈಗ ಸಿಕ್ಕಿದೆ. ಮುಂಬೈ ಮೂಲದ 18 ವರ್ಷದ ಉದ್ಯಮಿ ಅರುಣ್‌ ದೇಶಪಾಂಡೆ ಆರಂಭಿಸಿರುವ, ಜೆನೆರಿಕ್‌ ಆಧಾರ್‌ ಔಷಧ ಕಂಪನಿಯ ಶೇ.50ರಷ್ಟು ಷೇರುಗಳನ್ನು ರತನ್‌ ಖರೀದಿಸಿದ್ದಾರೆ. ಆದರೆ ಇದು ಟಾಟಾ ಕಂಪನಿಯಿಂದ ಮಾಡಿರುವ ಹೂಡಿಕೆಯಲ್ಲ, ಖಾಸಗಿಯಾಗಿ ಟಾಟಾ ಅವರ ಹೂಡಿಕೆಯಿದು. ಎಷ್ಟು ಹಣ ನೀಡಿದ್ದಾರೆ ಎಂಬ ಮಾಹಿತಿ ಇನ್ನೂ ಪ್ರಕಟವಾಗಿಲ್ಲ.

ಜೆನೆರಿಕ್‌ ಆಧಾರ್‌ ಕಡಿಮೆ ಬೆಲೆಗೆ ಔಷಧಗಳನ್ನು ವಿತರಿಸುವ ಮಳಿಗೆಗಳನ್ನು ಹೊಂದಿದೆ. ಈಗ ಮುಂಬೈ, ಬೆಂಗಳೂರು, ಪುಣೆ, ಒಡಿಶಾದ ಈ ಕಂಪನಿಯ ಮಳಿಗೆಗಳಿವೆ. ಮುಂದೆ ಗುಜರಾತ್‌, ಆಂಧ್ರಪ್ರದೇಶ, ತಮಿಳು ನಾಡುಗಳಲ್ಲೂ ಶಾಖೆ ವಿಸ್ತರಿಸಿ, ಒಟ್ಟಾರೆ ಮಳಿಗೆಗಳ  ಸಂಖ್ಯೆಯನ್ನು 1000ಕ್ಕೇರಿಸುವ ಉದ್ದೇಶ ಹೊಂದಿದ್ದಾರೆ. ರತನ್‌ ಟಾಟಾ ಅವರು, ಈ ಹಿಂದೆ ಓಲಾ, ಪೇಟಿಎಂ, ಸ್ನ್ಯಾಪ್‌ಡೀಲ್‌, ಕ್ಯೂರ್‌ಫಿಟ್‌, ಅರ್ಬನ್‌ ಲ್ಯಾಡರ್‌, ಲೆನ್ಸ್‌ಕಾರ್ಟ್‌, ಲಿಬರೇಟ್‌ ಕಂಪನಿಗಳಲ್ಲೂ ಹೂಡಿಕೆ  ಮಾಡಿದ್ದಾರೆ. ಇವೆಲ್ಲ ಯಶಸ್ಸನ್ನು ದಾಖಲಿಸಿವೆಎಂಬುದಿಲ್ಲಿ ಗಮನಾರ್ಹ. ಎರಡು ವರ್ಷಗಳ ಹಿಂದೆ ಅರುಣ್‌ ಆರಂಭಿಸಿರುವ ಜೆನೆರಿಕ್‌ ಆಧಾರ್‌, ಈಗ ವಾರ್ಷಿಕ 6 ಕೋಟಿ ರೂ. ಆದಾಯ ಹೊಂದಿದೆ.