ರಾವ್‌ ಸಹೋದರಿಯರ ಸಂಗೀತ ಕಛೇರಿ

ಮಂಗಳೂರಿನ ಮಾಧುರ್ಯ ಸಂಗೀತ ವಿದ್ಯಾಲಯದ ಅನುಶ್ರೀ ರಾವ್‌ ಹಾಗೂ ಸ್ವಾತಿ ರಾವ್‌ ಸಹೋದರಿಯರಿಂದ ಉಡುಪಿಯಲ್ಲಿ ಇತ್ತೀಚೆಗೆ ಸಂಗೀತ ಕಛೇರಿ ನೀಡಿದರು. ವಿಘ್ನ ವಿನಾಶಕನ ಸ್ತುತಿಯೊಂದಿಗೆ ಕಾರ್ಯಕ್ರಮ ಆರಂಭಿಸಿದ ಸಹೋದರಿಯರು ಜನರನ್ನು ಭಕ್ತಿ ಲೋಕದಲ್ಲಿ ವಿಹರಿಸುವಂತೆ ಮಾಡುವಲ್ಲಿ ಯಶಸ್ವಿಯಾದರು. ಹಲವು ಭಕ್ತಿಗೀತೆಗಳನ್ನು ಸುಶ್ರಾವ್ಯವಾಗಿ ಹಾಡಿ , ಕೆಲವನ್ನು ತಮ್ಮದೇ ಆದ ವೈಶಿಷ್ಟ್ಯವನ್ನು ಅಳವಡಿಸಿ ಪ್ರಸ್ತುತ ಪಡಿಸಿದ ಸೋದರಿಯರು ಹೆಚ್ಚಾಗಿ ದಾಸರ ರಚನೆಯ ಹಾಡುಗಳನ್ನು ಆಯ್ಕೆ ಮಾಡಿ ಹಾಡಿದ್ದು ಔಚಿತ್ಯಪೂರ್ಣವಾಗಿತ್ತು.

ದೊಡ್ಡ ಮಳೂರಿನ ಅಂಬೆಗಾಲು ನವನೀತ ಕೃಷ್ಣನ ಕುರಿತಾಗಿ ಪುರಂದರದಾಸರಿಂದ ರಚಿತಗೊಂಡ “ಜಗದೋದ್ಧಾರನ’ ಹಾಡಿನ ಪ್ರಸ್ತುತಿ ಮಾಧುರ್ಯಪೂರ್ಣವಾಗಿತ್ತು. ಊತುಕ್ಕಾಡು ವೆಂಕಟ ಸುಬ್ಬಯ್ಯರ್‌ ವಿರಚಿತ “ಅಲೈಪಾಯುದೇ ಕಣ್ಣಾ’ ಹಾಗೂ ಭದ್ರಾಚಲ ರಾಮದಾಸ ವಿರಚಿತ “ಪಲುಕೆ ಬಂಗಾರಮಾಯೇನ’ ಪ್ರಸ್ತುತಿಯಲ್ಲಿ ಭಕ್ತಿ ಭಾವಗಳು ಸಮ್ಮಿಳಿತವಾಗಿದ್ದವು. ಕೃಷ್ಣಾವತಾರದ ಕೆಲವು ಲೀಲೆಗಳನ್ನು ನವರತ್ನಗಳಿಗೆ ಹೋಲಿಸಿದ ವರ್ಣನೆಯಿರುವ ಅಣ್ಣಮಾಚಾರ್ಯರ ರಚನೆಯ ಪ್ರಸ್ತುತಿ ಮನೋಜ್ಞವಾಗಿತ್ತು. ವಾದಿರಾಜ ತೀರ್ಥ ವಿರಚಿತ ಹಾಡಿನೊಂದಿಗೆ ಸಂಪನ್ನಗೊಂಡ ಈ ಕಾರ್ಯಕ್ರಮದ ಯಶಸ್ಸಿಗೆ ಶ್ರೀಕಾಂತ್‌ ನಾಯಕ್‌ (ತಬಲಾ),ಧೀರಜ್‌ ರಾವ್‌ (ಕೀಬೋರ್ಡ್‌) ಹಾಗೂ ಉದಯ ಕುಮಾರ್‌ (ರಿದಮ್‌ ಪ್ಯಾಡ್‌) ಸಹಕರಿಸಿದರು.

ಶ್ರವಣ್‌ ಶೆಟ್ಟಿ