Ranji Trophy: ಉ.ಪ್ರದೇಶ ವಿರುದ್ಧ ಬ್ಯಾಟಿಂಗ್- ಬೌಲಿಂಗ್ ನಲ್ಲಿ ಮಿಂಚಿದ ಶಮಿ ಸಹೋದರ ಕೈಫ್

ಕಾನ್ಪುರ: ಇತ್ತೀಚೆಗಷ್ಟೇ ದೇಶಿಯ ಕ್ರಿಕೆಟ್ ಗೆ ಪದಾರ್ಪಣೆ ಮಾಡಿದ್ದ ಭಾರತೀಯ ಬೌಲರ್ ಮೊಹಮ್ಮದ್ ಶಮಿ ಅವರ ಸಹೋದರ ಮೊಹಮ್ಮದ್ ಕೈಫ್ ಇದೀಗ ಬ್ಯಾಟಿಂಗ್ ಮತ್ತು ಬೌಲಿಂಗ್ ನಿಂದ ಮಿಂಚಿದ್ದಾರೆ. ಬಂಗಾಲ ತಂಡವನ್ನು ಪ್ರತಿನಿಧಿಸುವ ಮೊಹಮ್ಮದ್ ಕೈಫ್ ಉತ್ತರ ಪ್ರದೇಶ ವಿರುದ್ಧ ಆಲ್ ರೌಂಡ್ ಪ್ರದರ್ಶನ ನೀಡಿದ್ದಾರೆ.

ಉತ್ತರ ಪ್ರದೇಶ ಮೊದಲ ಇನ್ನಿಂಗ್ಸ್ ನಲ್ಲಿ ಕೇವಲ 60 ರನ್ ಗಳಿಗೆ ಆಲೌಟಾಯಿತು. ಮಾರಕ ಬೌಲಿಂಗ್ ನಡೆಸಿದ ಮೊಹಮ್ಮದ್ ಕೈಫ್ 5.5 ಓವರ್ ಗಳಲ್ಲಿ ಕೇವಲ 14 ರನ್ ನೀಡಿ ನಾಲ್ಕು ವಿಕೆಟ್ ಕಿತ್ತರು.

ಬ್ಯಾಟಿಂಗ್ ನಡೆಸಿದ ಬಂಗಾಲ ತಂಡಕ್ಕೂ ಕೈಫ್ ನೆರವಾದರು. 9ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಗೆ ಆಗಮಿಸದ ಕೈಫ್ ಅಜೇಯ 45 ರನ್ ಮಾಡಿದರು. ಇದೇ ಮೊದಲ ಬಾರಿಗೆ ಪ್ರಥಮ ದರ್ಜೆ ಕ್ರಿಕೆಟ್ ಆಡುತ್ತಿರುವ ಶಮಿ ಸಹೋದರ ಎರಡು ಸಿಕ್ಸರ್ ಸಹಿತ ಅಜೇಯವಾಡಿದರು.

ಸಹೋದರನ ಪ್ರಥಮ ದರ್ಜೆ ಕ್ರಿಕೆಟ್ ಪದಾರ್ಪಣೆ ಬಗ್ಗೆ ಮೊಹಮ್ಮದ್ ಶಮಿ ಕೆಲ ದಿನಗಳ ಹಿಂದೆ ಸಂತಸ ವ್ಯಕ್ತಪಡಿಸಿದ್ದರು. “ದೀರ್ಘ ಹೋರಾಟದ ನಂತರ ನೀನು ಬಂಗಾಳಕ್ಕೆ ರಣಜಿ ಟ್ರೋಫಿ ಕ್ಯಾಪ್ ಅನ್ನು ಪಡೆದುಕೊಂಡಿದ್ದೀರಿ. ಚೀಯರ್ಸ್! ಉತ್ತಮ ಸಾಧನೆ ! ಅಭಿನಂದನೆಗಳು, ನಾನು ನಿಮಗೆ ಉತ್ತಮ ಭವಿಷ್ಯವನ್ನು ಹಾರೈಸುತ್ತೇನೆ! ನಿನ್ನ 100% ನೀಡಿ ಮತ್ತು ಕಠಿಣ ಪರಿಶ್ರಮವನ್ನು ಮುಂದುವರೆಸು” ಎಂದು ಶಮಿ ಸಾಮಾಜಿಕ ಜಾಲತಾಣದಲ್ಲಿ ಬರೆದಿದ್ದರು.