Ranji Trophy: ಕರ್ನಾಟಕಕ್ಕೆ ಮತ್ತೆ ಮಳೆ ಕಾಟ

ಆಲೂರು: ಸತತವಾಗಿ ಸುರಿದ ಭಾರೀ ಮಳೆಯಿಂದಾಗಿ ಕರ್ನಾಟಕ-ಕೇರಳ ನಡುವಿನ ರಣಜಿ ಪಂದ್ಯದ ಅಂತಿಮ ದಿನದಾಟವೂ ರದ್ದುಗೊಂಡಿತು. ಇದರೊಂದಿಗೆ ಪಂದ್ಯ ಡ್ರಾದಲ್ಲಿ ಕೊನೆಗೊಂಡಿತು.

ಇಂದೋರ್‌ನಲ್ಲಿ ನಡೆದ ಕರ್ನಾಟಕ-ಮಧ್ಯಪ್ರದೇಶ ನಡುವಿನ ಮೊದಲ ಪಂದ್ಯವೂ ಮಳೆಯ ಹೊಡೆತಕ್ಕೆ ಸಿಲುಕಿ ಡ್ರಾಗೊಂಡಿತ್ತು. ಕರ್ನಾಟಕವೀಗ ಅಂಕಪಟ್ಟಿಯಲ್ಲಿ 6ನೇ ಸ್ಥಾನದಲ್ಲಿದ್ದು, ನಾಕೌಟ್‌ ಪ್ರವೇಶಕ್ಕೆ ಭಾರೀ ಹೋರಾಟ ನಡೆಸಬೇಕಾದ ಸ್ಥಿತಿಯಲ್ಲಿದೆ.

ಈ ಪಂದ್ಯದಲ್ಲಿ ಮೊದಲ ದಿನ ಕೆಲವು ಓವರ್‌ ಹಾಗೂ ದ್ವಿತೀಯ ದಿನದ ಭೋಜನ ವಿರಾಮ ತನಕ ಸ್ವಲ್ಪ ಹೊತ್ತು ಆಟ ನಡೆದಿತ್ತು. ಅನಂತರದ ಎರಡೂವರೆ ದಿನಗಳ ಆಟ ಸಂಪೂರ್ಣವಾಗಿ ಮಳೆಯಿಂದ ಕೊಚ್ಚಿ ಹೋಯಿತು. ಈ ಸೀಮಿತ ಅವಧಿಯ ಆಟದಲ್ಲಿ ಕೇರಳ 50 ಓವರ್‌ಗಳಲ್ಲಿ 3 ವಿಕೆಟಿಗೆ 161 ರನ್‌ ಮಾಡಿತ್ತು.

ಕರ್ನಾಟಕದ ಮುಂದಿನ ಎದುರಾಳಿ ಬಿಹಾರ. ಈ ಪಂದ್ಯ ಪಾಟ್ನಾದಲ್ಲಿ ನಡೆಯಲಿದೆ (ಅ. 26-29).

ಮಹಾರಾಷ್ಟ್ರವನ್ನು ಮಣಿಸಿದ ಮುಂಬಯಿ
ಮುಂಬಯಿ: ಹಾಲಿ ಚಾಂಪಿಯನ್‌ ಮುಂಬಯಿ ಪ್ರಸಕ್ತ ರಣಜಿ ಋತುವಿನಲ್ಲಿ ಗೆಲುವಿನ ಖಾತೆ ತೆರೆದಿದೆ. ಮಹಾರಾಷ್ಟ್ರವನ್ನು 9 ವಿಕೆಟ್‌ಗಳಿಂದ ಮಣಿಸಿ ಹಳಿಯೇರಿದೆ. ಆರಂಭಿಕ ಪಂದ್ಯದಲ್ಲಿ ಅಜಿಂಕ್ಯ ರಹಾನೆ ಪಡೆ ಬರೋಡಕ್ಕೆ 84 ರನ್ನುಗಳಿಂದ ಶರಣಾಗಿತ್ತು.