ಮುಂಬಯಿಗೆ ಇನ್ನಿಂಗ್ಸ್‌ ಮುನ್ನಡೆ

ಇಂದೋರ್‌: ಆತಿಥೇಯ ಮಧ್ಯಪ್ರದೇಶ ವಿರುದ್ಧದ ರಣಜಿ ಪಂದ್ಯದಲ್ಲಿ ಮುಂಬಯಿ ಇನ್ನಿಂಗ್ಸ್‌ ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಗಿದೆ. ಮಧ್ಯಪ್ರದೇಶದ 409 ರನ್ನಿಗೆ ಉತ್ತರವಾಗಿ 3ನೇ ದಿನದಾಟದ ಕೊನೆಗೆ ಮುಂಬಯಿ 8ಕ್ಕೆ 415 ರನ್‌ ಗಳಿಸಿದೆ.

ಆರಂಭಕಾರ ಜಾಯ್‌ ಬಿಸ್ಟ ಬಾರಿಸಿದ ಅಮೋಘ ಶತಕ (135 ರನ್‌, 140 ಎಸೆತ, 18 ಬೌಂಡರಿ), ಸಿದ್ದೇಶ್‌ ಲಾಡ್‌ (82) ಮತ್ತು ನಾಯಕ ಸೂರ್ಯಕುಮಾರ್‌ ಯಾದವ್‌ (91) ಅವರ ಉಪಯುಕ್ತ ಬ್ಯಾಟಿಂಗ್‌ ಮುಂಬಯಿ ಮುನ್ನಡೆಯಲ್ಲಿ ಪ್ರಮುಖ ಪಾತ್ರ ವಹಿಸಿತು. ಮುಂಬಯಿ ಒಂದಕ್ಕೆ 130 ರನ್‌ ಗಳಿಸಿದ್ದಲ್ಲಿಂದ ದಿನದಾಟ ಮುಂದುವರಿಸಿತ್ತು.

ಮಧ್ಯಪ್ರದೇಶ ಪರ ಅಂಕಿತ್‌ ಶರ್ಮ 108ಕ್ಕೆ 2, ಭಾರತದ ಮಾಜಿ ಸ್ಪಿನ್ನರ್‌ ನರೇಂದ್ರ ಹಿರ್ವಾನಿ ಅವರ ಪುತ್ರ ಮಿಹಿರ್‌ ಹಿರ್ವಾನಿ 95ಕ್ಕೆ 2 ವಿಕೆಟ್‌ ಉರುಳಿಸಿದರು.ಮಂಗಳವಾರ ಅಂತಿಮ ದಿನವಾಗಿದ್ದು, ಪಂದ್ಯ ಡ್ರಾಗೊಳ್ಳುವುದು ಖಚಿತಗೊಂಡಿದೆ.