ನಟಿ ರಮ್ಯಾ ಗೇಲಿಗೆ ಆಕ್ರೋಶದ ತಿರುಗೇಟು

ಹೊಸದಿಲ್ಲಿ: ಪ್ರಧಾನಿ ಮೋದಿ ಬಗ್ಗೆ ಅವಹೇಳನಕಾರಿಯಾಗಿ ಗೇಲಿ ಮಾಡಿರುವ ಕಾಂಗ್ರೆಸ್‌ನ ಸಾಮಾಜಿಕ ಮಾಧ್ಯಮ ವಿಭಾಗದ ಮುಖ್ಯಸ್ಥೆ ರಮ್ಯಾ ದಿವ್ಯಸ್ಪಂದನ ಅವರನ್ನು ಬಿಜೆಪಿ ತರಾಟೆಗೆ ತೆಗೆದುಕೊಂಡಿದೆ. ರಮ್ಯಾ ನಡೆ ದುರಹಂಕಾರದ ಪರಮಾವಧಿ ಎಂದು ಬಣ್ಣಿಸಿದೆ. ಟ್ವೀಟಿಗರಿಂದಲೂ ರಮ್ಯಾ ಟೀಕೆಗೊಳಗಾಗಿದ್ದಾರೆ. ಬುಧವಾರ ಲೋಕಾರ್ಪಣೆಯಾದ ವಲ್ಲಭಭಾಯಿಯವರ ಬೃಹತ್‌ ಪ್ರತಿಮೆಯ ಪಾದದ ಬಳಿ ನಿಂತಿರುವ ಹಿನ್ನೆಲೆಯಲ್ಲಿ ಚಿಕ್ಕದಾಗಿ ಕಾಣುವ ಮೋದಿಯವರನ್ನು ಉದ್ದೇಶಿಸಿ ರಮ್ಯಾ ಅವರು ‘ಇದೇನು ಹಕ್ಕಿಯ ಹಿಕ್ಕೆಯಾ?’ ಎಂದು ಗೇಲಿ ಮಾಡಿದ್ದರು.

ಇದನ್ನು ತೀವ್ರವಾಗಿ ಖಂಡಿಸಿರುವ ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರಾ, “ಇದು ಕಾಂಗ್ರೆಸ್‌ನ ನಿಜವಾದ ಸಂಸ್ಕೃತಿ. ಪ್ರಧಾನಿಯಾದರೂ ಸರಿ, ತನಗಾಗದ ವ್ಯಕ್ತಿಯನ್ನು ಹೀನಾಯವಾಗಿ ಗೇಲಿ ಮಾಡುವ ಯಾವುದೇ ಅವಕಾಶವನ್ನು ಆ ಪಕ್ಷ ಬಿಟ್ಟುಕೊಡುವುದಿಲ್ಲ” ಎಂದಿದ್ದಾರೆ. ಇದೇ ಪಕ್ಷದವರು ಹಿಂದೆ ಮೋದಿಯವರನ್ನು ನೀಚ ಎಂದಿದ್ದರು. ಪ್ರಧಾನಿಯನ್ನು ತರೂರ್‌ ಚೇಳಿಗೆ ಹೋಲಿಸಿದ್ದರು. ಈಗ, ರಮ್ಯಾ ಹಕ್ಕಿಯ ಹಿಕ್ಕೆಗೆ ಹೋಲಿಸಿದ್ದಾರೆ. ಪರಿಶ್ರಮದಿಂದ ಪ್ರಧಾನಿಯಾದವರು ಅವರಿಗೆ ಹಿಕ್ಕೆಯಾಗಿ ಕಾಣುತ್ತಾರೆ, ರಾಜಮನೆತನದ ದುರಹಂಕಾರ ಭಾರತದ ಪ್ರಜಾಪ್ರಭುತ್ವವನ್ನು ಅಣಕಿಸುತ್ತಿದೆ” ಎಂದು ತಿರುಗೇಟು ನೀಡಿದ್ದಾರೆ.