ನಾಳೆಯಿಂದ ಪಾಕ್‌-ವಿಶ್ವ ತಂಡದ ನಡುವೆ “ಪುನರುತ್ಥಾನ ಟಿ20′

ಲಾಹೋರ್‌: ಮಂಗಳವಾರದಿಂದ ಪಾಕಿಸ್ಥಾನದಲ್ಲಿ ವಿಶ್ವ ತಂಡ ಮತ್ತು ಪಾಕಿಸ್ಥಾನ ತಂಡಗಳ ನಡುವೆ ಮೂರು ಪಂದ್ಯಗಳ ಟಿ20 ಸರಣಿ ಆರಂಭವಾಗಲಿದೆ. ಈ ಸರಣಿಯ ಅನಂತರ ಪಾಕಿಸ್ಥಾನದಲ್ಲಿ ಮತ್ತೂಮ್ಮೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವೇದಿಕೆ ನಿರ್ಮಾಣವಾಗಲಿದೆ ಎಂಬ ಆಶಾವಾದವಿದೆ. ಸದ್ಯ ಪಾಕ್‌ನಲ್ಲಿ ಭದ್ರತಾ ಭೀತಿಯಿದ್ದು, ಒಂದು ವೇಳೆ ಈ ವಿಚಾರದಲ್ಲಿ ಪಾಕಿಸ್ಥಾನ ಯಶಸ್ವಿಯಾದರೆ ಮತ್ತೆ ಪಾಕ್‌ ಕ್ರಿಕೆಟ್‌ನಲ್ಲಿ ಬಲಿಷ್ಠವಾಗಬಹುದು. ಮೂರೂ ಪಂದ್ಯಗಳು ಲಾಹೋರ್‌ನ ಗಡ್ಡಾಫಿ ಕ್ರೀಡಾಂಗಣದಲ್ಲಿ ನಡೆಯಲಿವೆ. 

ಕ್ರೀಡಾಂಗಣ 27 ಸಾವಿರ ಪ್ರೇಕ್ಷಕರ ಸಾಮರ್ಥ್ಯವನ್ನು ಹೊಂದಿದೆ. ಬಿಗಿ ಭದ್ರತೆಗೆ 8 ಸಾವಿರಕ್ಕೂ ಅಧಿಕ ಪೊಲೀಸರನ್ನು ಬಳಸಿಕೊಳ್ಳಲಾಗುತ್ತಿದೆ. ಪಂದ್ಯ ನಡೆಯುವ ಸಂದರ್ಭದಲ್ಲಿ ಆಟಗಾರರ ಬಸ್‌ ತೆರಳುವ ರಸ್ತೆಯಲ್ಲಿ ಅಂಗಡಿಗಳನ್ನು ಬಂದ್‌ ಮಾಡಿಸಲಾಗುತ್ತಿದೆ. ಕ್ರೀಡಾಂಗಣದಲ್ಲಿಯೂ ಭಾರೀ ಭದ್ರತೆಗೆ ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ. 2009ರಲ್ಲಿ ಪ್ರವಾಸಿ ಶ್ರೀಲಂಕಾ ಆಟಗಾರರ ಬಸ್‌ ಮೇಲೆ ಭಯೋತ್ಪಾದಕರು ದಾಳಿ ನಡೆಸಿದ್ದರು. ಹಲವು ಆಟಗಾರರು ಗಾಯಗೊಂಡರೆ, ಭದ್ರತಾ ಸಿಬಂದಿ ಸಾವನ್ನಪ್ಪಿದ್ದರು. ಅನಂತರ ಪಾಕ್‌ನಲ್ಲಿ ಕ್ರಿಕೆಟ್‌ ಆಡಲು ಸ್ವತಃ ಐಸಿಸಿಯೇ ನಿರ್ಬಂಧ ಹೇರಿತ್ತು. ಇತರೆ ರಾಷ್ಟ್ರಗಳೂ ಪಾಕ್‌ನಲ್ಲಿ ಆಡಲು ಹಿಂದೇಟು ಹಾಕಿದ್ದವು.