ವರ್ಮಾ ಫ‌ಸ್ಟ್‌ ಲವ್‌ ‘ರಂಗೀಲಾ’ಸಿನಿಮಾ ಆಯ್ತು!

ನಿರ್ದೇಶಕ ರಾಮ್‌ ಗೋಪಾಲ್‌ ವರ್ಮಾ ಇತ್ತೀಚೆಗಂತೂ ಸೋಶಿಯಲ್‌ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಆ್ಯಕ್ಟಿವ್‌ ಆಗಿರುತ್ತಾರೆ. ಒಂದಷ್ಟು ಕಾಂಟ್ರಾವರ್ಸಿ ವಿಷಯ, ವಿಡಿಯೋಗಳನ್ನು ಹಂಚಿಕೊಳ್ಳುತ್ತಾ, ಅರಗಿಸಿಕೊಳ್ಳುತ್ತಾ ಮುಂದೆ ಸಾಗುತ್ತಿದ್ದಾರೆ. ಈಗ ರಾಮ್‌ ಗೋಪಾಲ್‌ ವರ್ಮಾ ಹೊಸ ಟ್ವೀಟ್‌ವೊಂದನ್ನು ಮಾಡಿದ್ದಾರೆ. ಅದು ಅವರ ಮೊದಲ ಕಾಲೇಜು ದಿನಗಳ ಮೊದಲ ಲವ್‌ ಹಾಗೂ ಮುಂದೆ ಅದು “ರಂಗೀಲಾ’ ಸಿನಿಮಾದಕಥೆಗೆ ಪ್ರೇರಣೆಯಾಗಿದ್ದು ಮತ್ತು “ಸತ್ಯ’ ಹಾಗೂ “ಕ್ಷಣ ಕ್ಷಣಂ’ ಸಿನಿಮಾದ ಟೈಟಲ್‌ನವರೆಗೆ ಸಾಗಿಬಂದ ಬಗ್ಗೆ.

ರಾಮ್‌ ಗೋಪಾಲ್‌ ವರ್ಮಾ ವಿಜಯವಾಡದಲ್ಲಿ ಇಂಜಿನಿಯರಿಂಗ್‌ ಓದುವ ಸಮಯದಲ್ಲಿ ಸತ್ಯ ಎನ್ನುವ ಹುಡುಗಿಯನ್ನು ಪ್ರೀತಿಸುತ್ತಿದ್ದರಂತೆ. ಆದರೆ, ಅದು ಒನ್‌ಸೈಡ್‌ ಲವ್‌ಸ್ಟೋರಿ. ವರ್ಮಾ ಪ್ರೀತಿಸುತ್ತಿದ್ದ ಸತ್ಯ, ಇವರ ಪ್ರೀತಿಯನ್ನು ಗಣನೆಗೆ ತೆಗೆದುಕೊಳ್ಳಲಿಲ್ಲವಂತೆ. ಅದಕ್ಕೆ ಕಾರಣ ಆ ಸಮಯದಲ್ಲಿ ಆಕೆ ಸುತ್ತ ಸುತ್ತುತ್ತಿದ್ದ ಮತ್ತೂಬ್ಬ ಶ್ರೀಮಂತ ಹುಡುಗ. ಮುಂದೆ ರಾಮ್‌ ಗೋಪಾಲ್‌ ವರ್ಮಾ “ರಂಗೀಲಾ’ ಸಿನಿಮಾಕ್ಕೆಕಥೆ ಬರೆಯಲು ಇದೇ ಅಂಶ ಸ್ಫೂರ್ತಿಯಾಯಿತಂತೆ.

ವರ್ಮಾ ಅವರ ಒನ್‌ಸೈಡ್‌ ಲವ್‌ನ ಪ್ರೇರಣೆ ಇಷ್ಟಕ್ಕೆ ಮುಗಿಯಲ್ಲ. ಮುಂದೆ ಅವರು ಮಾಡಿದ “ಸತ್ಯ’ ಚಿತ್ರಕ್ಕೆ ಟೈಟಲ್‌ನ್ನಾಗಿಸಿದ್ದು ಕೂಡಾ ಅದೇ ಹುಡುಗಿಯ ಹೆಸರು. ಜೊತೆ “ಕ್ಷಣ ಕ್ಷಣಂ’ ಚಿತ್ರದಲ್ಲಿ ಶ್ರೀದೇವಿ ಪಾತ್ರಕ್ಕೆ ಹೆಸರು ಇಡುವಾಗಲು ಇವರ ಫ‌ಸ್ಟ್‌ಲವ್‌ ನೆನಪಾಗಿ ನಾಯಕಿಯ ಪಾತ್ರಕ್ಕೆ “ಸತ್ಯ’ ಎಂದೇ ಹೆಸರಿಟ್ಟರಂತೆ.

ಅಂದಹಾಗೆ, ಸದ್ಯ ಅವರು ಪ್ರೀತಿಸಿದ ಸತ್ಯ ಅಮೆರಿಕಾದಲ್ಲಿ ವೈದ್ಯೆಯಾಗಿದ್ದಾರೆ. ಅವರು ಬೀಚ್‌ನಲ್ಲಿರುವ ಒಂದಷ್ಟು ಫೋಟೋಗಳನ್ನು ಟ್ವೀಟರ್‌ನಲ್ಲಿ ಶೇರ್‌ ಮಾಡಿರುವ ವರ್ಮಾ, ತಮ್ಮ “ಪ್ರೇರಣಾ’ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ.