Femina Miss India World-2023 ಕಿರೀಟ ಮುಡಿಗೇರಿಸಿಕೊಂಡ ರಾಜಸ್ಥಾನದ Nandini Gupta

ಮಣಿಪುರ: ರಾಜಸ್ಥಾನ ಕೋಟಾದ 19 ವರ್ಷದ ನಂದಿನಿ ಗುಪ್ತಾ ಫೆಮಿನಾ ಮಿಸ್ ಇಂಡಿಯಾ ವರ್ಲ್ಡ್-2023 ಕಿರೀಟ ಮುಡಿಗೇರಿಸಿಕೊಂಡಿದ್ದಾರೆ.

ದೆಹಲಿಯ ಶ್ರೇಯಾ ಪೂಂಜಾ ಮೊದಲ ರನ್ನರ್ ಅಪ್ ಮತ್ತು ಎರಡನೇ ರನ್ನರ್ ಅಪ್ ಕಿರೀಟ ಮಣಿಪುರದ ತೌನೊಜಮ್ ಸ್ಟ್ರೆಲಾ ಲುವಾಂಗ್ ಅವರಿಗೆ ಲಭಿಸಿದೆ.

ಭಾರತದ ಅತ್ಯಂತ ಪ್ರತಿಷ್ಠಿತ ಸೌಂದರ್ಯ ಸ್ಪರ್ಧೆಯ 59 ನೇ ಆವೃತ್ತಿಯಲ್ಲಿ ನಂದಿನಿ ಭಾರತದ ಹೊಸ ಸೌಂದರ್ಯ ರಾಣಿ ಕಿರೀಟವನ್ನು ಪಡೆದರು.

ಕಳೆದ ವರ್ಷ ಮಿಸ್ ಇಂಡಿಯಾ ವರ್ಲ್ಡ್ ಕಿರೀಟ ಕರ್ನಾಟಕದ ಸಿನಿ ಶೆಟ್ಟಿಗೆ ಒಲಿದು ಬಂದಿತ್ತು.

ಮಣಿಪುರದ ಇಂಫಾಲ್‌ನ ಖುಮಾನ್ ಲಂಪಾಕ್‌ನ ಒಳಾಂಗಣ ಕ್ರೀಡಾಂಗಣದಲ್ಲಿ ಸಮಾರಂಭವನ್ನು ಆಯೋಜಿಸಲಾಗಿತ್ತು. ಈ ಕಾರ್ಯಕ್ರಮದಲ್ಲಿ ಹಲವು ಸಿನಿ ಗಣ್ಯರು ಭಾಗವಹಿಸಿದ್ದರು. ಸ್ಪರ್ಧೆಯಲ್ಲಿ 29 ರಾಜ್ಯಗಳ ಸುಂದರಿಯರು ಸ್ಪರ್ಧಿಸಿದ್ದರು.

ತೀರ್ಪುಗಾರರ ಸಮಿತಿಯು ನೇಹಾ ಧೂಪಿಯಾ, ನೃತ್ಯ ನಿರ್ದೇಶಕ ಟೆರೆನ್ಸ್ ಲೂಯಿಸ್, ಚಲನಚಿತ್ರ ನಿರ್ದೇಶಕ ಹರ್ಷವರ್ಧನ್ ಕುಲಕರ್ಣಿ, ಬಾಕ್ಸರ್ ಲೈಶ್ರಾಮ್ ಸರಿತಾ ದೇವಿ ಮತ್ತು ವಿನ್ಯಾಸಕರಾದ ರಾಕಿ ಸ್ಟಾರ್ ಮತ್ತು ನಮ್ರತಾ ಜೋಶಿಪುರ ಅವರನ್ನು ಒಳಗೊಂಡಿತ್ತು.

ನಂದಿನಿ ಗುಪ್ತಾ ವಿಶ್ವ ಸುಂದರಿ ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ. ವಿಶ್ವ ಸುಂದರಿ ಸ್ಪರ್ಧೆಯ 71 ನೇ ಆವೃತ್ತಿಯು ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿ ಈ ವರ್ಷ ನಡೆಯಲಿದೆ.