ಮತ್ತೆ ರಾಜಸ್ಥಾನ್‌ ಕ್ರಿಕೆಟ್‌ ಸಂಸ್ಥೆ ವಿಸರ್ಜನೆ

ಜೈಪುರ: ಕೆಲವೇ ತಿಂಗಳ ಹಿಂದಷ್ಟೇ ಮಾನ್ಯತೆ ಗಳಿಸಿಕೊಂಡಿದ್ದ ರಾಜಸ್ಥಾನ್‌ ಕ್ರಿಕೆಟ್‌ ಸಂಸ್ಥೆಯನ್ನು ವಿಸರ್ಜನೆಗೊಳಿಸಲಾಗಿದೆ.

ಇದರೊಂದಿಗೆ ರಾಜಸ್ಥಾನ ಕ್ರಿಕೆಟಿಗರು ಅತಂತ್ರಕ್ಕೆ ಸಿಲುಕಿದ್ದಾರೆ. ಸಿ.ಪಿ. ಜೋಶಿ ನಾಯಕತ್ವದ ರಾಜಸ್ಥಾನ್‌ ಕ್ರಿಕೆಟ್‌ ಸಂಸ್ಥೆಯಲ್ಲಿ ಕೆಲವು ನಿಯಮ ಬಾಹಿರ ಚಟುವಟಿಕೆಗಳು ನಡೆದಿವೆ ಎಂದು ಸಂಸ್ಥೆಯ ಕಾರ್ಯದರ್ಶಿಯೇ ಸ್ವತಃ ರಿಜಿಸ್ಟ್ರಾರ್‌ ಆಫ್ ಸೊಸೈಟೀಸ್‌ಗೆ ದೂರು ನೀಡಿದ್ದಾರೆ. 

ರಾಜಸ್ಥಾನದ ವಿವಿಧ ಕ್ರೀಡಾಸಂಸ್ಥೆಗಳಲ್ಲಿ ಅಕ್ರಮ ನಡೆದರೆ ಸಂಸ್ಥೆಯನ್ನು ವಿಸರ್ಜನೆ ಮಾಡುವ ಅಧಿಕಾರವನ್ನು ರಿಜಿಸ್ಟ್ರಾರ್‌ ಆಫ್ ಸೊಸೈಟೀಸ್‌ ಹೊಂದಿದೆ. ಇದೇ ಅಧಿಕಾರವನ್ನು ಬಳಸಿಕೊಂಡು ರಾಜಸ್ಥಾನ್‌ ಕ್ರಿಕೆಟ್‌ ಸಂಸ್ಥೆಯನ್ನು ವಿಸರ್ಜಿಸಲಾಗಿದೆ.