ರೈಲಲ್ಲಿ ಊಟಕ್ಕೆ 50, ಬ್ರೇಕ್‌ಫಾಸ್ಟ್‌ಗೆ 30 ರೂ.ಮಾತ್ರ!

ನವದೆಹಲಿ: ಇನ್ನು ಮುಂದೆ ರೈಲುಗಳಲ್ಲಿ ಊಟಕ್ಕೆ 50 ರೂ. ಮತ್ತು ಬೆಳಗ್ಗಿನ ಉಪಾಹಾರಕ್ಕೆ 30 ರೂ. ಕೊಡಿ. ನಿಗದಿತ ದರಕ್ಕಿಂತ ಹೆಚ್ಚಿನ ಮೊತ್ತ ಕೇಳಿದರೆ ದೂರು ಕೊಡಿ. ಹೀಗೆಂದು ರೈಲ್ವೆ  ಖಾತೆ ಮಂಗಳವಾರ ಮನವಿ ಮಾಡಿ ಕೊಂಡಿದೆ. ಜತೆಗೆ ಯಾವ ವಸ್ತುವಿಗೆ ಎಷ್ಟು ದರ ಎಂಬುದನ್ನೂ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿದೆ. ಪ್ರಯಾಣಿಕರ ಸೇವೆಗಾಗಿ ದಿನದ 24 ಗಂಟೆಯೂ ದುಡಿಯುತ್ತೇವೆ ಎಂದು ರೈಲ್ವೆ ಇಲಾಖೆ ಟ್ವೀಟ್‌ನಲ್ಲಿ ತಿಳಿಸಿದೆ. ಐಆರ್‌ಸಿಟಿಸಿ ಜತೆಗೆ ಒಪ್ಪಂದ ಮಾಡಿಕೊಂಡಿರುವ ಖಾಸಗಿ ಸಂಸ್ಥೆಗಳು ನಿಗದಿ ಮಾಡಿರುವ ದರಕ್ಕಿಂತ ಹೆಚ್ಚಿನ ಮೊತ್ತ ಪಡೆಯುತ್ತವೆ ಎಂಬ ಬಗ್ಗೆ ರೈಲ್ವೆ ಪ್ರಯಾಣಿಕರ ದೂರು, ಸಲಹೆಗಾಗಿ ಆರಂಭಿಸಲಾಗಿರುವ ವೆಬ್‌ಸೈಟ್‌ನಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ದೂರುಗಳು ಬಂದಿದ್ದರಿಂದ ಈ ಕ್ರಮ ಕೈಗೊಳ್ಳಲಾಗಿದೆ.