ನ.10 : ಮರಳು ಪೂರೈಕೆ ಆಗ್ರಹಿಸಿ ಪ್ರತಿಭಟನೆ

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮರಳು ಪೂರೈಕೆ ಆರಂಭಿಸಲು ಆಗ್ರಹಿಸಿ ದ.ಕ. ಜಿಲ್ಲಾ ಸಿವಿಲ್‌ ಗುತ್ತಿಗೆದಾರರ ಸಂಘದ ನೇತೃತ್ವದಲ್ಲಿ ನ. 10ರಂದು ಅಪರಾಹ್ನ 3ಕ್ಕೆ ಮಂಗಳೂರಿನ ಕುದ್ಮುಲ್ ರಂಗವಾವ್‌ ಪುರಭವನದ ಎದುರು ಪ್ರತಿಭಟನೆ ನಡೆಸಲಾಗುವುದು ಎಂದು ಸಂಘದ ಅಧ್ಯಕ್ಷ ಮಹಾಬಲ ಕೊಟ್ಟಾರಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಸಿಆರ್‌ಝಡ್‌ ಮತ್ತು ನಾನ್‌ ಸಿಆರ್‌ಝಡ್‌ ಎರಡು ವಲಯಗಳಲ್ಲಿ ಮರಳುಗಾರಿಕೆ ಮತ್ತು ಸಾಗಾಣಿಕೆ ಸಂಪೂರ್ಣ ಸ್ಥಗಿತಗೊಂಡಿದ್ದು ಕಟ್ಟಡ ಕಾಮಗಾರಿಗಳು ನಿಂತು ಹೋಗಿವೆ. ಈ ಬಗ್ಗೆ ಮುಖ್ಯಮಂತ್ರಿ, ಉಸ್ತುವಾರಿ ಸಚಿವರು, ಗಣಿ ಇಲಾಖೆಯ ಅಧಿ ಕಾರಿಗಳಿಗೆ ಮನವಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ. ಈ ಹಿನ್ನೆಲೆಯಲ್ಲಿ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ. ಪ್ರತಿ ಭಟನೆಯಲ್ಲಿ ಸಿವಿಲ್‌ ಎಂಜಿನಿಯರ್ ಅಸೋಸಿಯೇಶನ್‌, ಕೆನರಾ ಬಿಲ್ಡರ್ ಅಸೋಸಿಯೇಶನ್‌, ಕ್ರೆಡಾೖ ಮಂಗಳೂರು, ಕರಾವಳಿ ಸಿಮೆಂಟ್‌ ಡೀಲರ್ ಅಸೋಸಿಯೇಶನ್‌, ಸ್ಟೀಲ್‌ ಡೀಲರ್ಸ್‌ ಅಸೋಸಿಯೇಶನ್‌, ಪೈಂಟ್‌ ಹಾರ್ಡ್‌ವೇರ್‌ ಡೀಲರ್ ಅಸೋಸಿ ಯೇಶನ್‌ನವರು ಪಾಲ್ಗೊಳ್ಳಲಿದ್ದಾರೆ ಎಂದು ತಿಳಿಸಿದರು.

ಮೇ 15ರಂದು ಮರಳುಗಾರಿಕೆ ಸ್ಥಗಿತಗೊಂಡಿದೆ. ಆ. 15ಕ್ಕೆ ಪುನರಾರಂಭ ಗೊಳ್ಳಬೇಕಿತ್ತು. ಆದರೆ ಈವರೆಗೂ ಆರಂಭಿಸಿಲ್ಲ. ನಾನ್‌ ಸಿಆರ್‌ಝಡ್‌ ನಲ್ಲಿ ಟೆಂಡರ್‌ ಆಗಿದ್ದರೂ ವೇ ಬ್ರಿಜ್‌ ಷರತ್ತಿನಿಂದಾಗಿ ಮರಳು ಪೂರೈಕೆಯಾ ಗುತ್ತಿಲ್ಲ. ವೇಬ್ರಿಜ್‌ ಅಳ ವಡಿಸದೆ ಪರವಾನಿಗೆ ನೀಡುತ್ತಿಲ್ಲ. ಮರಳು ಪೂರೈಕೆ ದಾರರು ವೇಬ್ರಿಜ್‌ ಅಳವಡಿಸುತ್ತಿಲ್ಲ. ಇದರಿಂದಾಗಿ ಇಡೀ ನಿರ್ಮಾಣ ಕ್ಷೇತ್ರವೇ ಸಮಸ್ಯೆಯಲ್ಲಿ ಸಿಲುಕಿದೆ. ಗಣಿ ಇಲಾಖೆಯವರೇ ವೇಬ್ರಿಜ್‌ ಅಳವಡಿಸ ಬೇಕು. ವೇಬ್ರಿಜ್‌ನಿಂದ ಸರಕಾರಕ್ಕೆ ಆದಾಯವೂ ಬರಲಿದೆ ಎಂದು ಮಹಾಬಲ ಕೊಟ್ಟಾರಿ ಹೇಳಿದರು.

ಶೇ. 50ರಷ್ಟು ಕೆಲಸ ಸ್ಥಗಿತ
ಈಗ ರಾತ್ರಿ ವೇಳೆ ಮಾತ್ರ ಕದ್ದುಮುಚ್ಚಿ ಮರಳು ಪೂರೈಕೆ ಮಾಡಲಾಗುತ್ತಿದೆ. ಅದು ದುಬಾರಿಯಾಗಿದೆ. ಪೂರೈಸುವ ಮರಳಿನ ಪ್ರಮಾಣದಲ್ಲಿಯೂ ಮೋಸ ಮಾಡಲಾಗುತ್ತಿದೆ. ಗುಣಮಟ್ಟವೂ ಉತ್ತಮವಾಗಿಲ್ಲ. ಇಂತಹ ಮರಳನ್ನು ಬಳಸಿ ನಿರ್ಮಾಣ ಕಾಮಗಾರಿ ನಡೆ ಸುವುದು ಕಷ್ಟಸಾಧ್ಯವಾಗಿರುವುದರಿಂದ ಶೇ. 50ರಷ್ಟು ಗುತ್ತಿಗೆದಾರರು ಕಾಮಗಾರಿ ಸ್ಥಗಿತಗೊಳಿಸಿದ್ದಾರೆ. ಇದರಿಂದಾಗಿ ನಿರ್ಮಾಣ ಕ್ಷೇತ್ರದ ಮೇಲೆ ಮಾತ್ರ ವಲ್ಲದೆ ಅದನ್ನು ಅವಲಂಬಿಸಿರುವ ಕಾರ್ಮಿಕ ವರ್ಗ, ಇಡೀ ವ್ಯವಹಾರ ಚಟುವಟಿಕೆಗಳ ಮೇಲೆ ದುಷ್ಪರಿಣಾಮ ಉಂಟಾಗಿದೆ ಎಂದವರು ಹೇಳಿದರು.

ಅಸೋಸಿಯೇಶನ್‌ ಉಪಾಧ್ಯಕ್ಷ ಸತೀಶ್‌ ಕುಮಾರ್‌ ಜೋಗಿ, ಕಾರ್ಯ ದರ್ಶಿ ದೇವಾನಂದ, ಕೋಶಾಧಿಕಾರಿ ಸುರೇಶ್‌ ಜೆ., ಸದಸ್ಯರಾದ ಚಂದನ್‌ ದಾಸ್‌, ಮಧುಸೂದನ ಪತ್ರಿಕಾಗೋಷ್ಠಿಯಲ್ಲಿದ್ದರು.