Pro Kabaddi Season-10; ಗುಜರಾತ್‌, ಮುಂಬಾ ಗೆಲುವಿನ ಆರಂಭ

ಅಹ್ಮದಾಬಾದ್‌: ಪ್ರೊ ಕಬಡ್ಡಿ 10ನೇ ಆವೃತ್ತಿಯ ಉದ್ಘಾಟನ ಪಂದ್ಯದಲ್ಲಿ ಆತಿಥೇಯ ಗುಜರಾತ್‌ ಜೈಂಟ್ಸ್‌ ಗೆಲುವಿನ ಶುಭಾರಂಭ ಮಾಡಿದೆ. ಅದು ತೆಲುಗು ಟೈಟಾನ್ಸ್‌ ವಿರುದ್ಧ 38-32 ಅಂಕಗಳ ಮೇಲುಗೈ ಸಾಧಿಸಿತು.

ಮೊದಲಾರ್ಧದ ಪಂದ್ಯ ತೀವ್ರ ಪೈಪೋಟಿಯಿಂದ ಕೂಡಿತ್ತು. ವಿರಾಮದ ವೇಳೆ ಗುಜರಾತ್‌ 13-16ರ ಹಿನ್ನಡೆಯಲ್ಲಿತ್ತು. ಆದರೆ ದ್ವಿತೀಯಾರ್ಧದಲ್ಲಿ ಫ‌ಜಲ್‌ ಅಟ್ರಾಚಲಿ ಪಡೆ ತಿರುಗಿ ಬಿತ್ತು. ರೈಡರ್‌ ರಾಕೇಶ್‌ ಸರ್ವಾಧಿಕ 5 ಅಂಕ ಗಳಿಸಿದರೆ, ಆಲ್‌ರೌಂಡರ್‌ಗಳಾದ ರೋಹಿತ್‌ ಗುಲಿಯಾ ಮತ್ತು ಮೊಹಮ್ಮದ್‌ ನಬಿಭಕ್‌Ò ತಲಾ 4 ಅಂಕ ತಂದಿತ್ತರು.

ಸೆಹ್ರಾವತ್‌ ಹೋರಾಟ
ಟೈಟಾನ್ಸ್‌ ಪರ ನಾಯಕ ಪವನ್‌ ಸೆಹ್ರಾವತ್‌ ಅವರದು ಏಕಾಂಗಿ ಹೋರಾಟವಾಗಿತ್ತು. ಅವರು ಪಂದ್ಯದಲ್ಲೇ ಸರ್ವಾಧಿಕ 11 ಅಂಕ ಗಳಿಸಿದರು. ಇದರಲ್ಲಿ 4 ಬೋನಸ್‌ ಅಂಕ ಸೇರಿತ್ತು. ರೈಡರ್‌ ರಾಜೇಶ್‌ 5 ಅಂಕ ತಂದುಕೊಟ್ಟರು.

ಮುಂಬಾ ವಿಜಯ
ದ್ವಿತೀಯ ಪಂದ್ಯದಲ್ಲಿ ಯು ಮುಂಬಾ 34-31 ಅಂತರದಿಂದ ಯುಪಿ ಯೋಧಾಸ್‌ಗೆ ಸೋಲುಣಿಸಿತು. ಮುಂಬಾದ ಆಲ್‌ರೌಂಡರ್‌ ಅಮೀರ್‌ ಮೊಹಮ್ಮದ್‌ ಜಾಫ‌ರ್ದನೇಶ್‌ ಅಮೋಘ ಪ್ರದ‌ರ್ಶನವಿತ್ತರು. ಅವರದು 11 ಅಂಕಗಳ ಪರಾಕ್ರಮ. ಯೋಧಾಸ್‌ ಪರ ರೈಡರ್‌ ಸುರೇಂದರ್‌ ಗಿಲ್‌ (7), ಆಲ್‌ರೌಂಡರ್‌ ವಿಜಯ್‌ ಮಲಿಕ್‌ (5) ಉತ್ತಮ ಪ್ರದರ್ಶನ ನೀಡಿದರು.

ಕ್ರೀಡೆ