ಪ್ರೊ ಕಬಡ್ಡಿ ಲೀಗ್‌: ದ್ವಿತೀಯ ಸ್ಥಾನಕ್ಕೆ ನೆಗೆದ ಪಾಟ್ನಾ ಪೈರೆಟ್ಸ್‌

ಬೆಂಗಳೂರು: ಪ್ರೊ ಕಬಡ್ಡಿ ಲೀಗ್‌ನಲ್ಲಿ 8ನೇ ಜಯ ಸಾಧಿಸಿದ ಪಾಟ್ನಾ ಪೈರೆಟ್ಸ್‌ ಒಮ್ಮೆಲೇ ಆರರಿಂದ ಎರಡನೇ ಸ್ಥಾನಕ್ಕೆ ನೆಗೆದಿದೆ.

ಶುಕ್ರವಾರದ ಮುಖಾಮುಖಿಯಲ್ಲಿ ಅದು ತಮಿಳ್‌ ತಲೈವಾಸ್‌ ವಿರುದ್ಧ 52-24 ಅಂಕಗಳ ಪ್ರಚಂಡ ಗೆಲುವು ಗಳಿಸಿತು.

ಪಾಟ್ನಾ ಒಂದು ತಂಡವಾಗಿ ಆಡಿ ತಲೈವಾಸ್‌ ಮೇಲೆ ಸವಾರಿ ಮಾಡಿತು. ಮೋನು ಗೋಯತ್‌ 9, ನಾಯಕ ಪ್ರಶಾಂತ್‌ ಕುಮಾರ್‌ ರೈ 8; ಸಚಿನ್‌, ನೀರಜ್‌ ಕುಮಾರ್‌, ಮೊಹಮ್ಮದ್‌ ರೇಝ ತಲಾ 6, ಸುನೀಲ್‌ 5 ಅಂಕ ಸಂಪಾದಿಸಿದರು. ತಲೈವಾಸ್‌ ಪರ ಡಿಫೆಂಡರ್‌ ಸಾಗರ್‌ ಗಮನಾರ್ಹ ಪ್ರದರ್ಶನ ನೀಡಿ 8 ಅಂಕ ತಂದಿತ್ತರು.

ಪಾಟ್ನಾ ಒಟ್ಟು 45 ಅಂಕ ಹೊಂದಿದೆ. ಅಗ್ರಸ್ಥಾನಿ ಬೆಂಗಳೂರು ಬುಲ್ಸ್‌ಗಿಂತ ಕೇವಲ ಒಂದಂಕದ ಹಿನ್ನಡೆಯಲ್ಲಿದೆ. ದಬಾಂಗ್‌ ದಿಲ್ಲಿ 3ಕ್ಕೆ (43), ಹರ್ಯಾಣ 4ಕ್ಕೆ (42), ಮುಂಬಾ 5ಕ್ಕೆ (41) ಮತ್ತು ಬೆಂಗಾಲ್‌ 6ಕ್ಕೆ ಇಳಿದವು (41 ಅಂಕ).