Pro Kabaddi: ಲೀಗ್‌ ಹರಾಜು- ಪವನ್‌ ಸೆಹ್ರಾವತ್‌ ದುಬಾರಿ ಆಟಗಾರ

ಮುಂಬಯಿ: ಏಷ್ಯನ್‌ ಗೇಮ್ಸ್‌ನ ಫೈನಲ್‌ನಲ್ಲಿ ಇರಾನ್‌ ವಿರುದ್ಧ ಗೆಲ್ಲಲು ಪ್ರಮುಖ ಪಾತ್ರ ವಹಿಸಿದ್ದ ಭಾರತ ತಂಡದ ನಾಯಕ ಪವನ್‌ ಸೆಹ್ರಾವತ್‌ ಅವರು ಪ್ರೊ ಕಬಡ್ಡಿ ಲೀಗ್‌ನ ಈ ಬಾರಿಯ ಹರಾಜಿನಲ್ಲೂ ದುಬಾರಿ ಆಟಗಾರರಾಗಿ ಮೂಡಿಬಂದಿದ್ದಾರೆ. ಅವರನ್ನು ತೆಲುಗು ಟೈಟಾನ್ಸ್‌ 2.60 ಕೋಟಿ ರೂ.ಗೆ ಖರೀದಿಸಿದೆ.

ಈ ಬಾರಿಯ ಹರಾಜಿನಲ್ಲಿ 601 ಆಟಗಾರರು ಭಾಗವಹಿಸಿದ್ದರು. ಸೆಹ್ರಾ ವತ್‌ ಅವರನ್ನು ಖರೀದಿಸಲು ಹರಿ ಯಾಣ ಸ್ಟೀಲರ್, ಯುಪಿ ಯೋಧಾಸ್‌, ತೆಲುಗು ಮತ್ತು ಬೆಂಗಳೂರು ಬುಲ್ಸ್‌ ಫ್ರಾಂಚೈಸಿ ತೀವ್ರ ಪೈಪೋಟಿ ನಡೆಸಿತು. ಅಂತಿಮವಾಗಿ ಸೆಹ್ರಾವತ್‌ ತೆಲುಗು ಟೈಟಾನ್ಸ್‌ ಪಾಲಾದರು. ಸೆಹ್ರಾವತ್‌ ಅವರನ್ನು ಕಳೆದ ಋತುವಿನಲ್ಲಿ ದಾಖಲೆ 2.26 ಕೋಟಿ ರೂ.ಗಳಿಗೆ ತಮಿಳ್‌ ತಲೈವಾಸ್‌ ಖರೀದಿಸಿತ್ತು.

ಕೋಟಿವೀರರು ಇವರು…
ಎರಡು ದಿನಗಳ ಹರಾಜಿನ ಮೊದಲ ದಿನ “ಎ’ ಮತ್ತು “ಬಿ’ ವಿಭಾಗದ ಆಟ ಗಾರರ ಹರಾಜು ನಡೆದಿತ್ತು. ಸೆಹ್ರಾವತ್‌ ದಾಖಲೆಯ ಮೊತ್ತಕ್ಕೆ ಹರಾಜು ಆಗುವ ಮೊದಲು ಇನ್ನೂ ಕೆಲವರು ಆಟಗಾರರಿಗೆ ಭಾರೀ ಬೇಡಿಕೆ ಬಂದಿತ್ತು. ಎರಡು ಕೋಟಿಗಿಂತ ಹೆಚ್ಚಿನ ಮೊತ್ತಕ್ಕೆ ಮಾರಾಟಗೊಂಡರು.

ಇರಾನಿನ ಮೊಹಮ್ಮದ್‌ರೆಝ ಶಡ್ಲೂಯಿ ಚಿನನೇಹ್‌ ಅವರನ್ನು ಪುನೇರಿ ಪಲ್ಟಾನ್ಸ್‌ 2.35 ಕೋಟಿ ರೂ.ಗಳಿಗೆ ಖರೀದಿಸಿದರೆ, ಭಾರತದ ಮಣೀಂದರ್‌ ಸಿಂಗ್‌ ಅವರನ್ನು 2.12 ಕೋಟಿ ರೂ. ನೀಡಿ ಬಂಗಾಲ್‌ ವಾರಿಯರ್ ಖರೀದಿಸಿತು. ಗುಜರಾತ್‌ ಜೈಂಟ್ಸ್‌ ಇರಾನಿನ ಸ್ಟಾರ್‌ ಆಟಗಾರ ಫ‌ಜಲ್‌ ಅತ್ರಾಚಲಿ ಅವರನ್ನು 1.60 ಕೋಟಿ ರೂ.ಗಳಗೆ ತನ್ನದಾಗಿಸಿಕೊಂಡಿತು.

ಭಾರತ ತಂಡದ ಆಲ್‌ರೌಂಡರ್‌ ರೋಹಿತ್‌ ಗುಲಿಯ ಗುಜರಾತ್‌ ಜೈಂಟ್ಸ್‌ ಪಾಲಾದರೆ ಆಲ್‌ರೌಂಡರ್‌ ವಿಜಯ್‌ ಮಲಿಕ್‌ ತೀವ್ರ ಸ್ಪರ್ಧೆಯ ಬಳಿಕ 85 ಲಕ್ಷ ರೂ.ಗಳಿಗೆ ಯುಪಿ ಯೋಧಾಸ್‌ ಪಾಲಾದರು. ಮಂಜೀತ್‌ ಅವರ ಆಯ್ಕೆಗಾಗಿ ತಮಿಳ್‌ ಮತ್ತು ಪಾಟ್ನಾ ತೀವ್ರ ಸ್ಪರ್ಧೆ ನಡೆಸಿತು. ಅಂತಿಮವಾಗಿ 92 ಲಕ್ಷ ರೂ.ಗಳಿಗೆ ಪಟ್ನಾ ಪಾಲಾದರು.

ಸಂದೀಪ್‌ ನರ್ವಾಲ್‌, ದೀಪಕ್‌ ನಿವಾಸ್‌ ಹೂಡ, ಆಶಿಷ್‌, ಮನೋಜ್‌ ಗೌಡ, ಸಚಿನ್‌ ನರ್ವಾಲ್‌, ಗುರುದೀಪ್‌, ಅಜಿಂಕ್ಯ ಕಪ್ರ, ವಿಶಾಲ್‌ ಭಾರಧ್ವಾಜ್‌ ಅವರನ್ನು ಯಾರೂ ಬಿಡ್‌ ಮಾಡಲಿಲ್ಲ.