ಪ್ರೊ ಕಬಡ್ಡಿ: ಗೆಲುವಿನ ಹಳಿ ಏರಿದ ಬೆಂಗಳೂರು ಬುಲ್ಸ್‌

ಬೆಂಗಳೂರು: ಸತತ ಎರಡು ಸೋಲಿನಿಂದ ಕಂಗೆಟ್ಟಿದ್ದ ಬೆಂಗಳೂರು ಬುಲ್ಸ್‌ ಗೆಲುವಿನ ಹಳಿ ಏರುವಲ್ಲಿ ಯಶಸ್ವಿಯಾಗಿದೆ.

ಬುಧವಾರದ ತನ್ನ 5ನೇ ಪಂದ್ಯದಲ್ಲಿ ಅದು ತಮಿಳ್‌ ತಲೈವಾಸ್‌ ವಿರುದ್ಧ 45-28 ಅಂತರದ ಮೇಲುಗೈ ಸಾಧಿಸಿತು. ಇದು ಬುಲ್ಸ್‌ಗೆ ಒಲಿದ 3ನೇ ಜಯವಾದರೆ, ತಮಿಳ್‌ಗೆ ಎದುರಾದ 3ನೇ ಸೋಲು.

ಬುಲ್ಸ್‌ ಗೆಲುವಿನಲ್ಲಿ ರೈಡರ್‌ಗಳಾದ ಭರತ್‌ (12), ವಿಕಾಸ್‌ ಕಂಡೋಲ (7) ಪ್ರಮುಖ ಪಾತ್ರ ವಹಿಸಿದರು. ತಮಿಳ್‌ ಪರ ನರೇಂದರ್‌ 10, ಹಿಮಾಂಶು ಸಿಂಗ್‌ 8 ಅಂಕ ತಂದಿತ್ತರು.

ಗುಜರಾತ್‌ ಗೆಲುವು
ಗುಜರಾತ್‌ ಜೈಂಟ್ಸ್‌ ಮತ್ತು ಯುಪಿ ಯೋಧಾಸ್‌ ನಡುವಿನ ಮೊದಲ ಪಂದ್ಯ ಅಂಕಗಳ ರಾಶಿಗೆ ಹಾಗೂ ನಾಲ್ವರ ಅಮೋಘ ಆಟಕ್ಕೆ ಸಾಕ್ಷಿಯಾಯಿತು. ಇದನ್ನು ಗುಜರಾತ್‌ 51-45 ಅಂತರದಿಂದ ಗೆದ್ದಿತು.

ಗುಜರಾತ್‌ ಪರ ನಾಯಕ ಚಂದ್ರನ್‌ ರಂಜಿತ್‌ 20, ರೈಡರ್‌ ರಾಕೇಶ್‌ 16 ಅಂಕ ಗಳಿಸಿ ಮಿಂಚಿದರು. ಯೋಧಾಸ್‌ ತಂಡದ ಹೋರಾಟ ಸಂಘಟಿಸಿದವರು ರೈಡರ್‌ಗಳಾದ ಪದೀಪ್‌ ನರ್ವಾಲ್‌ (17) ಮತ್ತು ಸುರೇಂದರ್‌ ಗಿಲ್‌ (14).
ಇದು 5 ಪಂದ್ಯಗಳಲ್ಲಿ ಗುಜರಾತ್‌ಗೆ ಒಲಿದ ಕೇವಲ 2ನೇ ಜಯ. ಯೋಧಾಸ್‌ ಇಷ್ಟೇ ಪಂದ್ಯಗಳಲ್ಲಿ 3ನೇ ಸೋಲನುಭವಿಸಿತು.