ಶೌರ್ಯ ಪದಕ ಪುರಸ್ಕೃತರಿಗಾಗಿ ಪ್ರತ್ಯೇಕ ವೆಬ್‌ಸೈಟ್‌: ಪ್ರಧಾನಿ ಚಾಲನೆ

ಹೊಸದಿಲ್ಲಿ : ದೇಶಕ್ಕೆ ಸ್ವಾತಂತ್ರ್ಯ ಲಭಿಸಿದ 1947ರಿಂದ ತೊಡಗಿ ಈ ತನಕದ ಎಲ್ಲ ಶೌರ್ಯ ಪದಕ ಪುರಸ್ಕೃತರನ್ನು ಪರಿಚಯಿಸುವುದಕ್ಕೆ ಸೀಮಿತವಾದ ಆನ್‌ಲೈನ್‌ ಪೋರ್ಟಲ್‌ಗೆ ಪ್ರಧಾನಿ ನರೇಂದ್ರ ಮೋದಿ ಅವರಿಂದು ಚಾಲನೆ ನೀಡಿದರು. 

ಪರಮವೀರ ಚಕ್ರ, ಮಹಾ ವೀರ ಚಕ್ರ, ವೀರ ಚಕ್ರ, ಅಶೋಕ ಚಕ್ರ, ಕೀರ್ತಿ ಚಕ್ರ ಮತ್ತು ಶೌರ್ಯ ಚಕ್ರ ಪದಕ ಪುರಸ್ಕೃತರ ವಿವರಗಳನ್ನು ಈ ವೆಬ್‌ಸೈಟ್‌ ನೀಡುತ್ತದೆ. 

ಈ ವೆಬ್‌ಸೈಟನ್ನು ಇನ್ನಷ್ಟು  ಸುಧಾರಿಸುವ ನಿಟ್ಟಿನಲ್ಲಿ ರಕ್ಷಣಾ ಸಚಿವಾಲಯ ಜನರಿಂದ ಸಲಹೆಗಳನ್ನು ಅಹ್ವಾನಿಸಿದೆ. 

“ನಮ್ಮ ದೇಶದ ಯುವ ಜನರು ದೇಶಕ್ಕಾಗಿ ಧೈರ್ಯ, ಶೌರ್ಯದಿಂದ ಹೋರಾಡಿದ ಹೆಮ್ಮೆಯ ಯೋಧರ ಸಿದ್ಧಿ-ಸಾಧನೆಗಳನ್ನು ಅರಿತು ಪ್ರೇರಣೆ ಪಡೆಯಬೇಕೆಂಬ ಉದ್ದೇಶದಲ್ಲಿ ಈ ವೆಬ್‌ಸೈಟ್‌ ಆರಂಭಿಸಲಾಗಿದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರಿಂದು ದಿಲ್ಲಿಯ ಕೆಂಪು ಕೋಟೆಯ ಮೇಲಿಂದ ಮಾಡಿದ 71ನೇ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಹೇಳಿದರು.