ಶಿಕ್ಷಣ ಇಲಾಖೆ ಆದೇಶಕ್ಕೆ ಹೈಕೋರ್ಟ್‌ ಮಧ್ಯಂತರ ತಡೆ

ಧಾರವಾಡ: ಜಿಲ್ಲೆಯ 13 ಶಾಲೆಗಳ ನೋಂದಣಿ ಅನುಮತಿ ರದ್ದುಪಡಿಸಿ ಶಿಕ್ಷಣ ಇಲಾಖೆ ಹೊರಡಿಸಿದ್ದ ಆದೇಶಕ್ಕೆ ಧಾರವಾಡ ಹೈಕೋರ್ಟ್‌ ಪೀಠ ಮಧ್ಯಂತರ ತಡೆಯಾಜ್ಞೆ ನೀಡಿದೆ. ಅರ್ಜಿಯ ಪ್ರಾಥಮಿಕ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಲ್‌. ನಾರಾಯಣಸ್ವಾಮಿ ಅವರಿದ್ದ ಏಕ ಸದಸ್ಯ ಪೀಠ ಆದೇಶಕ್ಕೆ ಮಧ್ಯಂತರ ತಡೆ ನೀಡಿ, ಎದುರುಗಾರರಿಗೆ ನೋಟಿಸ್‌ ಜಾರಿ ಮಾಡಿದೆ.

ಸಾರ್ವಜನಿಕ ಶಿಕ್ಷಣ ಇಲಾಖೆ ಕಾಲ-ಕಾಲಕ್ಕೆ ನೀಡಿದ್ದ ಕಟ್ಟು ನಿಟ್ಟಿನ ಸುತ್ತೋಲೆಗಳನ್ನು 1-5ನೇ ತರಗತಿವರೆಗೆ ಕನ್ನಡ ಮತ್ತು ಆಂಗ್ಲ ಮಾಧ್ಯಮ ಬೋಧಿಸುವ 13 ಶಾಲೆಗಳು ಉಲ್ಲಂಘಿ ಸಿದ್ದವು. ಸುತ್ತೋಲೆಗಳನ್ನು ಉಲ್ಲಂಘಿ ಸಿದ್ದ ಜಿಲ್ಲೆಯ 13 ಶಾಲೆಗಳ ನೋಂದಣಿ ಅನುಮತಿ ರದ್ದುಪಡಿಸಿ ಶಿಕ್ಷಣ ಇಲಾಖೆ 2017ರ ಜನವರಿ 9ರಂದು ಆದೇಶ ಹೊರಡಿಸಿತ್ತು.

ಈ ಆದೇಶವನ್ನು ಪ್ರಶ್ನಿಸಿ ಅನುಮತಿ ರದ್ದುಗೊಂಡಿದ್ದ ಶಾಲೆಗಳ ಪೈಕಿ ಸ್ಟಾರ್ಸ್‌ ಇಂಗ್ಲಿಷ್‌ ಮಾಧ್ಯಮ ಶಾಲೆ, ಮೌಲಾನಾ ಹುಸೇನ್‌ ಅಹ್ಮದ್‌ ಮದನಿ ಎಜ್ಯುಕೇಶನ್‌ ಟ್ರಸ್ಟ್‌, ಬಾಲಾಜಿ ಎಜ್ಯುಕೇಶನ್‌ ಸೊಸೈಟಿಯ ಲಿಟಲ್ಸ್‌ ರೇಣುಕಾ ಶಿಕ್ಷಣ ಟ್ರಸ್ಟ್‌, ಅಪ್ನಾ ಶಿಕ್ಷಣ ಟ್ರಸ್ಟ್‌, ದೇವಕಿ ಉದ್ಯೋಗ ಕೇಂದ್ರ ಧಾರವಾಡ ಹೈಕೋರ್ಟ್‌ ಮೊರೆ ಹೋಗಿದ್ದವು. 

ಅನುಮತಿ ರದ್ದುಗೊಳಿಸಿದ್ದ ಶಿಕ್ಷಣಇಲಾಖೆ ಈ ಶಾಲೆಗಳಲ್ಲಿ ವಿದ್ಯಾರ್ಥಿಗಳು ಪ್ರವೇಶ ಪಡೆದಿದ್ದರೆ, ಅವರನ್ನು ಹತ್ತಿರದ ಸರ್ಕಾರಿ ಅಥವಾ ಸರ್ಕಾರದಿಂದ ಮಾನ್ಯತೆ ಪಡೆದ ಶಾಲೆಗಳಿಗೆ 2017ಧಿ-18ನೇ ಸಾಲಿಗೆ ದಾಖಲಿಸುವಂತೆ ಜಿಲ್ಲೆಯ ಎಲ್ಲ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ಸೂಚನೆ ನೀಡಿತ್ತು. ಇದೀಗ ಹೈಕೋರ್ಟ್‌ ಪ್ರಕರಣಕ್ಕೆ ಮಧ್ಯಂತರ ತಡೆ ನೀಡಿರುವುದರಿಂದ ವಿದ್ಯಾರ್ಥಿಗಳು ಮತ್ತು ಖಾಸಗಿ ಶಾಲಾ ಮಂಡಳಿಗಳು ಕೊಂಚ ನಿಟ್ಟುಸಿರು ಬಿಡುವಂತಾಗಿದೆ.