ಹೊಸದಿಲ್ಲಿ: ಕರ್ನಾಟಕದ ಲೆಗ್‌ ಸ್ಪಿನ್ನರ್ ಪ್ರವೀಣ್ ದುಬೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ. ಗಾಯಾಳು ಸ್ಪಿನ್ನರ್ ಅಮಿತ್‌ ಮಿಶ್ರಾ ಸ್ಥಾನವನ್ನು ದುಬೆ ತುಂಬಲಿದ್ದಾರೆ.
ಕೆಕೆಆರ್‌ ಎದುರಿನ ಪಂದ್ಯದ ವೇಳೆ ಕೈ ಬೆರಳಿಗೆ ಗಾಯ ಮಾಡಿಕೊಂಡ ಮಿಶ್ರಾ ಕೂಟದಿಂದ ಬೇರ್ಪಟ್ಟಿದ್ದಾರೆ. ಈಗಾಗಲೇ ಡೆಲ್ಲಿ ತಂಡದ ಜೈವಿಕ ಸುರಕ್ಷಾ ವಲಯವನ್ನು ಪ್ರವೇಶಿಸಿರುವ ಪ್ರವೀಣ್ ದುಬೆ, ಆರ್‌ಸಿಬಿ ತಂಡದ ನೆಟ್‌ ಬೌಲರ್‌ ಆಗಿ ಯುಎಇಗೆ ತೆರಳಿದ್ದರು.
2015ರ “ಕರ್ನಾಟಕ ಪ್ರೀಮಿಯರ್‌ ಲೀಗ್‌’ ವೇಳೆ ಗಮನ ಸೆಳೆದ ಪ್ರವೀಣ್ ದುಬೆ ಈ ವರ್ಷವಷ್ಟೇ ಪ್ರಥಮ ದರ್ಜೆ ಕ್ರಿಕೆಟಿಗೆ ಅಡಿಯಿರಿಸಿದ್ದರು. 2016ರಲ್ಲಿ 35 ಲಕ್ಷ ರೂ. ಮೊತ್ತಕ್ಕೆ ಆರ್‌ಸಿಬಿ ಸೇರಿಕೊಂಡ ಅವರು 2 ಋತುಗಳ ಬಳಿಕ ಬಿಡುಗಡೆಗೊಂಡಿದ್ದರು. ಅನಂತರದ ಹರಾಜಿನಲ್ಲಿ ಮಾರಾಟವಾಗದೇ ಉಳಿದಿದ್ದರು.
ಡೆಲ್ಲಿ ಕ್ಯಾಪಿಟಲ್ಸ್ ತಂಡದಲ್ಲಿ ಈಗಾಗಲೇ ರವಿಚಂದ್ರನ್ ಅಶ್ವಿನ್ ಮತ್ತು ಅಕ್ಷರ್ ಪಟೇಲ್ ಪ್ರಮುಖ ಸ್ಪಿನ್ನರ್ ಗಳಾಗಿದ್ದಾರೆ. ಇವರಿಬ್ಬರೂ ಆಡುವ ಬಳಗದಲ್ಲಿ ಇರುವ ಕಾರಣ ಪ್ರವೀಣ್ ದುಬೆಗೆ ಸದ್ಯ ಅವಕಾಶ ಸಿಗುವುದು ಕಷ್ಟ ಎನ್ನಲಾಗಿದೆ.
ಆಡಿರುವ ಒಂಬತ್ತು ಪಂದ್ಯಗಳಲ್ಲಿ ಏಳನ್ನು ಗೆದ್ದಿರುವ ಡೆಲ್ಲಿ ಕ್ಯಾಪಿಟಲ್ಸ್ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಇಂದು ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ದುಬೈನಲ್ಲಿ ಪಂದ್ಯವಾಡಲಿದೆ.
