ರಾಜಕೋಟ್: ಐರ್ಲೆಂಡ್‌ ವನಿತೆಯರ ವಿರುದ್ದದ ಏಕದಿನ ಸರಣಿಯಲ್ಲಿ ಟೀಂ ಇಂಡಿಯಾ ಶುಭಾರಂಭ ಮಾಡಿದೆ. ರಾಜಕೋಟ್ ನಲ್ಲಿ ಶುಕ್ರವಾರ (ಜ.10) ನಡೆದ ಮೊದಲ ಏಕದಿನ ಪಂದ್ಯವನ್ನು ಆರು ವಿಕೆಟ್‌ ಅಂತರದ ಗೆಲುವು ಕಂಡಿದೆ.
ರಾಜಕೋಟ್ ನ ಸೌರಾಷ್ಟ್ರ ಕ್ರಿಕೆಟ್‌ ಅಸೋಸಿಯೇಶನ್‌ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ಮಾಡಿದ ಐರ್ಲೆಂಡ್‌ ಏಳು ವಿಕೆಟ್‌ ನಷ್ಟಕ್ಕೆ 238 ರನ್‌ ಗಳಿಸಿದರೆ, ಭಾರತ ತಂಡವು ನಾಲ್ಕು ವಿಕೆಟ್‌ ಕಳೆದುಕೊಂಡು 241 ರನ್‌ ಗಳಿಸಿ ಜಯ ಸಾಧಿಸಿತು.
ಬ್ಯಾಟಿಂಗ್‌ ಆರಂಭಿಸಿದ ಐರ್ಲೆಂಡ್‌ ಆರಂಭದಲ್ಲಿ ಸತತ ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. 56 ರನ್‌ ಗೆ ನಾಲ್ಕು ವಿಕೆಟ್‌ ಕಳೆದುಕೊಂಡಿತ್ತು. ಆದರೆ ಐದನೇ ವಿಕೆಟ್‌ ಗೆ ನಾಯಕಿ ಗ್ಯಾಬಿ ಲೆವಿಸ್ ಜೊತೆಯಾದ ಲೇಹ್‌ ಪೌಲ್‌ ಶತಕದ ಜೊತೆಯಾಟವಾಡಿದರು. ನಾಯಕಿ ಗ್ಯಾಬಿ ಲೆವಿಸ್ ಅವರು 92 ರನ್‌ ಗಳಿಸಿ ತಂಡವನ್ನು ಆಧರಿಸಿದರು. ಲೇಹ್‌ ಪೌಲ್‌ ಅವರು 59 ರನ್‌ ಮಾಡಿದರು. ಕೊನೆಯಲ್ಲಿ ಆರ್ಲೆನ್‌ ಕೆಲ್ಲಿ 28 ರನ್‌ ಮಾಡಿದರು.
ಭಾರತದ ಪರ ಪ್ರಿಯಾ ಮಿಶ್ರಾ ಎರಡು ವಿಕೆಟ್‌ ಪಡೆದರೆ, ಟಿಟಾಸ್‌ ಸಧು, ದೀಪ್ತಿ ಶರ್ಮಾ ಮತ್ತು ಮೊದಲ ಪಂದ್ಯವಾಡಿದ ಸಯಾಲಿ ಸತ್ಘರೆ ತಲಾ ಒಂದು ವಿಕೆಟ್‌ ಪಡೆದರು.
ಗುರಿ ಬೆನ್ನತ್ತಿದ ಭಾರತ ತಂಡಕ್ಕೆ ನಾಯಕಿ ಸ್ಮೃತಿ ಮಂಧನಾ ಮತ್ತು ಪ್ರತಿಕಾ ರಾವಲ್‌ (Pratika Rawal) ಉತ್ತಮ ಆರಂಭ ನೀಡಿದರು. ಮೊದಲ ವಿಕೆಟ್‌ ಗೆ 70 ರನ್‌ ಗಳಿಸಿದರು. ಮಂಧನಾ ಅವರು ಕೇವಲ 29 ಎಸೆತಗಳಲ್ಲಿ 41 ರನ್‌ ಮಾಡಿದರು. ಉತ್ತಮ ಫಾರ್ಮ್‌ ನಲ್ಲಿರುವ ಯುವ ಆಟಗಾರ್ತಿ ಪ್ರತಿಕಾ ರಾವಲ್‌ ಮತ್ತೊಂದು ಉತ್ತಮ ಪ್ರದರ್ಶನ ನೀಡಿದರು. 96 ಎಸೆತಗಳಲ್ಲಿ ರಾವಲ್‌ 89 ರನ್‌ ಮಾಡಿದರು.
ನಾಲ್ಕನೇ ವಿಕೆಟ್‌ ಗೆ ಪ್ರತಿಕಾ ರಾವಲ್‌ ಮತ್ತು ತೇಜಲ್‌ ಹಸಬ್ನಿಸ್ 116 ರನ್‌ ಜೊತೆಯಾಟವಾಡಿದರು. ತೇಜಲ್‌ ಹಸಬ್ನಿಸ್ ಅವರು ಅಜೇಯ 53 ರನ್‌ ಮಾಡಿದರು. ಭಾರತ ತಂಡವು 34.3 ಓವರ್‌ ಗಳಲ್ಲಿ ನಾಲ್ಕು ವಿಕೆಟ್‌ ಕಳೆದುಕೊಂಡು ಗುರಿ ತಲುಪಿ ಜಯ ಸಾಧಿಸಿತು.
ಮೂರು ಪಂದ್ಯಗಳ ಏಕದಿನ ಸರಣಿಯ ಎರಡನೇ ಪಂದ್ಯವು ರವಿವಾರ (ಜ.12) ನಡೆಯಲಿದೆ.
