KGF-3 ಸ್ಕ್ರಿಪ್ಟ್ ಸಿದ್ದವಿದೆ, ಆದರೆ….: ಬಿಗ್ ಅಪ್ಡೇಟ್ ನೀಡಿದ ಪ್ರಶಾಂತ್ ನೀಲ್

ಯಶ್‌ ನಟನೆಯ “ಕೆಜಿಎಫ್’ ಹಾಗೂ “ಕೆಜಿಎಫ್-2′ ಚಿತ್ರಗಳು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿರುವುದು ಎಲ್ಲರಿಗೂ ಗೊತ್ತಿರುವ ವಿಚಾರ. ಅದರಲ್ಲೂ “ಕೆಜಿಎಫ್-2′ ಸಿನಿಮಾದ ಕೊನೆಯಲ್ಲಿ ಚಿತ್ರದ ಮೂರನೇ ಭಾಗ ಬರುವ ಸುಳಿವು ನೀಡಲಾಗಿತ್ತು. ಆ ದಿನದಿಂದಲೇ ಅಭಿಮಾನಿಗಳಲ್ಲಿ ಈ ಚಿತ್ರ ಯಾವಾಗ ಸೆಟ್ಟೇರುತ್ತದೆ ಎಂಬ ಕುತೂಹಲ ಆರಂಭವಾಗಿತ್ತು. ಆದರೆ, ನಿರ್ದೇಶಕ ಪ್ರಶಾಂತ್‌ ನೀಲ್‌ ಹಾಗೂ ಯಶ್‌ ಇಬ್ಬರೂ ಬೇರೆ ಬೇರೆ ಪ್ರಾಜೆಕ್ಟ್‌ನಲ್ಲಿ ಬಿಝಿಯಾಗಿದ್ದಾರೆ. ಹೀಗಾಗಿ ಮುಂದೆ “ಕೆಜಿಎಫ್-3′ ಬರುತ್ತಾ, ಇಲ್ವಾ ಎಂಬ ಪ್ರಶ್ನೆ ಸಿನಿಮಾ ಪ್ರೇಮಿಗಳ ಮನಸ್ಸಲ್ಲಿತ್ತು. ಈಗ ಈ ಪ್ರಶ್ನೆಗೆ ಪ್ರಶಾಂತ್‌ ನೀಲ್‌ ಉತ್ತರಿಸಿದ್ದಾರೆ.

ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನಲ್ಲಿ “ಕೆಜಿಎಫ್-3′ ಬರುವುದು ಪಕ್ಕಾ ಎಂದಿದ್ದಾರೆ. “ಕೆಜಿಎಫ್-3 ಬಂದೇ ಬರುತ್ತದೆ. ಅದರ ಸ್ಕ್ರಿಪ್ಟ್ ಕೂಡಾ ರೆಡಿ ಇದೆ. ಒಂದು ವೇಳೆ ಸ್ಕ್ರಿಪ್ಟ್ ಸಿದ್ಧವಾಗದೇ ಇರುತ್ತಿದ್ದರೆ “ಕೆಜಿಎಫ್-2′ ಕೊನೆಯಲ್ಲಿ ಪಾರ್ಟ್‌-3 ಬಗ್ಗೆ ಸುಳಿವೇ ನೀಡುತ್ತಿರಲಿಲ್ಲ’ ಎಂದಿದ್ದಾರೆ. ಈ ಮೂಲಕ ಚಿತ್ರಪ್ರೇಮಿಗಳ ಆಸೆಗೆ ಹೊಸ ಜೋಶ್‌ ತುಂಬಿದ್ದಾರೆ.

ಸದ್ಯ ಪ್ರಶಾಂತ್‌ ನೀಲ್‌ ತೆಲುಗಿನಲ್ಲಿ ಬೇಡಿಕೆ ಗಿಟ್ಟಿಸಿಕೊಂಡಿದ್ದು, ಜೂ.ಎನ್‌ ಟಿಆರ್‌ ಸಿನಿಮಾ ಜೊತೆಗೆ ಇನ್ನೂ ಕೆಲವು ಸಿನಿಮಾಗಳ ಕಮಿಟ್‌ಮೆಂಟ್‌ ಮಾಡಿಕೊಂಡಿದ್ದಾರೆನ್ನಲಾಗಿದೆ. ಇತ್ತ ಕಡೆ ಯಶ್‌ “ಟಾಕ್ಸಿಕ್‌’ ಹಾಗೂ “ರಾಮಾಯಣ’ದಲ್ಲಿ ಬಿಝಿಯಾಗಿದ್ದಾರೆ. ಹಾಗಾಗಿ, “ಕೆಜಿಎಫ್-3′ ಆರಂಭ ತಡವಾಗುವುದರಲ್ಲಿ ಎರಡು ಮಾತಿಲ್ಲ.