ಪ್ರಜ್ವಲ್‌ ದೇವರಾಜ್‌ ನಿನ್ನೆ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ. ಎಂದಿನಂತೆ ಅವರ ಹಲವು ಅಭಿಮಾನಿಗಳು ಮನೆಯ ಹತ್ತಿರ ಬಂದು, ಪ್ರಜ್ವಲ್‌ರಿಂದ ಕೇಕ್‌ ಕಟ್‌ ಮಾಡಿಸಿ, ಹುಟ್ಟುಹಬ್ಬವನ್ನು ಆಚರಿಸಿದ್ದಾರೆ. ಇದಲ್ಲದೆ ಪ್ರಜ್ವಲ್‌ ಕುಟುಂಬದವರು, ಆಪ್ತರು, ಸ್ನೇಹಿತರು, ಚಿತ್ರತಂಡದವರು … ಅದೆಷ್ಟು ಕೇಕ್‌ಗಳನ್ನು ತಂದಿದ್ದರೋ, ಒಂದು ದಿನದಲ್ಲಿ ಪ್ರಜ್ವಲ್‌ ಅದೆಷ್ಟು ಕೇಕ್‌ಗಳನ್ನು
ಕತ್ತರಿಸಿದರೋ ಗೊತ್ತಿಲ್ಲ. ಒಟ್ಟಿನಲ್ಲಿ ಮೊನ್ನೆಯಿಂದಲೇ ಪ್ರಜ್ವಲ್‌ ಅವರ ಹುಟ್ಟುಹಬ್ಬದ ಸಂಭ್ರಮಾಚರಣೆ ನಡೆದಿದೆ.
ಈ ಮಧ್ಯೆ ಪ್ರಜ್ವಲ್‌ ಅಭಿನಯದ ಎರಡು ಚಿತ್ರಗಳ ತಂಡದವರು, ಪ್ರಜ್ವಲ್‌ಗೆ ತಮ್ಮದೇ ರೀತಿಯಲ್ಲಿ ಗಿಫ್ಟ್ ಕೊಟ್ಟಿದ್ದಾರೆ. ಈ ಪೈಕಿ “ಇನ್‌ಸ್ಪೆಕ್ಟರ್‌ ವಿಕ್ರಮ್‌’ ತಂಡದವರು ಮಂಗಳವಾರ ಚಿತ್ರದ ಟೀಸರ್‌ ಬಿಡುಗಡೆ ಮಾಡಿದರೆ, “ಜಂಟಲ್‌ವುನ್‌’ ತಂಡದವರು ಚಿತ್ರದ ಮುಹೂರ್ತ ಮಾಡಿದ್ದಾರೆ.
ಪ್ರಜ್ವಲ್‌ ಹುಟ್ಟುಹಬ್ಬಕ್ಕೆ ಕಾಣಿಕೆಯಾಗಿ ಅರ್ಪಿಸಲಾದ “ಇನ್‌ಸ್ಪೆಕ್ಟರ್‌ ವಿಕ್ರಮ್‌’ ಚಿತ್ರದ ಟೀಸರ್‌, ಕಲಾವಿದರ ಸಂಘದ ಕಟ್ಟಡದಲ್ಲಿ ಬಿಡುಗಡೆಯಾಯಿತು. ಈ ಸಂದರ್ಭದಲ್ಲಿ ಪ್ರಜ್ವಲ್‌ ತಂದೆ ಹಾಗೂ ಹಿರಿಯ ನಟ ದೇವರಾಜ್‌, ತಾಯಿ ಚಂದ್ರಲೇಖ, ತಮ್ಮ ಪ್ರಣಾಮ್‌ ಸೇರಿದಂತೆ ಹಲವರು ಇದ್ದರು.
ಇಲ್ಲಿಂದ ಕೇಕು ಕತ್ತರಿಸುವುದಕ್ಕೆ ಪ್ರಾರಂಭವಾಯ್ತು. ಇನ್ನು ಹುಟ್ಟುಹಬ್ಬದ ದಿನವೇ ಪ್ರಜ್ವಲ್‌ ಹೊಸ ಚಿತ್ರ “ಜಂಟಲ್‌ವುನ್‌’ ಪ್ರಾರಂಭವಾಗಿದೆ. ಈ ಚಿತ್ರದ ಮುಹೂರ್ತಕ್ಕೆ ದರ್ಶನ್‌ ಬಂದು ಮೊದಲ ದೃಶ್ಯಕ್ಕೆ ಕ್ಲಾಪ್‌ ಮಾಡಿದರೆ, ದೇವರಾಜ್‌ ಕ್ಯಾಮೆರಾ ಆನ್‌ ಮಾಡಿದರು. ಬನಶಂಕರಿ 2ನೇ ಹಂತದಲ್ಲಿರುವ ಶ್ರೀ ಧರ್ಮಗಿರಿ ಮಂಜುನಾಥ ಸ್ವಾಮಿ ದೇವಸ್ಥಾನ ದಲ್ಲಿ ನಡೆದ ಈ ಮುಹೂರ್ತ ಸಮಾರಂಭದಲ್ಲೂ ಕೇಕು ಕತ್ತರಿಸಲಾಯಿತು.
