ಚಿನ್ನ ಗೆದ್ದ ಪ್ರದೀಪ್‌ ಸಿಂಗ್‌ ಕಾಮನ್‌ವೆಲ್ತ್‌ ಗೇಮ್ಸ್‌ಗೆ ಅರ್ಹತೆ

ಹೊಸದಿಲ್ಲಿ: ಆಸ್ಟ್ರೇಲಿಯದ ಗೋಲ್ಡ್‌ ಕೋಸ್ಟ್‌ನಲ್ಲಿ ನಡೆದ ಕಾಮನ್‌ವೆಲ್ತ್‌ ಯೂತ್‌, ಜೂನಿಯರ್‌ ಮತ್ತು ಸೀನಿಯರ್‌ ವೇಟ್‌ಲಿಫ್ಟಿಂಗ್‌ ಸ್ಪರ್ಧೆ ಕೊನೆಯ ಐದು ದಿನಗಳಲ್ಲಿ 34 ಭಾರತೀಯ ಲಿಫ್ಟರ್‌ಗಳು ನೂತನ ದಾಖಲೆ ನಿರ್ಮಿಸಿದ ಸಾಧನೆ ಮಾಡಿದ್ದಾರೆ. ಪ್ರದೀಪ್‌ ಸಿಂಗ್‌ ಚಿನ್ನ ಗೆಲ್ಲುವ ಮೂಲಕ ಮುಂದಿನ ವರ್ಷದ ಕಾಮನ್‌ವೆಲ್ತ್‌ ಗೇಮ್ಸ್‌ಗೆ ಅರ್ಹತೆ ಗಳಿಸಿದ್ದಾರೆ.

ಸ್ಪರ್ಧೆಯ ಅಂತಿಮ ದಿನ ಭಾರತ ಎರಡು ಚಿನ್ನ, ಒಂದು ಬೆಳ್ಳಿ ಮತ್ತು ಎರಡು ಕಂಚಿನ ಪದಕ ಗೆದ್ದುಕೊಂಡಿದೆ. 105 ಕೆ.ಜಿ. ವಿಭಾಗದಲ್ಲಿ ಸ್ಪರ್ಧಿಸಿದ ಪ್ರದೀಪ್‌ ಸ್ನ್ಯಾಚ್‌ನಲ್ಲಿ 147 ಕೆ.ಜಿ. ಮತ್ತು ಕ್ಲೀನ್‌ ಆ್ಯನ್‌x ಜರ್ಕ್‌ನಲ್ಲಿ 195 ಕೆ.ಜಿ. ಎತ್ತಿ ಚಿನ್ನ ಗೆದ್ದರು. ಈ ಸಾಧನೆ ವೇಳೆ ಅವರು ಸ್ನ್ಯಾಚ್‌ನಲ್ಲಿ ರಾಷ್ಟ್ರೀಯ ಸೀನಿಯರ್‌ ದಾಖಲೆ ನಿರ್ಮಿಸಿದರು.

+105 ಕೆ.ಜಿ. ವಿಭಾಗದಲ್ಲಿ ಸ್ಪರ್ಧಿಸಿದ ಗುರುದೀಪ್‌ ಸಿಂಗ್‌ ಒಟ್ಟು 371 ಕೆ.ಜಿ. ಎತ್ತಿ ಕಂಚಿನ ಪದಕ ಪಡೆದರು. ಸ್ನ್ಯಾಚ್‌ನಲ್ಲಿ ಅವರು ನೂತನ ದಾಖಲೆ ನಿರ್ಮಿಸಿದ್ದಾರೆ.ಜೂನಿಯರ್‌ ಪುರುಷರ ವಿಭಾಗದ 105 ಕೆ.ಜಿ. ವಿಭಾಗದಲ್ಲಿ ಲವ್‌ಪ್ರೀತ್‌ ಸಿಂಗ್‌ ಒಟ್ಟು 325 ಕೆ.ಜಿ. ಎತ್ತಿ ಚಿನ್ನ ಗೆದ್ದರೆ ತೇಜ್‌ಪಾಲ್‌ ಸಿಂಗ್‌ ಸಂಧು ಕಂಚು ಪಡೆದರು. ಜೂನಿಯರ್‌ ವನಿತಾ ವಿಭಾಗದಲ್ಲಿ ಪೂರ್ಣಿಮಾ ಪಾಂಡೆ ಬೆಳ್ಳಿಯ ಪದಕ ಗೆದ್ದಿದ್ದಾರೆ.