Fake Cop: ಪೊಲೀಸ್‌, ವಕೀಲನಂತೆ ಪೋಸ್‌ ಕೊಟ್ಟು ಹಣ ಲೂಟಿ; ಪತಿ ವಿರುದ್ಧ ದೂರು ನೀಡಿದ ಪತ್ನಿ

ಗ್ರೇಟರ್ ನೋಯ್ಡಾ: ‌ತನ್ನ ಪತಿ ಪೊಲೀಸ್‌ ಹಾಗೂ ವಕೀಲನಂತೆ ಪೋಸ್‌ ಕೊಟ್ಟು ಜನರ ಬಳಿ ಹಣ ಪೀಕುತಿದ್ದಾರೆ ಎಂದು ಆರೋಪಿಸಿ ಮಹಿಳೆಯೊಬ್ಬರು ದೂರು ದಾಖಲಿಸಿರುವ ಘಟನೆ ಗ್ರೇಟರ್ ನೋಯ್ಡಾದ ಗೌರ್ ನಗರದಲ್ಲಿ ನಡೆದಿದೆ.

ನಿಶಾ ಎನ್ನುವ ಮಹಿಳೆ ತನ್ನ ಪತಿ ತನುಜ್ ಸಿಂಗ್ ಪೊಲೀಸ್‌ ಅಧಿಕಾರಿ ಹಾಗೂ ವಕೀಲರಂತೆ ಪೋಸ್‌ ಕೊಟ್ಟು ಜನರಿಂದ ಹಣವನ್ನು ಲೂಟುತ್ತಿದ್ದಾರೆ ಎಂದು ಆರೋಪಿಸಿ ದೂರು ನೀಡಿದ್ದಾರೆ. ನನ್ನ ಹಾಗೂ ಮಕ್ಕಳ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ದೂರಿನಲ್ಲಿ ಹೇಳಿದ್ದಾರೆ.

ನಿಶಾ ಅವರ ದೂರಿನ ಮೇಲೆ ಆರೋಪಿ ತನುಜ್ ಸಿಂಗ್ ಮನೆಯಿಂದ ಪೊಲೀಸ್ ಸಮವಸ್ತ್ರ, ಐ-ಕಾರ್ಡ್ ಮತ್ತು ಇತರ ವಸ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ಪ್ರಿಯಕರನ ಜೊತೆ ಓಡಿ ಬಂದ ಯುವತಿ ಮೇಲೆ ಸಾಮೂಹಿಕ ದೈಹಿಕ ದೌರ್ಜನ್ಯ: ಪ್ರಿಯಕರನ ಮುಂದೆಯೇ ಕೃತ್ಯ

ತನ್ನ ಪತ್ನಿ ನಿಶಾ ಮನೆಗೆ ಕರೆದ ಕಾರಣ  ಜುಲೈ 12 ರಂದು ಆಕೆಯ ಮನೆಗೆ ಹೋಗಿದ್ದೆ. ಆದಾದ ಬಳಿಕ ನಿಶಾ ಅವರ ಕುಟುಂಬದ ಸದಸ್ಯರು ಹಾಗೂ ಸ್ನೇಹಿತರನ್ನು ಕರೆಸಿ ನನ್ನ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಗೌರ್ ಸಿಟಿ ನಿವಾಸಿ ತನುಜ್ ಸಿಂಗ್ ಶುಕ್ರವಾರ (ಜುಲೈ 14)  ಬಿಸ್ರಖ್ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.

ಪತ್ನಿ ನಿಶಾ ಜತೆಗಿನ ವಿವಾದದ ಹಿನ್ನೆಲೆಯಲ್ಲಿ ಹೋಟೆಲ್‌ನಲ್ಲಿ ಇರುವುದಾಗಿ ತನುಜ್‌ ಸಿಂಗ್‌ ದೂರಿನಲ್ಲಿ ತಿಳಿಸಿದ್ದಾರೆ.

ಇದಾದ ಎರಡು ದಿನದ ಬಳಿಕ ನಿಶಾ ಪತಿ ವಿರುದ್ಧ ವಂಚನೆ ಮತ್ತು ಕೌಟುಂಬಿಕ ದೌರ್ಜನ್ಯ ವಿರುದ್ಧ ದೂರು ನೀಡಿದ್ದಾರೆ.

ಈ ಬಗ್ಗೆ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಆರೋಪಿ ತನುಜ್ ಸಿಂಗ್ ಸದ್ಯ ತಲೆಮರೆಸಿಕೊಂಡಿದ್ದು, ಆತನ ಪತ್ತೆಗೆ ಪೊಲೀಸ್ ತಂಡವನ್ನು ರಚಿಸಲಾಗಿದೆ ಎಂದು ವರದಿ ತಿಳಿಸಿದೆ.