Assam: ಅಸ್ಸಾಂನಲ್ಲಿ ಬಹುಪತ್ನಿತ್ವ ನಿಷೇಧ!

ಗುವಾಹಟಿ: ಬಹುಪತ್ನಿತ್ವ ವ್ಯವಸ್ಥೆಯನ್ನು ಅಸ್ಸಾಂನಲ್ಲಿ ತಕ್ಷಣದಿಂದಲೇ ನಿಷೇಧಿಸಲು ರಾಜ್ಯ ಸರ್ಕಾರ ಯೋಜಿಸುತ್ತಿದೆ. ಮುಂಬರಲಿರುವ ವಿಧಾನಸಭೆ ಅಧಿವೇಶನದಲ್ಲಿ ಈ ಸಂಬಂಧಿಸಿದ ಮಸೂದೆಯನ್ನು ಮಂಡಿಸಲಾಗುವುದು ಎಂದು ಸಿಎಂ ಹಿಮಂತ ಬಿಸ್ವಾ ಶರ್ಮ ಗುರುವಾರ ತಿಳಿಸಿದ್ದಾರೆ. ಭಾರತದಲ್ಲಿ ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಜಾರಿ ವಿಚಾರದ ಕುರಿತು ಚರ್ಚೆಗಳ ನಡುವೆಯೇ, ಅಸ್ಸಾಂ ಸರ್ಕಾರದ ಈ ನಿಲುವು ಮಹತ್ವ ಪಡೆದುಕೊಂಡಿದೆ.

ಈಗಾಗಲೇ ಈ ಸಂಬಂಧಿಸಿದ ಕಾನೂನು ಅಂಶಗಳನ್ನು ಅನ್ವೇಷಿಸಲು ಸಮಿತಿಯನ್ನು ರಚಿಸಲಾಗಿತ್ತು. ವರದಿಗಳು ಸಿದ್ಧವಾಗಿವೆ. ಸೆಪ್ಟೆಂಬರ್‌ನಲ್ಲಿ ನಡೆಯಲಿರುವ ಅಧಿವೇಶನದಲ್ಲಿ ಮಸೂದೆ ಮಂಡಿಸುತ್ತೇವೆ. ಒಂದು ವೇಳೆ ಆಗ ಸಾಧ್ಯವಾಗದಿದ್ದಲ್ಲಿ, ಜನವರಿಯಲ್ಲಿ ಮಂಡಿಸುತ್ತೇವೆ. ಯುಸಿಸಿ ಜಾರಿಯಾದರೆ, ತಾನಾಗಿಯೇ ಬಹುಪತ್ನಿತ್ವ ವ್ಯವಸ್ಥೆ ರದ್ದುಗೊಳ್ಳುತ್ತದೆ ಆಗ ಈ ಕಾನೂನಿನ ಅಗತ್ಯವಿರುವುದಿಲ್ಲ. ಇಲ್ಲದಿದ್ದರೆ ರಾಜ್ಯದಲ್ಲಿ ಕಾನೂನು ರೂಪಿಸಲು ಮಸೂದೆ ಮಂಡಿಸುತ್ತೇವೆ. ಬಹುಪತ್ನಿತ್ವ ನಿಷೇಧವನ್ನು ಆಕ್ರಮಣದಿಂದಲ್ಲ, ಒಮ್ಮತದಿಂದಲೇ ನಿಷೇಧಿಸುತ್ತೇವೆ ಎಂಬ ಭರವಸೆಯನ್ನೂ ಬಿಸ್ವಾ ವ್ಯಕ್ತ ಪಡಿಸಿದ್ದಾರೆ.