ಹರಪನಹಳ್ಳಿ ಕೆರೆ ಸಚ್ಛಗೊಳಿಸಿದ ಪೊಲೀಸರು

ಆನೇಕಲ್‌: ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಪೊಲೀಸ್‌, ಆನೇಕಲ್‌ ಉಪ ಭಾಗದ ಪೊಲೀಸ್‌ರಿಂದ ವಿಶ್ವ ಪರಿಸರ ದಿನಾಚರಣೆ ಅಂಗವಾಗಿ ಕರೆ ಸ್ವಚ್ಛತಾ ಕಾರ್ಯ ನಡೆಯಿತು. ತಾಲೂಕಿನ ಬನ್ನೇರುಘಟ್ಟ ಆನೇಕಲ್‌ ರಸ್ತೆಯ ನಡುವಿನ ಹರಪನಹಳ್ಳಿ ಕೆರೆಯ ಸ್ವಚ್ಛತಾ ಕಾರ್ಯವನ್ನು ಆನೇಕಲ್‌ ಉಪ ಭಾಗದ ಡಿವೈಎಸ್ಪಿ ಎಸ್‌.ಕೆ.ಉಮೇಶ್‌ ಸಾರಥ್ಯದಲ್ಲಿ ಹಮ್ಮಿಕೊಳ್ಳಲಾಗಿತ್ತು.

ಸುಮಾರು ಮೂರು ಎಕರೆ ವಿಸ್ತೀರ್ಣದಲ್ಲಿರುವ ಕೆರೆಯಲ್ಲಿದ್ದ  ಗಿಡ, ಪ್ಲಾಸ್ಟಿಕ್‌ ತ್ಯಾಜ್ಯವನ್ನು ಸ್ವಚ್ಛಗೊಳಿಸಿದರು. ಮಂಗಳವಾರ ಬೆಳಗ್ಗೆ ಸುಮಾರು 7 ಗಂಟೆಗೆ ನಾಲ್ಕು ಜೆಸಿಬಿ ವಾಹನಗಳು, ಹತ್ತಕ್ಕೂ ಹೆಚ್ಚು ಟ್ರ್ಯಾಕ್ಟರ್‌ಗಳು, ನೂರಾರು ಪೊಲೀಸ್‌ ಸಿಬ್ಬಂದಿ, ಸ್ಥಳೀಯ ಕಾಲೇಜು ವಿದ್ಯಾರ್ಥಿಗಳು, ಕಾರ್ಖಾನೆ ಸಿಬ್ಬಂದಿ, ಸ್ಥಳೀಯ ಯುವಕರು, ಪರಿಸರ ಪ್ರೇಮಿಗಳು ಕೆರೆ ಸ್ವಚ್ಛತೆಗೆ ಮುಂದಾಗಿದ್ದರು.

ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಆಗಮಿಸಿ ಕರೆ ಸ್ವಚ್ಛತೆಗೆ ಚಾಲನೆ ನೀಡುತ್ತಿದ್ದಂತೆ ಖುದ್ದು  ಡಿವೈಎಸ್ಪಿ ಎಸ್‌.ಕೆ.ಉಮೇಶ್‌ ಬೋಟಿನ ಸಹಾಯದಿಂದ ಕೆರೆಗೆ ಇಳಿದು ಗಿಡ ಹೊರ ಹಾಕುವ ಕೆಲಸದಲ್ಲಿ ತೊಡಗಿದ್ದರು ಹಾಗೂ ಸಿಬ್ಬಂದಿ ತ್ಯಾಜ್ಯ ತೆಗೆಯಲು ಸಾಥ್‌ ನೀಡಿದರು. ಆನೇಕಲ್‌ ತಾಲೂಕಿನ ಸರ್ಜಾಪುರ, ಅತ್ತಿಬೆಲೆ, ಸೂರ್ಯಸಿಟಿ, ಹೆಬ್ಬಗೋಡಿ, ಆನೇಕಲ್‌ ಬನ್ನೇರುಘಟ್ಟ, ಪೊಲೀಸ್‌ ಠಾಣೆಯ ಇನ್ಸ್‌ಪೆಕ್ಟರ್‌, ಸಬ್‌ ಇನ್ಸ್‌ ಪೆಕ್ಟರ್‌ಗಳು ಸಹ ಕೆರೆ ಸ್ವಚ್ಛತೆಗೆ ಭಾಗಿಯಾಗಿದ್ದರು.