ಸರ್ಕಾರಿ ಕಚೇರಿಗಳಿಗೆ ಹೋದಾಗಲೋ, ಉದ್ಯೋಗ ಹುಡುಕುತ್ತಿರುವಾಗಲೋ ಅಥವಾ ಶಾಲಾ-ಕಾಲೇಜುಗಳಲ್ಲಿ ಕೆಲವೊಮ್ಮೆ ಆಧಾರ್‌ ಕಾರ್ಡ್‌ ಗಳನ್ನು ಕೇಳುವುದು ಈಗಂತೂ ಸಾಮಾನ್ಯ. ಇಂತಹ ಸಂದರ್ಭದಲ್ಲಿ ಈ ಆಧಾರ್‌ ಕಾರ್ಡ್‌ಗಳು ಕೂಡಾ ಎಟಿಎಂ ಕಾರ್ಡ್‌ನಂತೆಯೇ ಇದ್ದರೆ ಎಷ್ಟೊಂದು ಚೆನ್ನಾಗಿರುತ್ತಿತ್ತು ಅನಿಸುವುದು ಸಹಜ.
ಅಂಥವರಿಗಾಗಿಯೇ ಇದೀಗ ಭಾರತದ ವಿಶಿಷ್ಟ ಗುರುತು ಪ್ರಾಧಿಕಾರ (ಯುಐಡಿಎಐ) ಎಟಿಎಂ ಗಾತ್ರದ ಆಧಾರ್‌ ಕಾರ್ಡ್‌ ನೀಡಲಿದೆ!
ಏನಿದು ಪಾಕೆಟ್‌ ಆಧಾರ್‌ ಕಾರ್ಡ್‌? : ಅತ್ಯಾಧುನಿಕ ಭದ್ರತಾ ಪೀಚರ್‌ ಹೊಂದಿರಲಿರುವ ಈ ಕಾರ್ಡ್‌ನ ಎಟಿಎಂ ಕಾರ್ಡ್‌ ಗಾತ್ರದಲ್ಲಿ ಪಾಲಿವಿನಿಲ್‌ ಕ್ಲೋರೈಡ್‌ (ಪಿವಿಸಿ)ಕಾರ್ಡ್‌ ನಲ್ಲಿ ಮುದ್ರಿಸಲಾಗುತ್ತದೆ. ಇದರಿಂದಾಗಿ ಆಧಾರ್‌ ಕಾರ್ಡ್‌ಗಳನ್ನು ಜೇಬಿನಲ್ಲಿಯೇ ಸುಲಭವಾಗಿ ಕೊಂಡೊಯ್ಯಬಹುದಾಗಿದೆ.
ಕಾರ್ಡ್‌ ಪಡೆಯುವುದು ಹೇಗೆ? :
ಈಗಾಗಲೇ ಆಧಾರ್‌ ಕಾರ್ಡ್‌ ಹೊಂದಿರುವ ಜನರು ಪಿವಿಸಿ ಕಾರ್ಡ್‌ ಪಡೆಯಬಹುದಾಗಿದೆ. ಯುಐಡಿಎಐನ ಅಧಿಕೃತ ವೆಬ್‌ಸೈಟ್‌
https://uidai.gov.in/ ಅಥವಾ
https://resident.gov.in/ ಗೆ ಭೇಟಿ ನೀಡಿ “ಆರ್ಡರ್‌ ಆಧಾರ್‌ ಕಾರ್ಡ್‌’ ಆಯ್ಕೆ ಮೇಲೆ ಕ್ಲಿಕ್‌ ಮಾಡಬೇಕು. ನಂತರ ಮುಂಬರುವ ಸೂಚನೆಗಳನ್ನು ಪಾಲಿಸುತ್ತಾ ಹೋದಂತೆ ಕೊನೆಯಲ್ಲಿ ಮನವಿ ಸ್ವೀಕೃತಗೊಳ್ಳುತ್ತದೆ. ಶುಲ್ಕ ಕೇವಲ ರೂ.50 ಪಾವತಿಸಿ ಪಿವಿಸಿ ಆಧಾರ್‌ಕಾರ್ಡ್‌ಗೆ ಮನವಿ ಸಲ್ಲಿಸಿದ 5-6 ದಿನದೊಳಗೆ ಸ್ಪೀಡ್‌ ಪೋಸ್ಟ್ ಮೂಲಕ ಆರ್ಡರ್‌ ಮಾಡಿದವರ ಮನೆಗೆ ತಲುಪಲಿದೆ ಎಂದು ಯುಐಡಿಎಐ ಹೇಳಿದೆ.
ಆಧಾರ್‌ ಪಿವಿಸಿ ಕಾರ್ಡ್‌ನ ಸೇವೆಯಲ್ಲಿ…..
- ಉತ್ತಮ ಗುಣಮಟ್ಟದ ಮುದ್ರಣ.
- ಪಿವಿಸಿ ಕಾರ್ಡ್‌ಗೆ ಹೆಚ್ಚು ಬಾಳಿಕೆ. ಒಯ್ಯಲು ಅನುಕೂಲಕರ.
- ಹಾಲೋಗ್ರಾಂ, ಘೋಸ್ಟ್
ಇಮೇಜ್‌ ಮೊದಲಾದ ಭದ್ರತಾ ಫೀಚರ್‌.
- ಕಾರ್ಡ್‌ನಲ್ಲಿ ಉಬ್ಬಿದ ಆಧಾರ್‌ ಲಾಂಛನ ಇರುತ್ತದೆ.
- ಮಳೆಯಲ್ಲೂ ಹಾಳಾಗದ ಕಾರ್ಡ್‌.
- ಆಫ್ಲೈನ್‌ ಮೂಲಕವೂ ಪರಿಶೀಲಿಸಬಹುದು.
-ಎಂ.ಎಸ್‌. ಹೊನ್ನಾವರ 