ಪ್ರಧಾನಿ ಮೋದಿ ಭೇಟಿ ಮಾಡಿದ ಅಂಡರ್‌-17 ಫ‌ುಟ್ಬಾಲ್‌ ತಂಡ

ಹೊಸದಿಲ್ಲಿ: ಭಾರತೀಯ ಕ್ರೀಡಾ ಇತಿಹಾಸದಲ್ಲಿಯೇ ಮೊದಲ ಬಾರಿ ಫಿಫಾ ಅಂಡರ್‌ 17 ವಿಶ್ವಕಪ್‌ನಲ್ಲಿ ರಾಷ್ಟ್ರವನ್ನು ಪ್ರತಿನಿಧಿಸಿದ ಭಾರತೀಯ ಅಂಡರ್‌ 17 ಫ‌ುಟ್ಬಾಲ್‌ ತಂಡದ ಸದಸ್ಯರು ಶುಕ್ರವಾರ ಪ್ರಧಾನಮಂತ್ರಿಗಳ ಕಚೇರಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಿದರು.

ಸೌದಿ ಅರೇಬಿಯಾದಲ್ಲಿ ನಡೆದ ಎಎಫ್ಸಿ ಅಂಡರ್‌-19 ಫ‌ುಟ್ಬಾಲ್‌ ಅರ್ಹತಾ ಕೂಟದಲ್ಲಿ ಆಡಿ ಮರಳಿದ ಬಳಿಕ ಪ್ರಧಾನಿಯವರು ಅಂಡರ್‌-19 ತಂಡಕ್ಕೆ ಭೇಟಿ ಮಾಡುವಂತೆ ಆಹ್ವಾನ ನೀಡಿದ್ದರು.

ಪ್ರಧಾನಿ ಭೇಟಿಗೆ ಸ್ವತಃ ನಾನು ವೈಯಕ್ತಿಕವಾಗಿ ಮನವಿ ಮಾಡಿದ್ದೆ. ಯಾಕೆಂದರೆ ಅಂಡರ್‌ 17 ವಿಶ್ವಕಪ್‌ ವೇಳೆ ನಾನು ಆಟಗಾರರ ನಿರ್ವಹಣೆಯನ್ನು ಗಮನಿಸಿದ್ದೇನೆ. ನಿಮ್ಮ ನಿರ್ವಹಣೆಯಿಂದಾಗಿ ಜನರು ನಿಮ್ಮ ಬಗ್ಗೆ ಮಾತನಾಡಿಕೊಳ್ಳುತ್ತಿದ್ದಾರೆ. ಹಾಗಾಗಿ ನಿಮ್ಮ ಮೇಲೆ ಹೆಚ್ಚಿನ ಜವಾಬ್ದಾರಿಯಿದೆ. ಈ ಕಾರಣಕ್ಕಾಗಿ ಇಲ್ಲಿಗೆ ಕರೆಸಿಕೊಂಡಿದ್ದೇನೆ ಎಂದು ಮೋದಿ ಹೇಳಿದರು.

ಆಟಗಾರರು ಒಂದು ತಂಡವಾಗಿ ಆಡಬೇಕು ಮತ್ತು ಮುಂದಿನ ಕೆಲವು ವರ್ಷಗಳಲ್ಲಿ ವೃತ್ತಿಪರ ಆಟಗಾರರಂತೆ ಪಳಗಬೇಕು. ಭವಿಷ್ಯದಲ್ಲಿ ಬಲಿಷ್ಠ ತಂಡವನ್ನು ರೂಪಿಸಿಕೊಳ್ಳಲು ಈ ಅಂಡರ್‌ 17 ವಿಶ್ವಕಪ್‌ ಒಂದು ಅಭ್ಯಾಸ ಸ್ಪರ್ಧೆಯೆಂದು ಪರಿಗಣಿಸಬೇಕು ಎಂದು ಮೋದಿ ತಿಳಿಸಿದರು.