Advertisement
ಏನಿದು ವರದಿ?ನ್ಯೂಜಿಲ್ಯಾಂಡ್‌ನ ಆಕ್ಲೆಂಡ್‌ನ‌ಲ್ಲಿ ಕಳೆದೆರಡು ವರ್ಷಗಳಿಂದ ನಡೆಸಲಾದ ಅಧ್ಯಯನದ ವರದಿಯನ್ನು ಇದೇ ಡಿ.12ರಂದು ಪರಿಸರ ವಿಜ್ಞಾನಕ್ಕೆ ಸಂಬಂಧಿಸಿದ ನಿಯತಕಾಲಿಕದಲ್ಲಿ ಪ್ರಕಟಿಸಲಾಗಿದೆ. ಈ ವರದಿಯ ಪ್ರಕಾರ ಆಕ್ಲೆಂಡ್‌ನ‌ಲ್ಲಿ 74 ಟನ್‌ಗಳಷ್ಟು ಮೈಕ್ರೋಪ್ಲಾಸ್ಟಿಕ್‌ಗಳು ಗಾಳಿಯಲ್ಲಿ ಸೇರಿಕೊಂಡು ಮನೆ, ಕಟ್ಟಡಗಳ ಛಾವಣಿಗಳು, ಉದ್ಯಾನಗಳು ಮತ್ತು ಇತರ ಮೇಲ್ಮೆ„ಗಳಲ್ಲಿ ನೆಲೆಗೊಂಡಿದ್ದವು. ಅಷ್ಟು ಮಾತ್ರವಲ್ಲದೆ ಇಲ್ಲಿ ಸಂಗ್ರಹಿಸಲಾಗಿದ್ದ ಮೈಕ್ರೊಪ್ಲಾಸ್ಟಿಕ್‌ನ ಪ್ರಮಾಣವು ಮೂರು ಮಿಲಿಯನ್‌ ಪ್ಲಾಸ್ಟಿಕ್‌ ಬಾಟಲಿಗಳಿಗೆ ಸಮನಾಗಿರುತ್ತದೆ ಎಂದು ತಿಳಿದುಬಂದಿತ್ತು. ಪ್ಲಾಸ್ಟಿಕ್‌ ಹಿಮ ಮಳೆ ಅಥವಾ ಮಳೆ ಕಾಲ್ಪನಿಕವಲ್ಲ. ಇದು ಈಗಾಗಲೇ ನಗರ ಪ್ರದೇಶಗಳಲ್ಲಿ ವಾಸ್ತವವಾಗಿಯೂ ಸುರಿಯತೊಡಗಿದೆ. ಈ ಮಳೆಯನ್ನು ನಾವು ಬರಿಗಣ್ಣಿನಿಂದ ನೋಡಲು ಸಾಧ್ಯವಾಗದಿದ್ದರೂ ಅತೀಸೂಕ್ಷ್ಮವಾಗಿ ಪರಿಶೀಲನೆ ಅಥವಾ ಅಧ್ಯಯನ ನಡೆಸಿದಾಗ ಇದು ಗೋಚರಿಸಿದೆ. ಅಂದರೆ ಪ್ಲಾಸ್ಟಿಕ್‌ನ ಸೂಕ್ಷ್ಮಕಣಗಳು ವಾತಾವರಣವನ್ನು ಸೇರ್ಪಡೆ ಯಾಗಿರುವುದನ್ನು ಇದು ದೃಢಪಡಿಸಿದೆ.
ಈ ಸೂಕ್ಷ್ಮ ಪ್ಲಾಸ್ಟಿಕ್‌ ಕಣಗಳು 5 ಮಿ.ಮೀ.ಗಿಂತಲೂ ಕಡಿಮೆ ಉದ್ದವಿದ್ದು, ನಮ್ಮ ಆಹಾರ ಸರಪಳಿಗಳಲ್ಲಿ ಸೇರಿಕೊಂಡು ರಕ್ತನಾಳಗಳನ್ನು ಸೇರಿಕೊಳ್ಳುತ್ತದೆ. ಈ ಹೊಸ ಪ್ರಸರಣ ವಿಧಾನ ನಗರಗಳಲ್ಲಿ ವಾಸಿಸುತ್ತಿರುವವರಲ್ಲಿ ಹೆಚ್ಚಾಗಿ ಕಂಡು ಬಂದಿದ್ದು ಅವರ ಆರೋಗ್ಯಕ್ಕೆ ಮಾರಕವಾಗಿ ಪರಿಣಮಿಸಿದೆ. ವಾತಾವರಣದಲ್ಲಿ, ಮೋಡ ಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಸೇರಿಕೊಂಡಿರುವುದು ಗೊತ್ತಿರುವ ವಿಚಾರವಾದರೂ ಈ ಸಮಸ್ಯೆಯ ಪ್ರಮಾಣವನ್ನು ಪ್ರಮಾಣಿಕರಿಸಲು ನಡೆಸಿದ ಮೊದಲ ಅಧ್ಯಯನ ಇದಾಗಿದೆ. ಮುಂದಿನ ದಿನಗಳಲ್ಲಿ ಪ್ಲಾಸ್ಟಿಕ್‌ ಬಳಕೆಗೆ ಕಡಿವಾಣ ಹಾಕದೇ ಹೋದಲ್ಲಿ ಕೆಲವೇ ದಶಕಗಳಲ್ಲಿ ಇದು ಭೂಮಿಯ ಮೇಲಣ ಪ್ರತಿಯೊಂದೂ ಜೀವಿ ಮತ್ತು ಪರಿಸರದ ಮೇಲೆ ಅತ್ಯಂತ ಬೀಕರ ಪರಿಣಾಮ ಬೀರುವುದರಲ್ಲಿ ಸಂದೇಹವಿಲ್ಲ. ಇದೊಂದು ಗಂಭೀರ ಸಮಸ್ಯೆಯಾಗಿದ್ದು, ತಿಳಿದೊ ತಿಳಿಯದೆಯೊ ನಾವೆಲ್ಲರೂ ಇದನ್ನು ನಿರ್ಲಕ್ಷಿಸುತ್ತಿದ್ದೇವೆ ಎನ್ನುತ್ತಾರೆ ವಿಜ್ಞಾನಿಗಳು. ಸಂಶೋಧನೆ ಏನು ಹೇಳುತ್ತದೆ?
ಆಕ್ಲೆಂಡ್‌ ವಿಶ್ವವಿದ್ಯಾನಿಲಯದ ಸಂಶೋಧಕರು ಈ ಬಗ್ಗೆ ಕೆಲವು ಸಂಶೋಧನೆಗಳನ್ನು ನಡೆಸಿದ್ದಾರೆ. ವಾತಾವರಣದಲ್ಲಿರುವ ಮೈಕ್ರೋಪ್ಲಾಸ್ಟಿಕ್‌ ಕಣಗಳನ್ನು ಗುರುತಿಸಲು ಶಾಖವನ್ನು ಹಲವು ರೀತಿಯಲ್ಲಿ ಬಳಸಿಕೊಂಡಿದ್ದರು. ಏಕೆಂದರೆ ಇವು ಬರಿಗಣ್ಣಿಗೆ ಕಾಣಸಿಗುವುದಿಲ್ಲ. ಇದಕ್ಕೆ ಪರಿಮಳವಿಲ್ಲ, ರುಚಿಯೂ ಇಲ್ಲ. ಈ ಸಂಶೋಧನೆಯ ವೇಳೆ ಕಂಡುಕೊಂಡಂತೆ ದಿನವೊಂದರಲ್ಲಿ ಒಂದು ಚದರ ಮೀಟರ್‌ ವ್ಯಾಪ್ತಿಯಲ್ಲಿ ಸರಾಸರಿ 4,885 ಪ್ಲಾಸ್ಟಿಕ್‌ ಕಣಗಳು ಸಂಗ್ರಹವಾಗಿವೆ. ಅಂದರೆ ಒಂದು ವರ್ಷದಲ್ಲಿ 74 ಮೆಟ್ರಿಕ್‌ ಟನ್‌ ಪ್ಲಾಸ್ಟಿಕ್‌ ಸಂಗ್ರಹವಾಗುತ್ತದೆ. ಇದು 3 ಮಿಲಿಯನ್‌ ಪ್ಲಾಸ್ಟಿಕ್‌ ಬಾಟಲಿಗಳಿಗೆ ಸಮಾನವಾಗಿರುತ್ತದೆ.
Related Articles
ಫ್ರೆಡೋನಿಯಾದಲ್ಲಿ ಸ್ಟೇಟ್‌ ಯೂನಿವರ್ಸಿಟಿ ಆಫ್ ನ್ಯೂಯಾರ್ಕ್‌ ನಡೆಸಿದ ಅಧ್ಯಯನದಲ್ಲಿ ಶೇ. 93ರಷ್ಟು ನೀರಿನ ಬಾಟಲಿಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಕಣಗಳಿರುವುದು ಪತ್ತೆಯಾಗಿತ್ತು. ಪ್ರತೀ ಲೀಟರ್‌ ಬಾಟಲಿ ನೀರಿನಲ್ಲಿ ಸರಾಸರಿ 325 ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಕಂಡುಬಂದಿದ್ದವು. ಈ ತೀರ್ಮಾನಕ್ಕೆ ಬರುವ ಮೊದಲು ಸಂಶೋಧಕರು 11 ಬ್ರ್ಯಾಂಡ್‌ಗಳ 259 ಬಾಟಲಿಗಳನ್ನು ಪರೀಕ್ಷಿಸಿದ್ದರು. ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಪ್ಯಾಕೇಜಿಂಗ್‌ ಅಥವಾ ಬಾಟಲಿಂಗ್‌ ಪ್ರಕ್ರಿಯೆ ವೇಳೆ ಭಾಗಶಃ ಸೇರ್ಪಡೆಯಾಗುತ್ತಿರುವುದು ಕೂಡ ಈ ಅಧ್ಯಯನದ ವೇಳೆ ಸಾಬೀತಾಗಿತ್ತು.
Advertisement
ಎಲ್ಲೆಲ್ಲಿ?ಇತ್ತೀಚಿನ ವರ್ಷಗಳಲ್ಲಿ ಲಂಡನ್‌, ಹ್ಯಾಂಬರ್ಗ್‌ ಮತ್ತು ಪ್ಯಾರಿಸ್‌ನಲ್ಲಿಯೂ ಗಾಳಿಯಲ್ಲಿ ಮೈಕ್ರೋಪ್ಲಾಸ್ಟಿಕ್‌ನ ಮಟ್ಟ ಕಂಡು ಬಂದಿದೆ. ಆದರೆ ಆಕ್ಲೆಂಡ್‌ನ ಗಾಳಿಯಲ್ಲಿ ಕಂಡುಬರುವ ಮಟ್ಟಕ್ಕಿಂತ ಹಲವು ಪಟ್ಟು ಕಡಿಮೆಯಾಗಿದೆ. ಅತ್ಯಾಧುನಿಕ ರಾಸಾಯನಿಕ ವಿಧಾನಗಳನ್ನು ಬಳಸಿಕೊಂಡು ವಿಜ್ಞಾನಿಗಳು ನಡೆಸಿದ ಹೊಸ ಅಧ್ಯಯನದಲ್ಲಿ ಮಿಲಿಮೀಟರ್‌ನ 0.01 ರಷ್ಟು ಸಣ್ಣ ಕಣಗಳನ್ನು ಹುಡುಕಿದ್ದೇ ಅಲ್ಲದೆ ಅದರ ಬಗ್ಗೆ ವಿಶ್ಲೇಷಣೆಯನ್ನೂ ನಡೆಸಿದ್ದಾರೆ. ಹಿಂದೇನಾಗಿತ್ತು?
ಬ್ರಿಟನ್‌ನಲ್ಲಿ 2020ರಲ್ಲಿ ಇದೇ ರೀತಿಯ ಕೆಲವು ಸಂಶೋಧನೆಗಳನ್ನು ಮಾಡ ಲಾಗಿತ್ತು. ಸರಾಸರಿ 771 ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಲಂಡನ್‌ನಲ್ಲಿ ಬೀಳುತ್ತವೆ ಎಂಬುದು ಸಾಬೀತಾಗಿತ್ತು. ಆದರೆ ಇದು ಆಕ್ಲೆಂಡ್‌ನ ಸಂಖ್ಯೆಗಿಂತ 6 ಪಟ್ಟು ಕಡಿಮೆ ಯಾಗಿತ್ತು. ಆದರೆ ಲಂಡನ್‌ನಲ್ಲಿ ಪರಿಸರ ಮಾಲಿನ್ಯ ಕಡಿಮೆ ಇದೆ ಎಂದು ಇದರ ಅರ್ಥವಲ್ಲ. ಹಿಂದಿನ ದಿನಗಳಲ್ಲಿ ಇವುಗಳನ್ನು ಅಂದಾಜು ಮಾಡಿರದ ಕಾರಣ ಈ ಅಂಕಿಅಂಶ ಕಡಿಮೆ ಯಾಗಿರುವಂತೆ ತೋರುತ್ತದೆ. ಹೇಗೆ ರೂಪುಗೊಳ್ಳುತ್ತದೆ?
ಮೈಕ್ರೋ ಪ್ಲಾಸ್ಟಿಕ್‌ ಕಣಗಳು ಪ್ಲಾಸ್ಟಿಕ್‌ ಉತ್ಪನ್ನಗಳ ತಯಾರಿಕೆಯ ಸಂದರ್ಭ ಮತ್ತು ದೊಡ್ಡ ದೊಡ್ಡ ಪ್ಲಾಸ್ಟಿಕ್‌ ವಸ್ತುಗಳು ಒಡೆಯುವುದರಿಂದ ಉಂಟಾಗುತ್ತದೆ. ಇವು ಮಳೆ ಬರುವ ಸಂದರ್ಭ ಸಮುದ್ರ, ನದಿ ಹೀಗೆ ನೀರಿನಲ್ಲಿ ಸೇರಿಕೊಳ್ಳುತ್ತದೆ. ಸಂಶೋಧಕರ ಪ್ರಕಾರ ನೀರಿಗೆ ಸೇರಿದ ಪ್ಲಾಸ್ಟಿಕ್‌ ಕಣಗಳು ಅವುಗಳಲ್ಲಿ ಕರಗದೆ ಹಾಗೇ ವರ್ಷಗಟ್ಟಲೆ ಉಳಿದುಹೋಗಬಹುದು. ಹೀಗೆ ಇವು ನೀರಿನೊಟ್ಟಿಗೆ ಸೇರಿ ವಾತಾವರಣವನ್ನು ಸೇರಿಬಿಡುತ್ತವೆ. ಹೇಗಿದೆ ಪರಿಸ್ಥಿತಿ?
ಈಗ ಮಳೆ ನೀರು, ಸಮುದ್ರ, ಆಹಾರ ಮತ್ತು ಆಹಾರ ಸರಪಳಿಯಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಸೇರಿಕೊಂಡಿವೆ ಎಂದು ವಿಜ್ಞಾನಿಗಳು ಹೇಳುತ್ತಾರೆ. ಆಕ್ಲೆಂಡ್‌ನ‌ಲ್ಲಿ ನಡೆಸಿದ ಸಂಶೋಧನೆಯಲ್ಲಿ ಕಂಡುಬಂದ ಮೈಕ್ರೋಪ್ಲಾಸ್ಟಿಕ್‌ ಕಣಗಳ ಗಾತ್ರ 10 ರಿಂದ 50 ಮೈಕ್ರೋಮೀಟರ್‌ಗಳಷ್ಟಿತ್ತು. ಈ ಕಣಗಳಲ್ಲಿ ಹೆಚ್ಚಿನವು ಪ್ಲಾಸ್ಟಿಕ್‌ನಿಂದ ಕೂಡಿದ್ದವು. ಕೇವಲ ಶೇ.3ರಷ್ಟು ಪ್ಲಾಸ್ಟಿಕ್‌ ಕಣಗಳು 100 ಮೈಕ್ರೋಮೀಟರ್‌ಗಳಿಗಿಂತ ಹೆಚ್ಚಿನ ಗಾತ್ರವನ್ನು ಹೊಂದಿದ್ದವು. ಪ್ರಸ್ತುತ ಗಾಳಿಯಲ್ಲಿರುವ ಮೈಕ್ರೋಪ್ಲಾಸ್ಟಿಕ್‌ ಕಣಗಳು ನಮ್ಮ ಆರೋಗ್ಯದ ಮೇಲೆ ಯಾವ ಪರಿಣಾಮ ಬೀರುತ್ತವೆ ಎಂಬುದನ್ನು ವಿಜ್ಞಾನಿಗಳು ಸಂಶೋಧನೆಗಳ ಮೂಲಕ ತಿಳಿದುಕೊಳ್ಳುತ್ತಿದ್ದಾರೆ. ಒಂದು ವರದಿಯ ಪ್ರಕಾರ, ಪ್ರತೀ ವರ್ಷ ಸರಾಸರಿ 74 ಸಾವಿರ ಪ್ಲಾಸ್ಟಿಕ್‌ ಕಣಗಳು ಮನುಷ್ಯನ ದೇಹವನ್ನು ಸೇರುತ್ತವೆ. ಈ ವರ್ಷದ ಮಾರ್ಚ್‌ನಲ್ಲಿ ವಿಜ್ಞಾನಿಗಳು ಮೊದಲ ಬಾರಿಗೆ ಮಾನವ ರಕ್ತದಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಸೇರ್ಪಡೆಗೊಂಡಿರುವುದನ್ನು ಪತ್ತೆ ಹಚ್ಚಿದ್ದರು. ಉಸಿರಾಟದ ವೇಳೆ ಮೈಕ್ರೋಪ್ಲಾಸ್ಟಿಕ್‌ ಕಣಗಳು ಮಾನವ ದೇಹವನ್ನು ಪ್ರವೇಶಿಸುತ್ತಿರುವುದು ಈಗಾಗಲೇ ದೃಢಪಟ್ಟಿದೆ. ಕರ್ನಾಟಕದಲ್ಲೂ ನಡೆದಿತ್ತು ಸಂಶೋಧನೆ
ಬೆಂಗಳೂರು ಮೂಲದ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್ ಸೈನ್ಸ್‌ (ಐಐಎಸ್ಸಿ) ಸಂಶೋಧಕರು 2022ರ ಎಪ್ರಿಲ್‌ನಲ್ಲಿ ಹೊಸ ಅಧ್ಯಯನ ನಡೆಸಿದ್ದು ದಕ್ಷಿಣ ಭಾರತದ ಕಾವೇರಿ ನದಿಯಲ್ಲಿರುವ ಮೀನುಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಅನ್ನು ಕಂಡುಹಿಡಿದಿದ್ದರು. ಕರ್ನಾಟಕದ ಮಂಡ್ಯ ಜಿÇÉೆಯಲ್ಲಿ ಕಾವೇರಿ ನದಿಯ ಉಪನದಿ ಗಳಾದ ಹೇಮಾವತಿ ಮತ್ತು ಲಕ್ಷ್ಮಣ ತೀರ್ಥಗಳ ಸಂಗಮದ ಕೆಳಗೆ ಇರುವ ಕೃಷ್ಣರಾಜ ಸಾಗರ ಅಣೆಕಟ್ಟಿನಲ್ಲಿ ಈ ಅಧ್ಯಯನವನ್ನು ನಡೆಸಲಾಗಿತ್ತು. ಮುಂದೇನು?
ಪ್ಲಾಸ್ಟಿಕ್‌ ನಿರ್ಮೂಲನೆಯಾಗದ ಹೊರತು ಈ ಸಮಸ್ಯೆ ಪರಿಹಾರವಾಗುವುದಿಲ್ಲ. ಮುಂದಿನ ದಿನಗಳಲ್ಲಿ ಯಾವ ಕಾರಣಕ್ಕೂ ಪ್ಲಾಸ್ಟಿಕ್‌ ಬಳಕೆಯಾಗಬಾರದು. ಆದರೂ ಈ ಹಿಂದೆ ನಾವು ಉಪಯೋಗಿಸಿದ್ದ ಪ್ಲಾಸ್ಟಿಕ್‌ಗಳ ಪ್ರಮಾಣವೇ ಹೆಚ್ಚಿರುವುರಿಂದ ಆರೋಗ್ಯದ ವಿಷಯದಲ್ಲಿ ಸ್ವಲ್ಪ ಮಟ್ಟಿನ ಕಾಳಜಿ ವಹಿಸುವುದರ ಜತೆಗೆ ನಮ್ಮ ಮುಂದಿನ ಪೀಳಿಗೆಗೆ ಪ್ಲಾಸ್ಟಿಕ್‌ ಬಳಸದಿರುವಂತೆ ಜಾಗೃತಿ ಮೂಡಿಸಬೇಕು. ಹಾಗಾದಾಗ ಮಾತ್ರ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಸಾಧ್ಯ. ಪ್ಲಾಸ್ಟಿಕ್‌ ತ್ಯಾಜ್ಯ ಪರಿಸರವನ್ನು ಸೇರದಂತೆ ಎಚ್ಚರಿಕೆ ವಹಿಸಬೇಕು. ಮರುಬಳಕೆಯ ಪ್ಲಾಸ್ಟಿಕ್‌ ವಸ್ತುಗಳನ್ನಷ್ಟೇ ಉತ್ಪಾದಿಸಬೇಕು. ಇವೆಲ್ಲ ಕಾರ್ಯಸಾಧ್ಯವಾದಲ್ಲಿ ಮಾತ್ರವೇ ಪ್ಲಾಸ್ಟಿಕ್‌ ಮುಕ್ತ ಸಮಾಜ ನಿರ್ಮಾಣ ಸಾಧ್ಯ. ಇನ್ನೂ ಎಚ್ಚೆತ್ತುಕೊಳ್ಳದೇ ಹೋದಲ್ಲಿ ಇಂದು ವಿಶ್ವದ ಬೃಹತ್‌ ದೇಶ, ನಗರಗಳಲ್ಲಿ ಈಗ ಕಾಣುತ್ತಿರುವ ಪ್ಲಾಸ್ಟಿಕ್‌ ತ್ಯಾಜ್ಯದ ಸಮಸ್ಯೆ ಹಳ್ಳಿ ಹಳ್ಳಿಗಳಿಗೂ ವ್ಯಾಪಿಸಿ ಕೇವಲ ಮನುಕುಲವನ್ನು ಮಾತ್ರವಲ್ಲ ಇಡೀ ಭೂಮಿಯನ್ನೇ ಬರಡಾಗಿಸುವುದು ನಿಶ್ಚಿತ. - ಪ್ರೀತಿ ಭಟ್‌ ಗುಣವಂತೆ