ಪ್ಲಾಸ್ಟಿಕ್‌ ನಿಷೇಧಕ್ಕೆ ಪುರಸಭೆ ಹಿಂದೇಟು

ಹೊಳೆನರಸೀಪುರ: ಪಟ್ಟಣದ ಅಭಿವೃದ್ಧಿ ಹಾಗೂ ಸ್ವಚ್ಛತೆಗೆ ಜಿಲ್ಲಾಡಳಿತ ತಿರ್ಮಾನಿಸಿ ಆ.15ರಿಂದ ಸ್ವಚ್ಛ ಹಾಗು ಪ್ಲಾಸ್ಟಿಕ್‌ ಮುಕ್ತ ನಗರವನ್ನಾಗಿಸುವ ಅದೇಶ ಹಾಗೂ ಸೂಚನೆ ನೀಡಿದ್ದರೂ ಪುರಸಭೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಪಟ್ಟಣದಲ್ಲಿ ಪಾrಸ್ಟಿಕ್‌ ನಿಷೇಧವಾಗಿಲ್ಲ.

ವರ್ತಕರ ವಿರೋಧ: ಕಳೆದ ಮೇ ತಿಂಗಳ ಮಧ್ಯ ಭಾಗದಲ್ಲಿ ಜಿಲ್ಲಾಡಳಿತ ಉಪವಿಭಾಗಧಿಕಾರಿಗಳ ನೇತೃತ್ವದಲ್ಲಿ ಪುರಸಭೆ ಮುಖ್ಯಾಧಿಕಾರಿಗಳ ಸಭಾಂಗಣ ದಲ್ಲಿ ಜಿಲ್ಲಾ ಮಟ್ಟದ ಅಧಿಕಾರಿಗಳು ಸಭೆ ನಡೆಸಿ ಜೂ.1ರಿಂದ ಹೊಳೆನರಸೀಪುರ ಪಟ್ಟಣವನ್ನು ಪ್ಲಾಸ್ಟಿಕ್‌ ಮುಕ್ತವಾಗಿಸುವುದಾಗಿ ಘೋಷಿಸಿತು.

ಅಂದು ಸಭೆಯಲ್ಲಿ ಹಾಜರಿದ್ದ ಪಟ್ಟಣದ ವರ್ತಕರ ಸಂಘದ ಪ್ರತಿನಿಧಿಗಳು ಏಕಾ ಏಕಿ ಪ್ಲಾಸ್ಟಿಕ್‌ ಮುಕ್ತಗೊಳಿಸುವ ನಿಟ್ಟಿನಲ್ಲಿ ಜಿಲ್ಲಾಡಳಿತ ಕೈಗೊಳ್ಳುವ ಕಠಿಣ ನಿಧಾರದಿಂದ ಪಟ್ಟಣದ ವರ್ತಕರು ಸಾಕಷ್ಟು ಸಂಕಷ್ಟ ಎದುರಿಸಬೇಕಾಗುತ್ತದೆ. ಆದ್ದರಿಂದ ಪಟ್ಟಣದಲ್ಲಿ ಚಾಲ್ತಿಇರುವ ಪ್ಲಾಸ್ಟಿಕ್‌ ಕವರ್‌ಗಳು ಸೇರಿದಂತೆ ಎಲ್ಲಾ ಬಗೆಯ ಪ್ಲಾಸ್ಟಿಕ್‌ ಮುಕ್ತಗೊಳಿಸಲು ಕಾಲಾವಕಾಶ ನೀಡಬೇಕೆಂದು ಜೂ.1ರ ಬದಲಾಗಿ ಆ.15 ರಿಂದ ಪಟ್ಟಣವನ್ನು ಪ್ಲಾಸ್ಟಿಕ್‌ ಮುಕ್ತ ಎಂದು ಘೋಷಿಸುವಂತೆ ಸಲಹೆ ನೀಡಿತು.

ಉಪವಿಭಾಗಾಧಿಕಾರಿ ಅನುಮೋದನೆ: ಪಟ್ಟಣದ ವರ್ತಕ ಸಂಘದ ಪ್ರತಿನಿಧಿಗಳ ಆಶಯಕ್ಕೆ ಸ್ಪಂದಿಸಿದ ಉಪವಿಭಾಗಾಧಿಕಾರಿ ಡಾ.ಎಚ್.ಎಲ್.ನಾಗರಾಜು ಅವರು ಕಾಲಾವಕಾಶಕ್ಕೆ ಅನುಮೋದನೆ ನೀಡಿದ್ದಲ್ಲದೆ, ಪ್ಲಾಸ್ಟಿಕ್‌ ಮುಕ್ತಗೊಳಿಸುವ ನಿಟ್ಟಿನಲ್ಲಿ ತಾಲೂಕಿನ ವಿವಿಧ ಇಲಾಖೆಯ ಅಧಿಕಾರಿಗಳ ನಾಲ್ಕಾರು ತಂಡಗಳನ್ನು ರಚಿಸಿ ಜೂ.1 ರಿಂದಲೇ ಪಟ್ಟಣದಲ್ಲಿನ ವರ್ತಕರ ಅಂಗಡಿಗಳು, ಹೋಟೆಲ್, ಕ್ಯಾಂಟಿನ್‌ಗಳ ಮೇಲೆ ಏಕಾಏಕಿ ದಾಳಿ ನಡೆಸಿ ಅವರಲ್ಲಿನ ಪ್ಲಾಸ್ಟಿಕ್‌ಗಳನ್ನು ವಶಪಡಿಸಿಕೊಳ್ಳಲು ತಿರ್ಮಾನಿಸಿತು.

ಅನುಷ್ಠಾನವಾಗದ ಆದೇಶ: ಆದರೆ ಈ ಸಭೆ ನಡೆದು ಸುಮಾರು ಎರಡು ತಿಂಗಳು ಕಳೆದರೂ ಪುರಸಭೆ ಯಾಗಲೀ ಜಿಲ್ಲಾಡಳಿತದ ಪರವಾಗಿ ಆಗಮಿಸಿದ್ದ ಉಪವಿಭಾಗಾಧಿಕಾರಿಗಳಾಗಲೀ ಇಲ್ಲಿಯವರೆಗೂ ಯಾವೊಂದು ಕ್ರಮಕೈಗೊಂಡ ಬಗ್ಗೆ ಒಂದೇ ಒಂದು ಮಾಹಿತಿ ಇಲ್ಲವಾಗಿದೆ.

ಒಂದು ಮೂಲದ ಪ್ರಕಾರ ಪ್ಲಾಸ್ಟಿಕ್‌ ಮುಕ್ತವಾಗಿಸಲು ಮುಂದಾಗಬೇಕಿದ್ದ ಅಧಿಕಾರಿಗಳಲ್ಲಿ ಸಹಮತವಿಲ್ಲದೇ ಇರುವುದು ಅನುಷ್ಠಾನಕ್ಕೆ ದೊಡ್ಡ ಬಂಡೆಯಂತೆ ಆಗಿದೆ.

ಇಚ್ಛಾಶಕ್ತಿ ಕೊರತೆ: ಮೇ ತಿಂಗಳಲ್ಲಿ ನಡೆದ ಸಭೆ ನಡೆಯಲು ರಾಜ್ಯ ಸರ್ಕಾರ ನೀಡಿದ ಸೂಚನೆ ಮೇಲೆ ಸಭೆ ನಡೆಸಿ ಸಭೆಯಲ್ಲಿನ ನಡಾವಳಿಗಳನ್ನು ರಾಜ್ಯದ ಮಟ್ಟದ ಇಲಾಖೆಗೆ ಕೈತೊಳೆದುಕೊಂಡಿತೆ ಹೊರತು ಪ್ಲಾಸ್ಟಿಕ್‌ ಮುಕ್ತಗೊಳಿಸಲು ಯಾರೊಬ್ಬರಿಗೂ ಇಚ್ಛಾ ಶಕ್ತಿ ಇಲ್ಲದಿರುವುದು ಕಾರಣವೆಂದು ಹೇಳಲಾಗುತ್ತಿದೆ.

ಮಿತಿ ಮೀರಿದ ಪ್ಲಾಸ್ಟಿಕ್‌ ಕಸ: ಪ್ರಸ್ತುತ ಪಟ್ಟಣದ ಯಾವ ಭಾಗದಲ್ಲಿ ನೋಡಿದರೂ ಕಸ ಕಡ್ಡಿ ಪ್ಲಾಸ್ಟಿಕ್‌ನಿಂದ ತಾಂಡವವಾಡುತ್ತಿದೆ. ಸ್ವಚ್ಛ ಭಾರತ್‌ ಅಭಿಯಾನ ಆರಂಭಿಸಿರುವ ಪುರಸಭೆ ಇಬ್ಬರು ರಾಯಭಾರಿಗಳನ್ನು ಆಯ್ಕೆ ಮಾಡಿಕೊಂಡು ಪಟ್ಟಣವನ್ನು ಸ್ವಚ್ಛ ಪಟ್ಟಣ ವಾಗಿಸುವ ನಿಟ್ಟಿನಲ್ಲಿ ಮುಂದಾಗಿದೆ. ಆದರೆ ಪಟ್ಟಣ ವನ್ನು ಸ್ವಚ್ಛವಾಗಿಸುವ ನಿಟ್ಟಿನಲ್ಲಿ ಪುರಸಭೆ ಪಟ್ಟಣದ ಸಂಘ ಸಂಸ್ಥೆಗಳನ್ನು ಸೇರಿಸಿಕೊಳ್ಳದೇ ಇರುವುದು ಮತ್ತು ಪಟ್ಟಣದ ವರ್ತಕರು ಹಾಗೂ ಹೋಟೇಲ್ ಕ್ಯಾಂಟಿನ್‌ಗಳು ಮಾತ್ರ ಪುರಸಭೆಯ ನೀತಿ ನಿಯಮ ಗಳಿಗೆ ಸ್ಪಂದಿಸದೆ ಇರುವುದು ಯೋಜನೆ ಕೈಗೂಡುವ ಸಾಧ್ಯತೆ ಕಡಿಮೆ ಎಂದು ಹೇಳಲಾಗುತ್ತಿದೆ.

 

● ರಾಧಾಕೃಷ್ಣ