ಪಿನಾಕಾ ರಾಕೆಟ್‌ ಯಶಸ್ವಿ ಪರೀಕ್ಷೆ

ಹೊಸದಿಲ್ಲಿ: ದೇಶೀಯವಾಗಿ ಅಭಿವೃದ್ಧಿ ಪಡಿಸಿದ ಪಿನಾಕಾ ರಾಕೆಟ್‌ ಅನ್ನು ಸೋಮವಾರ ರಾಜಸ್ಥಾನದ ಪೋಖ್ರಾನ್‌ನಲ್ಲಿ ಪ್ರಯೋಗಾರ್ಥ ಉಡಾವಣೆ ಮಾಡಲಾಗಿದೆ. ಇದು ಸುಧಾರಿತ ನ್ಯಾವಿಗೇಶನ್‌ ಮತ್ತು ನಿಯಂತ್ರಣ ವ್ಯವಸ್ಥೆಯನ್ನು ಹೊಂದಿದ್ದು, ರಾಕೆಟ್‌ ನಿರ್ದಿಷ್ಟ ಗುರಿಯನ್ನು ತಲುಪಲು ನೆರವಾಗಲಿದೆ. ಈ ಪಿನಾಕ ರಾಕೆಟ್‌ ಅನ್ನು ಡಿಆರ್‌ಡಿಒ ಅಭಿವೃದ್ಧಿಪಡಿಸಿದೆ. ಇದರಿಂದಾಗಿ ನಿರ್ದಿಷ್ಟ ಗುರಿಯ ಮೇಲೆ ದಾಳಿ ನಡೆಸುವ ದೇಶದ ಸಾಮರ್ಥ್ಯ ಇನ್ನಷ್ಟು ಹೆಚ್ಚಾಗಲಿದೆ. ಪರೀಕ್ಷೆಯ ವೇಳೆ ನಿಖರ ಸ್ಥಳದಲ್ಲಿ ರಾಕೆಟ್‌ ಉಡಾವಣೆಗೊಂಡಿದೆ. ಹೀಗಾಗಿ ಇದು ಅತ್ಯಂತ ಯಶಸ್ವಿ ಉಡಾವಣೆ ಎಂದು ರಕ್ಷಣಾ ಸಚಿವಾಲಯ ಹೇಳಿದೆ. ಪರೀಕ್ಷೆಯ ವೇಳೆ ಉಡಾವಣೆಯಿಂದ ಗುರಿಯ ಮೇಲೆ ದಾಳಿ ನಡೆಸುವವರೆಗೂ ರಾಕೆಟ್‌ ಅನ್ನು ಮಾನಿಟರ್‌ ಮಾಡಲಾಗಿದೆ.