ಪೆರ್ನೆಂ ಸುರಂಗ ಮಾರ್ಗ ದುರಸ್ತಿ; ರೈಲು ಸಂಚಾರ ಸುಗಮ

ಮಂಗಳೂರು: ಕೊಂಕಣ ರೈಲ್ವೇಯ ಕಾರವಾರ ವ್ಯಾಪ್ತಿಯ ಪೆರ್ನೆಂ ಸುರಂಗ ಮಾರ್ಗದ ದುರಸ್ತಿ ಪೂರ್ಣಗೊಂಡು ಸಂಚಾರಕ್ಕೆ ಯೋಗ್ಯ ಪ್ರಮಾಣ ಪತ್ರ ನೀಡಲಾಗಿದ್ದು ಮಂಗಳವಾರ ರಾತ್ರಿಯಿಂದಲೇ ರೈಲು ಸಂಚಾರ ಸುಗಮಗೊಂಡಿದೆ.

ರೈಲು ಸಂಖ್ಯೆ 02617 ಎರ್ನಾಕುಳಂ ಜಂಕ್ಷನ್‌-ಹಜ್ರತ್‌ ನಿಜಾಮುದ್ದೀನ್‌ ವಿಶೇಷ ಎಕ್ಸ್‌ಪ್ರೆಸ್‌ ಸೆ. 15ರಿಂದಲೇ ತನ್ನ ಎಂದಿನ ಮಾರ್ಗವಾದ ಮಡಗಾಂವ್‌-ರೋಹಾ – ಕಲ್ಯಾಣ್‌ ಮೂಲಕ ಸಂಚಾರ ಆರಂಭಿಸಿದೆ. ನಂ. 02618 ನಿಜಾಮುದ್ದೀನ್‌- ಎರ್ನಾ ಕುಳಂ ವಿಶೇಷ ಎಕ್ಸ್‌ಪ್ರೆಸ್‌ ಸೆ. 15 ರಿಂದ ಕಲ್ಯಾಣ್‌-ಮಂಗಳೂರು ಜಂಕ್ಷನ್‌ ಮೂಲಕ ಸಂಚಾರ ಆರಂಭಿಸಿದೆ.

ನಂ.02284 ನಿಜಾಮುದ್ದೀನ್‌ ಎರ್ನಾಕುಳಂ ಜಂಕ್ಷನ್‌ ದುರಂತೊ ವಿಶೇಷ ಎಕ್ಸ್‌ಪ್ರೆಸ್‌ ಎ.19ರಿಂದ ವಸಾಯ್‌ ರೋಡ್‌- ಮಂಗಳೂರು ಜಂಕ್ಷನ್‌ ಮೂಲಕ ಸಂಚರಿಸುತ್ತಿದೆ. ನಂ.02283 ಎರ್ನಾಕುಳಂ ಜಂಕ್ಷನ್‌-ಹಜ್ರತ್‌ ನಿಜಾಮುದ್ದೀನ್‌ ದುರಂತೊ ಎಕ್ಸ್‌ಪ್ರೆಸ್‌ ಸೆ. 22ರಿಂದ ಮಂಗಳೂರು ಜಂಕ್ಷನ್‌-ಮಡಗಾಂವ್‌-ರೋಹಾ-ಪನ್ವೇಲ್‌-ವಸಾಯ್‌ ರೋಡ್‌ ಮೂಲಕ ತೆರಳಲಿದೆ.

ನಂ.02432/02431 ಹೊಸ ದಿಲ್ಲಿ-ತಿರುವನಂತಪುರ ಸೆಂಟ್ರಲ್‌-ಹೊಸದಿಲ್ಲಿ ರಾಜಧಾನಿ ವಿಶೇಷ ರೈಲು ಸೆ.16ರಿಂದ ಸೇವೆಗಳನ್ನು ಆರಂಭಿಸಿದೆ. ನಂ.06345/06346 ಲೋಕಮಾನ್ಯ ತಿಲಕ್‌ ಟರ್ಮಿನಲ್‌-ತಿರುವನಂತಪುರಂ-ಲೋಕಮಾನ್ಯ ತಿಲಕ್‌ ಟರ್ಮಿನಲ್‌ ವಿಶೇಷ ರೈಲು ಸೆ.16ರಿಂದ ಸೇವೆ ಪ್ರಾರಂಭಿಸಿದೆ ಎಂದು ಪ್ರಕಟನೆ ತಿಳಿಸಿದೆ.