ಸಂಜೆ ಪೂರ್ಣ ಸರಕಾರಿ ಗೌರವದೊಂದಿಗೆ ಪಾರೀಕರ್‌ ಅಂತ್ಯಕ್ರಿಯೆ;PM ಭಾಗಿ

ಹೊಸದಿಲ್ಲಿ : ಅಗಲಿದ ಗೋವೆಯ ಮುಖ್ಯಮಂತ್ರಿ ಮನೋಹರ್‌ ಪಾರೀಕರ್‌ ಅವರ ಅಂತ್ಯಕ್ರಿಯೆಯನ್ನು ಇಂದು ಸಂಜೆ ಸಂಪೂರ್ಣ ಸರಕಾರಿ ಗೌರವದೊಂದಿಗೆ ಗೋವೆಯ ಸುಪ್ರಿಸಿದ್ಧ ಮೀರಾಮರ್‌ ಬೀಚ್‌ ನಲ್ಲಿ ನಡೆಸಲಾಗುತ್ತದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಪಾರೀಕರ್‌ ಅವರ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು ಬೆಳಗ್ಗೆ 11 ಗಂಟೆಗೆ ದಿಲ್ಲಿಯಿಂದ ಹೊರಟು ಮಧ್ಯಾಹ್ನ 1.30ರ ಒಳಗ್ಗೆ ಗೋವಾ ತಲುಪಲಿದ್ದಾರೆ. 

ದೇಶದ ಮಾಜಿ ರಕ್ಷಣಾ ಸಚಿವರಾಗಿದ್ದ ಮನೋಹರ್‌ ಪಾರೀಕರ್‌ ಅವರು ನಿನ್ನೆ ಭಾನುವಾರ ಸಂಜೆ 6.40ರ ಸುಮಾರಿಗೆ ನಿಧನಹೊಂದಿದ್ದರು. ಅವರು ಈಗೊಂದು ವರ್ಷದಿಂದ ಮೇದೋಜೀರಕ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದರು. 

ಪಾರೀಕರ್‌ ಅವರ ಪಾರ್ಥಿವ ಶರೀರವನ್ನು ಇಂದು ಬೆಳಗ್ಗೆ 9.30ರಿಂದ 10.30ರ ವರೆಗೆ ಇಲ್ಲಿನ ಬಿಜೆಪಿ ಕಾರ್ಯಾಲಯದಲ್ಲಿ ಇರಿಸಲಾಗಿದೆ. ಅನಂತರ ಅದನ್ನು ಕಲಾ ಅಕಾಡೆಮಿಗೆ ಒಯ್ದು ಅಲ್ಲಿ ಬೆಳಗ್ಗೆ 11ರಿಂದ ಸಂಜೆ 4ರ ವರೆಗೆ ಸಾರ್ವಜನಿಕ ದರ್ಶನಕ್ಕೆ ಇಡಲಾಗುತ್ತಿದೆ. ಪಾರ್ಥಿವ ಶರೀರದ ಅಂತಿಮ ಯಾತ್ರೆ ಪಣಜಿಯ ಕಲಾ ಅಕಾಡೆಮಿಯಿಂದ ಸಂಜೆ 4ಕ್ಕೆ ಹೊರತು ಅಂತ್ಯಕ್ರಿಯೆ ನಡೆಯುವ ಮಿರಾಮರ್‌ ಬೀಚ್‌ ತಾಣವನ್ನು ಸಂಜೆ 5 ಗಂಟೆಗೆ ತಲುಪಲಿದೆ. 

ಪ್ರಧಾನಿ ನರೇಂದ್ರ ಮೋದಿ ಅವರು ಅಗಲಿದ ಪಾರೀಕರ್‌ ಅವರನ್ನು ಸರಿಸಾಟಿ ಇಲ್ಲದ ನಾಯಕನೆಂದು ವರ್ಣಿಸಿದ್ದಾರೆ. ಅವರೋರ್ವ ನೈಜ ದೇಶಪ್ರೇಮಿ ಮತ್ತು ಅಪರೂಪದ ಚತುರ ಆಡಳಿತಗಾರ ಎಂದೂ ಮೋದಿ ವರ್ಣಿಸಿದ್ದಾರೆ.