Paris Olympics; ಈಜು ಸ್ಪರ್ಧೆಯಲ್ಲಿ ಪಾನ್‌ ಝಾನ್ಲ ವಿಶ್ವದಾಖಲೆ

ನಾಂಟೆರೆ: ಚೀನದ ಪಾನ್‌ ಝಾನ್ಲ ಅವರು ಪುರುಷರ 100 ಮೀ. ಫ್ರಿಸ್ಟೈಲ್‌ ಈಜು ಸ್ಪರ್ಧೆಯಲ್ಲಿ ತನ್ನದೇ ಹೆಸರಲ್ಲಿದ್ದ ವಿಶ್ವದಾಖಲೆಯನ್ನು ಅಳಿಸಿ ಹಾಕಿದ ಸಾಧನೆ ಮಾಡಿ ಮೆರೆದಿದ್ದಾರೆ. ಬುಧವಾರ ರಾತ್ರಿ ನಡೆದ ಈ ಸ್ಪರ್ಧೆಯಲ್ಲಿ ಝಾನ್ಲ ಅವರು 46.40 ಸೆ.ನಲ್ಲಿ ಈಜಿ ತನ್ನದೇ ಹೆಸರಲ್ಲಿದ್ದ ವಿಶ್ವದಾಖಲೆಯನ್ನು ಮುರಿದರು. ಅವರು ಕಳೆದ ಫೆಬ್ರವರಿಯಲ್ಲಿ ದೋಹಾದಲ್ಲಿ ನಡೆದ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ 46.80 ಸೆ.ನಲ್ಲಿ ಈಜಿ ವಿಶ್ವ ದಾಖಲೆ ಸ್ಥಾಪಿಸಿದ್ದರು.

ಇದೊಂದು ನಿಜವಾಗಿಯೂ ಅವಿಸ್ಮರಣೀಯ ಕ್ಷಣವಾಗಿದೆ. ಈ ದಾಖಲೆ ಚೀನ ತಂಡಕ್ಕೆ ಮಾತ್ರವಲ್ಲ. ವಿಶ್ವಕ್ಕೆ ದಾಖಲೆ ಎಂದವರು ಹೇಳಿದರು. 19ರ ಹರೆಯದ ಅವರು ಆಸ್ಟ್ರೇಲಿಯದ ಕೈಲ್‌ ಚಾಲ್ಮರ್ ಅವರನ್ನು ಹಿಂದಿಕ್ಕಿ ಚಿನ್ನ ಗೆದ್ದರು. ಚಾಲ್ಮರ್ ಬೆಳ್ಳಿ ಮತ್ತು ರೊಮಾನಿಯದ ಡೇವಿಡ್‌ ಪೊಪೊವಿಸಿ ಕಂಚು ಗೆದ್ದರು.